فوتو: kursiv.media
ۇكىمەت باسشىسى قوستاناي وبلىسىندا بيدايدى قايتا وڭدەۋ جوباسى ىسكە اسىرىلىپ جاتقانىن ايتتى. جالپى قۇنى 132 ملن. دوللار بولاتىن زاۋىت كراحمال ونىمدەرى مەن بيوەتانول شىعارادى. بيىل تۇركىستان وبلىسىندا جوبالىق قۋاتى 150 مىڭ توننانى قۇرايتىن جۇگەرى وڭدەۋ زاۋىتى دا ىسكە قوسىلماق.
«استانادا وندىرىستىك قۋاتى 320 مىڭ تونناعا جەتەتىن كراحمال, گليۋتەن جانە جەمىس شىرىنىن تەرەڭ وڭدەۋگە ارنالعان بيداي مەن بۇرشاق داقىلدارىن قايتا وڭدەۋ زاۋىتىن سالۋ جوباسى باستالدى. بيىل سولتۇستىك قازاقستان وبلىسىندا تاۋلىگىنە 1200 توننا كۇنباعىس وڭدەيتىن زاۋىت اشىلادى», دەدى ولجاس بەكتەنوۆ بايانداماسىندا.
پرەمەر - ءمينيستردىڭ ايتۋىنشا, بىرنەشە ينۆەستورعا وندىرىستىك قاراسورا وسىرۋگە رۇقسات بەرىلگەن.
«بىرنەشە كومپانياعا جاساندى جاعدايدا قاراسورا وسىرۋگە ليتسەنزيا بەرىلدى. اتالعان ونىمنەن ماي, مال ازىعىن, تىڭايتقىشتار جانە تالشىق الۋعا بولادى», دەدى ول.
بيىل كولىك-لوگيستيكا سالاسىندا دا جۇزەگە اسىرىلاتىن جوبالار تانىستىرىلدى. ماسەلەن, «دوستىق-مويىنتى» جانە الماتى قالاسىن اينالىپ وتەتىن تەمىرجول قۇرىلىسى اياقتالادى.
«داربازا-ماقتاارال» جانە «باقتى-اياگوز» تەمىرجول ماگيسترالىن سالۋ جالعاسۋدا. «مويىنتى-قىزىلجار» جاڭا تەمىرجول جەلىسىن, سونداي-اق, «التىنكول-جەتىگەن» ۋچاسكەسىنىڭ ەكىنشى جولدارىن سالۋدى قاراستىرىپ جاتىرمىز», دەدى ۇكىمەت باسشىسى.
ەلىمىزدىڭ تۋريستىك الەۋەتىن ارتتىرۋ ماقساتىندا كاتونقاراعاي, زايسان جانە كەندىرلى ايماقتارىندا اۋەجاي سالىنباق. ولجاس بەكتەنوۆ بايانداماسىندا اقتاۋدا اۋە حابىن قۇرۋ جوباسى پىسىقتالىپ, كاسپي تەڭىزىنىڭ تۇبىمەن تالشىقتى-وپتيكالىق بايلانىس جەلىسىن تارتۋ باستالاتىنىن اتاپ ءوتتى.
