قۇزىرلى ورگاندار بيىل وسكەمەننىڭ 19-شاعىن اۋدانىنداعى قۇرىلىسى جول ورتادا توقتاپ قالعان كوللەدج عيماراتى فيزيكا-ماتەماتيكا باعىتىنداعى دارىندى بالالارعا ارنالعان مەكتەپ-ليتسەي-ينتەرناتىنا بەرىلەدى دەپ مالىمدەگەن. الايدا قاڭىراعان عيماراتتىڭ ماڭايىندا قىبىر ەتكەن تىرشىلىك جوق. ەسكە سالساق, بىلتىر وبلىستىڭ ءبىلىم باسقاراماسى باسشىسىنىڭ سول كەزدەگى ورىنباسارى نۇرتۋعان مارات ۇلى 2025 جىلى ءبىلىم ورداسىنا ارنالعان عيماراتتىڭ قۇرىلىسى اياقتالادى دەگەن. قۇرىلىس بيىل اياقتالۋى ءۇشىن جۇمىس بىلتىر باستالۋى كەرەك ەدى.
«ماسەلەنى شەشۋدىڭ بىردەن-ءبىر جولى – ءىلياس ەسەنبەرلين داڭعىلى بويىنداعى 880 ورىندىق عيماراتتى وسى ليتسەي-ينتەرناتقا بەرۋ. ول العاشىندا كوللەدج رەتىندە بوي كوتەرگەن. قازىرگى تاڭدا قۇرىلىسى توقتاپ تۇر. قاتەلەسپەسەم, ناۋرىز ايىندا «ۆك ينۆەست كومپاني» مەردىگەر كومپانياسى ول نىساندى ساتىپ العان. بىراق قۇرىلىسى مەكتەپكە باعىتتالعان. 2025 جىلى اتالعان مەردىگەر كومپانيا قۇرىلىستى اياقتايدى. قازىر ەكسپەرتيزالىق جۇمىستار جۇرگىزىلىپ جاتىر. ءبارى زەرتتەلگەن سوڭ قۇرىلىسقا كىرىسەدى», دەپ ەدى باسقارما باسشىسىنىڭ ورىنباسارى 2023 جىلى بەرگەن سۇحباتىندا.
ودان بەرى جىلدان استى. دارىندى بالالار سول باياعى ەسكى مەكتەپتە ءبىلىم الىپ, ىستىق سۋسىز ينتەرناتتا تۇرىپ جاتىر. ال پرەزيدەنت تەحنيكالىق ماماندىققا كوڭىل ءبولۋ كەرەكتىگىن ءبىر ەمەس, بىرنەشە قايتارا ايتقان. ول سوزگە قۇلاق اسىپ وتىرعان وبلىستا قاي باسشى بار؟
ءبىز كوتەرگەن بۇل ماسەلە ءبىر ورىندا تۇرالاپ قالعان سوڭ جۋىقتا وبلىستىق ءبىلىم باسقارماسىنا تاعى دا رەسمي سۇراق جولداعانبىز. ونىڭ ۇستىنە, الدىڭعى جىلعى بەرگەن مالىمەتتەرى سيىرقۇيىمشاقتانىپ كەتكەن. بۇل ورايدا باق وكىلدەرىنىڭ ماقساتى بىرەۋ: فيزيكا-ماتەماتيكا باعىتىندا وقىپ جۇرگەن وقۋشىلاردىڭ جايلى مەكتەپتە ءبىلىم الۋىنا سەپتەسۋ. ايتپەسە, قازىرگى مەكتەپتىڭ ءوزى دە, ينتەرناتى دا جاعا ۇستاتارلىقتاي. ول تۋرالى «Egemen Qazaqstan» گازەتىنە 2023 جىلدىڭ جەلتوقسانىندا تارقاتىپ جازعانبىز. ودان بەرى ەشقانداي وڭ وزگەرىس جوق. ءبىلىم باسقارماسى جولداعان بيىلعى جاۋاپقا ۇڭىلسەك, «BK ينۆەست كومپاني» مەردىگەر كومپانياسى جوبالاۋ جۇمىستارىن جالعاستىرىپ, ونى ەكسپەرتيزاعا كىرگىزۋگە دايىنداپ جاتىر. سونىمەن قاتار جەر ۋچاسكەسىن راسىمدەۋ جۇمىستارى دا قولعا الىنىپتى. الايدا قۇرىلىستىڭ ناقتى قاشان باستالىپ, قاشان اياقتالاتىنى جونىندە اقپارات جوق. سوعان قاراعاندا بولاشاق ينجەنەرلەر مەن تەحنيكا ءتىلىن بىلەتىن ماماندار جايلىلىقتان جۇرداي ينتەرناتتا تۇرىپ, قالتارىستاعى ءبىلىم وشاعىندا ءبىلىم الۋلارىن جالعاستىرا بەرمەك.
وسكەمەن
