ەسكە سالايىق, پرەزيدەنت سويلەگەن سوزىندە سۋدى ۇنەمدەۋدىڭ وزىق تەحنولوگيالارىن قولداناتىن قىتايدى مىسالعا كەلتىرىپ, ۇكىمەتكە قازاقستاندا دا سونداي تەحنولوگيالاردى ەنگىزۋ ماسەلەسىن پىسىقتاۋ كەرەكتىگىن, ەلەكتر ەنەرگياسىن, جىلۋدى, سۋدى ۇنەمدەۋدى ءارى ولاردى ۇزدىكسىز جەتكىزۋدى قامتاماسىز ەتۋ قاجەتتىگىن جانە تۇتىنۋ مادەنيەتى تۋرالى قامتي ايتتى.
اسەم قايداروۆانىڭ ايتۋىنشا رەسۋرستاردىڭ تاپشىلىعى ارتىپ بارا جاتقان قازىرگى زاماندا الەم كۇننەن-كۇنگە تابيعاتتى قورعاۋ قاجەتتىلىگىن قاتتى سەزىنىپ جاتىر, دەمەك, ەكولوگيا ماسەلەرىنىڭ ماڭىزدىلىعى قاشاندا كۇن تارتىبىندە بولماق, ارينە, ونىڭ ىشىندە قازاقستان دا بار.
«وسى ورايدا, ايتپاعىم, اسىرەسە, جاس بۋىندى قورشاعان ورتانى ايالاي بىلۋگە ءارى تۇتىنۋشىلىق مادەنيەت تۇرعىسىندا ەكولوگيالىق ۇنەمدىلىككە تاربيەلەۋ وتە ماڭىزدى», دەدى ءا.قايداروۆا.
ونىڭ پىكىرىنشە سۋ رەسۋرستارىنىڭ جالپى جاھان بويىنشا تاپشىلىعىن ەسكەرە وتىرىپ, تۇتىنۋدىڭ ءارتۇرلى الەۋمەتتىك نورمالارىن قولدانۋ ماڭىزدى.
ء«اربىر ازامات وزىنە قاجەتتى مولشەردەن ارتىق سۋ جۇمساماۋ كەرەكتىگىن ءتۇسىنۋى كەرەك. تابيعي رەسۋرستاردى ۇنەمدى قولدانا ءبىلۋ ۇقىپتىلىقتى عانا ەمەس, سونى ۇعاتىن سانا-سەزىمدى دە تالاپ ەتەدى», دەپ تۇيىندەدى اسەم قايداروۆا.
