فوتو: اشىق دەرەككوز
قاسىم-جومارت توقاەۆ ەلىمىزدە ءىرى ونەركاسىپ جوبالارىن ىسكە قوسۋ ءۇردىسى باياۋ ەكەنىن اتاپ ءوتتى. مەملەكەت باسشىسى بۇل باعىتتاعى جۇمىستى اكتيۆتەردى قازىناعا قايتارۋمەن قاتار جۇرگىزۋگە تاپسىرما بەردى.
«قازاقستاندا ورتا بۋىنعا جاتاتىن كوشباسشى كومپانيالار شوعىرىن قالىپتاستىرۋ مىندەتى ءالى دە وزەكتى. ۇكىمەت بيىلعى ماۋسىم ايىنىڭ سوڭىنا دەيىن كەلەشەگى زور ءاربىر ورتا كاسىپورىننىڭ جۇمىس جوسپارىن ازىرلەۋگە ءتيىس. ەلىمىزدىڭ سيرەك كەزدەسەتىن مەتالل كەنىشىن, سونىڭ ىشىندە الەمدە سۇرانىس ارتىپ كەلە جاتقان ءليتيدى ءوندىرۋ مەن وڭدەۋ الەۋەتى وتە ۇلكەن. دەمەك ءبىز وسى سالاعا ينۆەستيتسيا مەن وزىق تەحنولوگيالاردى تارتۋىمىز قاجەت. بۇل رەتتە شەتەلدىك ينۆەستورلارعا دا, وتاندىق بيزنەسمەندەرگە دە باسىمدىق بەرگەن ءجون», دەدى پرەزيدەنت.
سونداي-اق پرەزيدەنت پارلامەنتكە سەسسيا سوڭىنا دەيىن جەر قويناۋىن پايدالانۋ قۇقىعىنىڭ زاڭنامالىق نەگىزىن قامتاماسىز ەتۋ كەرەك ەكەنىن ايتتى.
«جەر قويناۋىن پايدالانۋ سالاسىنداعى رەفورما ەش كەدەرگىگە قاراماستان جالعاسۋعا ءتيىس. بۇل – ءپرينتسيپتى ۇستانىم. ۇكىمەت مۇنى قاتاڭ تۇردە ساقتاۋى قاجەت», دەدى قاسىم-جومارت توقاەۆ.
