عىلىمي ورتالىق وسى ارالىقتا 100-دەن استام بالاعا كۇردەلى مەگا-ەندوپروتەزدەۋ وتالارىن جاساۋ بارىسىندا كىشكەنتاي پاتسيەنتتەردىڭ اياق-قولدارىن ساقتاپ قانا قويماي, ەل قاتارىنا قوسىلۋعا وراسان سەپتىگىن تيگىزدى. وسى ورايدا, جىل سايىن ەلىمىزدە وستەوساركوما دەرتىنە شامامەن 20-25 بالا شالدىعادى دەسەك, بۇل كەسەلدىڭ 50%-دان استامى تىزە بۋىنىندا, 30% يىق-بۋىنىنا جاقىن ورنالاسادى.
سوڭعى جىلدارى سۇيەك ىسىكتەرى كەزىندە جوعارى مولشەرلى حيميوتەراپيانى ەنگىزۋدىڭ ارقاسىندا ونىڭ باسقا اعزالارعا شابۋى تومەندەپ, ومىرلەر ۇزارا تۇسكەن. بۇل كوپ جاعدايدا, زاقىمدانعان اياقتاردى 90%-دان استام جاعدايدا ساقتاپ قالۋعا مۇمكىندىك بەرىپ وتىر. ءبىر سوزبەن ايتقاندا, سۇيەكتىڭ سيرەك قاتەرلى ىسىگىنە دۋشار بولعان بالالاردىڭ اسا ءبىر اسقىنعان جاعدايدا بولماسا, اياق-قولدارى كەسىلمەيدى.
قازىرگى تاڭدا وستەوساركومانى ەمدەۋدىڭ جاڭا ادىستەرىن ەنگىزۋ – ەم-دوم تيىمدىلىگىن الەمدىك ناتيجەلەرگە جاقىنداتۋعا مۇمكىندىك بەرەدى.
وسىنداي اۋىر دا, ەرەكشە كۇردەلى وپەراتسيالاردى اتقاراتىن پبحعو №2 حيرۋرگي ءبولىمىنىڭ مەڭگەرۋشىسى, جوعارى ساناتتى ونكوحيرۋرگ, ونكوورتوپەد باحرام جۇمادۋللاەۆ: «ورتالىق زاماناۋي مودۋلدىك ەندوپروتەزدەردى ساتىپ الۋعا قول جەتكىزىپ, قارقىندى جوعارى مولشەرلى حيميوتەراپيانى قولدانۋدىڭ ارقاسىندا اعزانى ساقتاپ قالاتىن وپەراتسيالاردىڭ سانى ارتتى. سونداي-اق بالالارداعى وستەوساركومانى بىرىكتىرىپ ەمدەۋ ناتيجەلەرى دە جاقساردى. اتاپ وتەرلىك ءجايت, ونكولوگيالىق ەندوپروتەزدەر ورتوپەديالىق پروتەزدەرگە ۇقسامايدى, ەرەكشە مەگاپروتەزدەرگە جاتادى. قازىرگى تاڭدا حيرۋرگيالىق ەمدەۋدىڭ وسى ءتۇرى وستەوساركوماعا شالدىققان بالالاردىڭ 90%-دان استامىنا جاسالىنادى, ول ءوز كەزەگىندە بالانىڭ الەۋمەتتىك بەيىمدەلۋىنە, جاعدايىنىڭ جاقسارۋىنا مۇمكىندىك بەرەدى», دەيدى.
ەلىمىزدە اياق-قولدى امان الىپ قالا وتىرىپ, ەمدەۋ اياقتالعاننان كەيىن جالپى ساۋىعىپ كەتۋ جاعدايلارى – 71%. بۇل ناتيجە وستەوساركومانى زەرتتەۋ جونىندەگى حالىقارالىق مۋلتيورتالىقتار ناتيجەسىنىڭ دەرەكتەرىمەن ساي كەلەدى.
سوڭعى جىلدارى بويى جاسىنان قىسقا بالالارعا جەكە دايىندالعان از ءينۆازيۆتى ۇزارتقىش پروتەزدەردى قولدانۋ ارقىلى دەنە مۇشەلەرىن ساقتاۋ وپەراتسيالارى ەنگىزىلدى.
ونكولوگيا سالاسىنداعى ەڭ كۇردەلى وپەراتسيا تەگىن مەديتسينالىق كومەكتىڭ كەپىلدەندىرىلگەن كولەمى نەگىزىندە تەگىن جاسالادى. وعان قوسا پەدياتريا جانە بالالار حيرۋرگياسى عىلىمي ورتالىعىندا اياققا عانا ەمەس, تىزە, يىق, جامباستىڭ قاتەرلى ىسىكتەرىنە دە ورگان ساقتاۋ وپەراتسيالارى اتقارىلىپ جاتىر. بىرەگەي وپەراتسيالاردىڭ ناتيجەسىندە بالالاردىڭ اياق-قولدارى ساقتالىپ قانا قويماي, ولاردىڭ ءومىر ءسۇرۋ ساپاسى دا جاقساردى. بۇگىنگى كۇنى ولار ءوز قۇربى-قۇرداستارىمەن بىرگە مەكتەپكە بارىپ, ۋنيۆەرسيتەتتە وقىپ, ءتۇرلى قىزمەتتە جۇمىس اتقارادى ءتىپتى, سپورتپەن اينالىسىپ, جاتتىعۋ زالدارىنا, باسسەيندەرگە بارىپ بەلسەندى ءومىر ءسۇرىپ كەلەدى. تۇرمىس قۇرىپ 2-3 بالانىڭ اناسى جانە اكەسى بولىپ جاتقان بالالار دا بار.
الماتى
