سۋرەت: egov.kz
اتاۋلى الەۋمەتتىك كومەك 2019 جىلدان بەرى جان باسىنا شاققانداعى تابىسى كەدەيلىك شەگىنەن تومەن وتباسىلارعا بەرىلىپ كەلەدى. مەملەكەتتىك قولداۋدىڭ بۇل ءتۇرى مۇقتاج وتباسىلارعا جان-جاقتى قولداۋ كورسەتە وتىرىپ, تۇرمىسىن تۇزەپ, ەڭسە كوتەرىپ ەل قاتارىنا قوسىلىپ كەتۋىنە ىقپال ەتۋدى كوزدەيدى.
جۇمىسپەن قامتاماسىز ەتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ مالىمەتىنشە, بۇگىندە وبلىستا جالپى سانى 10247 ادام تۇراتىن 2356 وتباسى ااك الادى. باسقارما باسشىسىنىڭ ورىنباسارى ماكسيم ءۋستينوۆتىڭ ايتۋىنشا, اتالعان كومەك وتباسىنىڭ نەمەسە جەكە ادامنىڭ الەۋمەتتىك جاعدايىنا بايلانىستى شارتتى, شارتسىز بولىپ ەكى تۇرگە بولىنەدى. شارتسىز اقشالاي كومەك ەڭبەككە قابىلەتسىز, تابىسى تومەن ادامدارعا, وتباسىلارعا اي سايىنعى تولەم تۇرىندە بەرىلىپ تۇرادى. شارتتى اقشالاي كومەك ەڭبەككە قابىلەتتى جالعىزىلىكتى ادامدارعا, سونداي-اق مۇقتاج وتباسىلارعا بەرىلەدى. سوڭعى اتالعان ااك ءتۇرىن الاتىن ازاماتتىڭ جۇمىسقا ورنالاسۋىنا جەرگىلىكتى اكىمدىك جاردەمدەسەدى. وسىنداي كەشەندى كومەك شارالارىنىڭ ناتيجەسىندە, وتكەن جىلى ااك الاتىن 1687 وتباسى ەڭبەككە بەلسەندى ارالاسىپ, تۇرمىسىن تۇزەپ العان.
«بىلتىر ەڭبەككە قابىلەتتى 2299 ااك الۋشىنىڭ ىشىندە 1445 ادامنىڭ بىزگە جۇگىنگەن كەزدە ءوز جۇمىسى بولدى. 680 ادام كىسى كۇتىمىمەن وتىردى. 174 ازامات جۇمىسىمىز جوق دەپ كەلدى. الەۋمەتتىك كەلىسىم-شارت ناتيجەسىندە 530 ادام بەلسەندى ەڭبەككە تارتىلدى. ونىڭ 85,3 پايىزى, ياعني 452-ءسى تۇراقتى جۇمىسقا ورنالاستى», دەيدى م.ۋستينوۆ.
سالا مينيسترلىگى بيىلدان باستاپ ۋچاسكەلىك كوميسسيالاردىڭ جۇمىسىن تسيفرلاندىرۋدى جوسپارلاپ وتىر. قازىر كوميسسيا ااك تاعايىنداماس بۇرىن الدىمەن وتباسىنىڭ ماتەريالدىق جاعدايىن باعالاپ الىپ, ول مالىمەتتەردى قاعازعا حاتتايدى. وعان ءبىراز ۋاقىت كەتەدى. بۇل ۇدەرىستى اۆتوماتتاندىرىپ, وڭايلاتۋ ماقساتىندا قاڭتار ايىنان باستاپ «FSM Social» ءموبيلدى قوسىمشاسى ىسكە قوسىلماق. كوميسسيا مۇشەلەرى وسى قوسىمشا ارقىلى وتباسى تۋرالى مالىمەتتەردى ەنگىزىپ, قورىتىپ, ونى كوميسسيانىڭ باسقا مۇشەلەرىنە قول قويدىرۋعا جىبەرە الادى.
سونىمەن قاتار قاڭتاردىڭ بىرىنەن باستاپ الدىن الا كەلىسىم بويىنشا ااك الۋعا ۇمىتكەر ازاماتتىڭ بانكتەگى ەسەپشوتى, يپوتەكالىق نەسيەگە جاتپايتىن بانكتىك بورىشتارىنىڭ بار-جوعى تەكسەرىلەدى.
«ازاماتتار ااك الۋعا ءوتىنىش بەرگەن كەزدە جوعارىدا اتالعان جوباعا قاتىسۋعا كەلىسىمىن ءبىلدىرىپ, قولىن قويادى. ودان كەيىن وتباسىنىڭ كامەلەتكە تولعان مۇشەلەرىنە 1414 نومىرىنەن سمس حابارلاما كەلەدى. وعان ءبىر جۇمىس كۇنى ىشىندە جاۋاپ بەرىلۋ كەرەك. بۇل دەرەكتەر ءوتىنىش بەرۋشى كەلىسىم بەرگەندە عانا مەملەكەتتىك اقپاراتتىق جۇيەلەر ارقىلى جينالادى», دەيدى م.ۋستينوۆ.
قوستاناي وبلىسى
