وتكەن جىلى جامبىل وبلىسى ەلىمىز بويىنشا «ۇزدىك سپورتتىق ءوڭىر» اتاندى. بۇل اتاق ءوڭىر سپورتشىلارىنىڭ قانداي تولايىم تابىسى ءۇشىن بەرىلدى, جامبىلدىق سايىپقىراندار ۇلۋ جىلىندا نەندەي جەتىستىكتەرىمەن دارالاندى, ءوڭىر سپورتىنىڭ وركەندەۋى باعىتىندا سالا ماماندارى قانداي جۇمىس اتقاردى؟ بۇل ساۋالدارعا وبلىس اكىمدىگى دەنە شىنىقتىرۋ جانە سپورت باسقارماسىنىڭ باسشىسى ەرنار يبرايموۆ جاۋاپ بەردى.
«وتكەن جىلى ءوڭىردىڭ سپورت سالاسىن دامىتۋعا 15,8 ملرد تەڭگە قارجى قاراستىرىلدى. وسىعان قاراپ-اق بيلىك تاراپىنان سپورتشىلارعا بارىنشا جاعداي جاسالىپ جاتقانىن باعامداۋعا بولادى. سپورتتىڭ قاي تۇرىنەن بولسىن ۇلتتىق قۇراما ساپى ۇدايى جاڭارتىلىپ وتىرۋى ءتيىس. جاڭا بۋىن قالىپتاسپاي, ساڭلاقتاردىڭ اۋىز تولتىرىپ ايتارلىقتاي جەڭىسكە جەتۋى مۇمكىن ەمەس. مىقتى سپورتشىلاردى شىعارۋ, ولارعا قولداۋ كورسەتۋ – مىندەتىمىز. جالپى العاندا, وبلىستا 54 سپورت مەكەمەسى تۇراقتى, تىنىمسىز جۇمىس ىستەپ كەلەدى. بۇل مەكەمەلەردە 29872 سپورتشى بار, 1195 جاتتىقتىرۋشى ولاردىڭ تالاپقا ساي جاتتىعۋى جولىندا تەر توگىپ ءجۇر. قازىرگى كەزدە وڭىردە سپورتتىڭ 85 ءتۇرى قامتىلعان. 885 سايىپقىرانىمىز – ءتۇرلى دەڭگەيدەگى ۇلتتىق قۇرامانىڭ مۇشەسى. وبلىس سپورتشىلارى بۇگىنگە دەيىن رەسپۋبليكالىق, حالىقارالىق دەڭگەيدەگى جارىستاردا 1797 مەدال يەلەندى. ونىڭ 658-ءى التىن, 570-ءى كۇمىس, 569-ى قولا جۇلدە», دەدى ە.يبرايموۆ.
باسقارما باسشىسى كەلتىرگەن دەرەككە جۇگىنسەك, وتكەن جىلى ءبىر سپورتشى ەلىمىزدىڭ ەڭبەك سىڭىرگەن سپورت شەبەرى, سەگىز سپورتشى حالىقارالىق دارەجەدەگى سپورت شەبەرى, 84 سپورتشى سپورت شەبەرى ءنورماتيۆىن ورىنداعان. سونداي-اق ءۇش باپكەر ەلىمىزدىڭ «ەڭبەك سىڭىرگەن جاتتىقتىرۋشىسى» اتاعىنا يە بولعان.
جامبىل وبلىسىنا «جىلدىڭ ۇزدىك سپورتتىق ءوڭىرى» اتاعى بەكەر بەرىلگەن جوق. ماماندار بۇل تابىستى تورتجىلدىقتىڭ باستى دوداسى سانالاتىن پاريج وليمپياداسىنداعى تاريحي تابىسپەن بايلانىستىرادى. وليمپيا ويىندارىندا دزيۋدوشى ەلدوس سمەتوۆ 44 جىل بويى كۇتكەن ناتيجەنى تىركەپ, كۇرەس تۇرلەرىنەن تاۋەلسىز ەلىمىزدىڭ تاريحىندا قازاق وعلاندارى ساپىنان العاش بولىپ التىن جۇلدە يەلەنىپ, ماسكەۋ وليمپياداسىنداعى جاقسىلىق ۇشكەمپىروۆتىڭ ناتيجەسىن قايتالادى.
«گرەك-ريم كۇرەسىنىڭ شەبەرى, قازاق حالقىنىڭ داڭقتى ۇلى جاقسىلىق ۇشكەمپىروۆتىڭ ماسكەۋ وليمپياداسىنداعى ەرلىگى جۇرت جادىنان ماڭگى وشپەيتىنى انىق. سوڭعى ءۇش وليمپيادادا ءۇش جۇلدە يەلەنگەن ەلدوستىڭ پاريجدەگى التىن جۇلدەسىن جانكۇيەرلەر 44 جىل كۇتتى. اقىرى سايىپقىرانىمىز ەل ءۇمىتىن اقتادى. ريو-دە-جانەيرو – كۇمىس, توكيو – قولا, پاريج – التىن!
پاراليمپيادا ويىندارىنا جامبىل وبلىسىنان 4 سپورتشى قاتىسىپ, جۇماعالي نۇرداۋلەت پاراجۇزۋدەن كۇمىس مەدالعا يە بولدى.
8-13 قىركۇيەك ارالىعىندا استانادا وتكەن V دۇنيەجۇزىلىك كوشپەلىلەر ويىندارىندا جامبىل وبلىسىنان 17 سپورتشى قاتىسىپ, 7 التىن, 7 كۇمىس, 4 قولا, بارلىعى 18 مەدال يەلەندى.
گرەك-ريم كۇرەسىنىڭ شەبەرى ەرجەت جارىلقاسىننىڭ الەم چەمپيوناتىندا كۇمىس جۇلدەگەر اتانۋى مەن ازيا چەمپيوناتىندا توپ جارۋى دا ايتارلىقتاي جەتىستىك. بۇل – جامبىلدىق سپورتشىلاردىڭ ەرەسەكتەر اراسىنداعى الەم چەمپيوناتىنداعى تۇڭعىش جۇلدەسى», دەيدى باسقارما باسشىسى.
راسىندا دا, وتكەن جىلى جامبىلدىق سپورتشىلار حالىقارالىق دودالاردا اۋىز تولتىرىپ ايتارلىقتاي تابىستارعا قول جەتكىزدى. ايتالىق, دزيۋدوشى نۇرقانات سەرىكباەۆ پەن مەيىرجان ءاشىروۆ اسكەريلەر اراسىندا الەم چەمپيونى اتاندى. جاستار اراسىنداعى الەمدىك دودادا بوكسشى اسىلحان كوشەرباي كۇمىس, انەل ءابدىراسىلوۆا قولا جۇلدە يەلەندى. بەكسۇلتان بورانبەك جامبىلدىق جاستار اراسىنان شىققان العاشقى الەم چەمپيونى رەتىندە ەسىمىن تاريحقا جازدى. بۇدان بولەك, ەرەسەكتەر اراسىنداعى جارىستا دياس مولجىگىتوۆ پەن دۋلات بەكباۋوۆ ازيا چەمپيوناتىنىڭ كۇمىس جۇلدەسىن موينىنا ىلسە, ايگەرىم ساتتىباەۆا قولا جۇلدەگە قول جەتكىزدى.
ءوڭىر سپورتشىلارىنىڭ حالىقارالىق دودالاردا جاسىنداي جارقىراعان ءساتى دە از ەمەس. سونداي-اق وڭىردە بۇقارالىق سپورتقا مىقتاپ بەت بۇرعان تۇرعىنداردىڭ سانى جىل ساناپ ارتىپ كەلە جاتقانىن دا ايتا كەتكەن ءجون.
«وتكەن جىلى وبلىس حالقىنىڭ 41,2 پايىزى تۇراقتى تۇردە سپورتپەن شۇعىلدانۋعا دەن قويدى. وسىلايشا كورسەتكىش الدىڭعى جىلدارعا قاراعاندا ەداۋىر ارتتى. قازىر وبلىس كولەمىندە 503,3 مىڭ ادام بۇقارالىق سپورتقا تارتىلعان. الداعى ۋاقىتتا بۇل كورسەتكىشتى كوبەيتۋ ماقساتىندا جۇمىس ىستەيتىن بولامىز», دەدى باسقارما باسشىسى.
ايتارى جوق, وتكەن جىل جامبىلدىق جامپوزدار ءۇشىن تولايىم تابىستارعا
تولى بولدى. وليمپيا ويىندارىنىڭ جالعىز التىن جۇلدەسىن جامبىلدىق سپورتشى قورجىنعا ءتۇسىرىپ, تاريحي جەتىستىكتى تىركەدى. بىلعارى قولعاپ شەبەرلەرى دە تاماشا تابىستارعا قول جەتكىزدى. دەگەنمەن جامبىلدىق بوكسشىلاردىڭ 2004 جىلدان بەرى وليمپيا ويىندارىندا جۇلدە الماعانىن دا قاپەردە ۇستاعان ءجون. ەندىگى ماقسات – كەلەسى وليمپيادادا سول ولقىلىقتىڭ ورنىن تولتىرۋ.
جامبىل وبلىسى
