تاتۋلىق پەن تۇراقتىلىق – تىنىشتىق تۇعىرى

ەلباسى نۇرسۇلتان نازارباەۆ حالىقتى بىرلىك مەرەكەسىمەن قۇتتىقتادى كەشە ەلورداداعى «قازاق ەلى» مونۋمەنتى الدىنداعى الاڭدا 1 مامىر – قازاقستان حالقىنىڭ بىرلىگى كۇنى مەرەكەسىنە وراي «نۇرلى جول – جەڭىس جولى» اتتى مەرەكەلىك شارا ءوتتى. وعان مەملەكەت باسشىسى نۇرسۇلتان نازارباەۆ قاتىستى. مەرەكەلىك جيىندا ءسوز العان ەلباسى الاڭعا جينالعان جۇرت­شىلىقتى قازاقستان حالقىنىڭ بىرلىگى كۇنىمەن قۇتتىقتاي كەلە, وتكەن سايلاۋدا ەل ازاماتتارى وزدەرى­نىڭ كۇش-جىگەرى مەن بىرلىگىن بۇكىل الەمگە تانىتقانىن اتاپ كورسەت­تى.  «كوپەتنوستى حالىقتىڭ تۇتاس­تىعى مەن تۇراقتىلىعى ارقا­سىندا قازاقستان زور تابىستارعا جەتتى. ەل الدىندا تۇرعان مىندەت­تەر­دى ورىنداۋ ءۇشىن بىرلىكتى ساق­تاۋ كە­رەك», – دەدى نۇرسۇلتان نازار­باەۆ. قازاقستان پرەزيدەنتى, سونداي-اق, كورسەتكەن سەنىمى مەن قولداۋى ءۇشىن بارشا حالىققا العىسىن ءبىلدىردى. «مەنى قولداعان بارلىق قا­زاق­ستاندىقتارعا العىس ايتقىم كەلەدى. ماعان وسى كۇندەرى ەلىمىز بەن الەمنىڭ سان تاراپىنان, ءتۇر­لى سالا وكىلدەرىنەن مىڭداعان قۇت­تىقتاۋ حاتتار مەن جەدەلحاتتار, تەلەفون قوڭىراۋلارى كەلىپ تۇسۋدە. بارىنە ۇلكەن راحمەت ايتامىن. حالىققا قىزمەت ەتۋ – ۇلى مارتەبە. مەن ءوزىمدى وسى جۇمىسقا ارناعان اداممىن جانە قازاقستاننىڭ العا ىلگەرىلەۋى ءۇشىن, ءبىزدى بۇكىل الەم قۇرمەتتەۋى ءۇشىن جانە ەل الدىندا تۇرعان مىندەتتەردى تابىستى جۇزەگە اسىرۋ ءۇشىن ءبارىن جاسايتىن بولامىن. ءبىز مۇنى ەلدىڭ جانە بولاشاق ۇرپاقتىڭ الدىنداعى پارىزىمىزدى ورىندادىق دەپ ايتۋ ءۇشىن اتقارۋعا ءتيىسپىز», – دەدى مەم­لەكەت باسشىسى. ءسوزىنىڭ سوڭىندا نۇرسۇلتان نا­زارباەۆ بارشا قازاقستاندىققا باق-بەرەكە جانە تابىس تىلەدى. مەرەكەلىك شارا ايا­سىندا, سونىمەن قاتار, كونتسەرتتىك باعدار­لاما ۇيىمداستىرىلدى. وعان «مۋزارت», «الاش ۇلى» توپتارى, ارداق بالاجانوۆا, مارجان اراپ­باەۆا, الماس كىشكەنباەۆ, سۇندەت بايعوجين, اسەل سادۋاقاسوۆا, ديانا شاراپوۆا, ەۆگەني گارتۋنگ سەكىلدى قازاقستاننىڭ ەسترادا ونەر­پازدارى قاتىستى. جينالعان قاۋىمعا ەلوردانىڭ جانە رەسپۋب­ليكانىڭ شىعارماشىلىق ۇجىم­دارى, ونىڭ ىشىندە استانا قالاسى مەملەكەتتىك اكادەميا­لىق في­لار­مونياسىنىڭ وكىلدەرى, ەلوردالىق تسيرك, «جاستار», قۋىر­شاق جانە كوڭىل­دى تاپقىرلار كلۋبىنىڭ تەاتر­لارى, «ناز» مەملەكەتتىك بي تەاترى ونەر كورسەتتى. بىرلىك كۇنىن اتاپ ءوتۋ ءۇشىن اس­تاناعا وڭىرلىك ەتنومادەني ءبىر­لەستىكتەردىڭ وكىلدەرى دە ارنايى كەلىپتى. ولاردىڭ اراسىندا سول­تۇستىك قازاقستان, ماڭعىستاۋ, قوس­تاناي, قاراعاندى, پاۆلودار وب­لىس­تارىنىڭ ونەر ۇجىمدارى بار. «قازاق ەلى» مونۋمەنتى الاڭى­نىڭ اۋماعىندا مەرەكەگە وراي ەت­نواۋىلدار تىگىلىپ, ول جەرلەردە ەلوردانىڭ عانا ەمەس, باسقا دا قالالاردىڭ ەتنومادەني ءبىر­لەس­تىكتەرى ءوز ۇلتىنىڭ مادەنيەتىن, بولمىسىن, دوستىق ءداستۇرى مەن قو­ناقجايلىلىعىن پاش ەتتى. بىرلىك كۇنىنە ارنالعان كون­تسەرتتىك باعدارلامالار مەن حالىق­تىق سەرۋەندەر, سونىمەن قاتار, استانانىڭ «بايتەرەك» مونۋ­مەنتى, ەلوردالىق اكىمدىك الدىن­داعى الاڭداردا, عاشىقتار جانە ستۋ­دەنتتەر ساياباقتارىندا, «جاستار تەاترى» الدىندا جانە ەسىل وزەنى جاعالاۋىندا ۇيىمداستىرىلىپ, قالا تۇرعىندارى مەن قوناقتارىنا مەرەكەلىك كوڭىل كۇي سىيلادى. ءلايلا ەدىلقىزى, «ەگەمەن قازاقستان». سۋرەتتەردى تۇسىرگەندەر س.بوندارەنكو, ب.وتارباەۆ.