مەملەكەتتىك ءرامىزدى قورلاۋ – كورسوقىرلىق

مەملەكەتتىك تۋدى قورلاۋعا بولمايدى. ول – ەلدىگىڭنىڭ, تاۋەلسىزدىگىڭنىڭ بەلگىسى. ازامات بولىپ وتباسىڭدى اسىراپ جۇرسەڭ, سەنى قاناتتىعا قاقتىرماي, تۇمسىقتىعا شوقتىرماي توبەڭدى كوككە جەتكىزەتىن وتانىڭنىڭ سيمۆولى. بىراق, كوكىرەگى كور جاندار ولاي ويلامايدى ەكەن. جۇرت بولىپ قاس­تەرلەگەن مەملەكەتتىك ءرامىزدى قورلاۋ تاياز جاندارعا ەشتەڭە ەمەس. شىمكەنتتە مەملەكەتتىك تۋمەن قوقىس شىعارعان جۇمىسشىلار انىقتالدى. وسىعان بايلانىستى قالا اكىمىنىڭ ءباسپاسوز قىزمەتى ارنايى بريفينگ وتكىزىپ, اقپارات قۇرالدارى وكىلدەرىنە تۇسىنىك بەردى. وقيعا شىمكەنتتە ورىن العانى انىقتالدى, دەدى ءباسپاسوز حاتشىسى نۇرلىبەك جەڭىسبەك. ءال-فارابي ­اۋدانى اۋماعىن تازالاعان قىزمەت­كەر­لەر «بەك-اسىل سەرۆيس» جشس-ىندە جۇمىس جاسايدى. جۇك كولىگى دە وسى مەكەمەگە تيەسىلى. قىلمىستىق كودەكستىڭ 372-بابىنا سايكەس ەلىمىزدىڭ مەملەكەتتىك رامىزدەرىن قورلاۋ 2000 ايلىق ەسەپتىك كورسەتكىشكە دەيىنگى مولشەردە ايىپپۇل سالۋمەن نەمەسە سول مولشەردە تۇزەۋ جۇمىستارىن اتقارۋمەن جازالانادى. بۇگىندە ەكى جۇمىسشى مەن جۇرگى­زۋشىدەن قۇقىق قورعاۋ وكىلدەرى جاۋاپ الىپ جاتىر. ولارعا دا جان كەرەك. «ءبىز بارعاندا تۋ قۇلاپ جاتىر ەكەن. ۇستىنە قوقىس توگىلىپتى. ءبىز بار بولعانى تۋدى قوقىستان تازارتتىق», دەيدى كۇدىكتىلەر. مەملەكەتتىك تۋدى قورلاۋ ءبىرىنشى رەت بولىپ وتىرعان جاعداي ەمەس. ەلدىگىڭنىڭ نىشانىن اياقاستى ەتۋ – ناعىز كورسوقىرلىق. ولاردى اياماۋ كەرەك. باقتيار تايجان, «ەگەمەن قازاقستان». وڭتۇستىك قازاقستان وبلىسى.