سۋرەت: elordainfo.kz
اتالعان ءبىلىم بايگەسى بەس كۇنگە سوزىلدى. وعان قاتىسۋشىلار ەكى تۋر بويىنشا باق سىنادى. كوماندالاردىڭ قۇرامى ۇلتتىق پاندىك وليمپيادالاردىڭ ناتيجەلەرى بويىنشا انىقتالدى. تاپسىرمالار كۇردەلىلىگى مامانداندىرىلعان سىنىپتار باعدارلاماسىنا سايكەس كەلدى. بۇل حالىقارالىق قازىلار القاسىمەن قۇراستىرىلعان. قازىلار القاسىنىڭ توراعاسى – اكادەميك, ەڭبەك ەرى اسقار جۇمادىلداەۆ.
«رەسپۋبليكالىق فيزيكا-ماتەماتيكا مەكتەبى» باسقارما توراعاسىنىڭ ءبىرىنشى ورىنباسارى الماس كۇنعوجيننىڭ ايتۋىنشا, بۇعان دەيىن بۇل بايقاۋ الماتىدا ءوتىپ كەلگەن. ەلوردادا العاش ءوتىپ جاتىر.
«بيىل بۇل وليمپيادا 21-رەت وتۋدە. سوندىقتان ونىڭ ماڭىزى ۇلكەن. وعان 90-نان استام كوماندا قاتىسىپ وتىر. ماسەلەن, ءار كوماندا بويىنشا ماتەماتيكادان – 3, فيزيكادان – 2 جانە ينفورماتيكادان 2 وقۋشى باق سىنادى. سونداي-اق كوماندالار ءبىر مەكتەپتەن بولۋى كەرەك. جەتكىنشەكتەر سۇراقتارعا وزدەرى قالاعان تىلدە جاۋاپ بەرەدى. جەڭىمپازدارعا ەلىمىزگە بەلگىلى ۋنيۆەرسيتەتتەردەن گرانت ۇسىنامىز», دەدى ا. كۇنعوجين.
بايقاۋعا 15 ەلدەن الىستان ات ارىتىپ جەتكەن وقۋشىلاردىڭ ولقىسى جوق. ءبارى ءبىلىمدى. مىسالى, الماتى قالاسىنان كەلگەن ميراس بازارباي ءبىلىم باسەكەسىنە ەكىنشى رەت قاتىسىپ وتىر.
«بۇل وليمپيادا وزىمە ەرەكشە ۇنايدى. دەگەنمەن قيىندىعى دا بار. بىراق مەن ءۇشىن جارىستىڭ ناتيجەسى ماڭىزدى ەمەس. حالىقارالىق دەڭگەيدەگى ءىس-شاراعا قاتىسۋدىڭ ءوزى – جاقسى جەتىستىك. بولاشاقتا ەلىمىزدەگى ۇزدىك ۋنيۆەرسيتەتتەردىڭ بىرىنە وقۋعا ءتۇسىپ, تۋعان جەرىمە قىزمەت ىستەسەم دەيمىن», دەدى ول.
سونىمەن, وليمپيادا قورىتىندىسى بويىنشا 69 وقۋشى التىن مەدالعا يە بولسا, كۇمىس مەدالدى 100 قاتىسۋشى يەلەندى. ال قولا مەدال 150 جەتكىنشەككە بۇيىردى. ءبىزدىڭ وقۋشىلارىمىزدىڭ اراسىندا 21 ورەن جەڭىس تۇعىرىنان كورىنسە, 33 وقۋشى ەكىنشى ورىنعا قول جەتكىزدى. ءۇشىنشى ورىندى 63 وقۋشى الدى. قىسقاسى, ەل قورجىنىنا وزات ورەندەر باس-اياعى 117 مەدال ولجا سالدى. جەڭىمپازداردىڭ ءبارى باعالى سىيلىقتارمەن ماراپاتتالدى.
ديدار اسىلحان,
احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ ستۋدەنتى
