سۋرەت: el.kz
سونىڭ ىشىندە ءوزىم ۇزاق جىل قىزمەت ەتكەن ءبىلىم سالاسىنا قاتىستى كەيبىر دەرەكتەردى ايتا كەتەيىن. ەل پرەزيدەنتى بيۋدجەتتىك قارجىنىڭ باسىم بولىگى مەكتەپتەر, ەمحانالار مەن ماڭىزدى ينفراقۇرىلىم نىساندارىن سالۋعا, وزگە دە الەۋمەتتىك مىندەتتەردى ورىنداۋعا جۇمسالاتىنىن جەتكىزدى.
«الەۋمەتتىك ينفراقۇرىلىمدى دامىتۋ ماسەلەسىنە دە باسا نازار اۋدارىلادى. اۋىلداعى دەنساۋلىق ساقتاۋ جۇيەسىن جاڭعىرتۋعا ارنالعان ۇلتتىق جوبانىڭ اياسىندا اۋىلدىق جەرلەردە مەديتسينا نىساندارىن سالۋ جۇمىستارى جالعاسادى. ەلىمىزدە 460 مىڭ وقۋشىعا ارنالعان 217 جايلى مەكتەپ سالۋ جوسپارلانعان. ونىڭ 105-ءىنىڭ قۇرىلىسى اياقتالدى. ماقساتىمىز – اپاتتى جاعدايداعى جانە ءۇش اۋىسىممەن وقىتاتىن مەكتەپتەر ماسەلەسىن, سونداي-اق مەكتەپتەگى ورىن تاپشىلىعىنا قاتىستى تۇيتكىلدەردى تولىعىمەن شەشۋ. ءبىر اي بۇرىن 2025–2027 جىلدارعا ارنالعان رەسپۋبليكالىق بيۋدجەت قابىلداندى. قۇجاتتا الەۋمەتتىك باعىت باستى باسىمدىق رەتىندە ساقتالدى. وندا دەنساۋلىق ساقتاۋ, ءبىلىم بەرۋ سالاسىنا جانە الەۋمەتتىك قاجەتتىلىكتەرگە وتە قوماقتى قارجى قاراستىرىلعان», دەدى پرەزيدەنت.
جىل سايىن بيۋدجەتتى جوسپارلاۋ, بيۋدجەتتىڭ ىسكە اسىرىلۋى جونىندە مينيسترلىكتەر جەكە-جەكە كەلىپ ەسەپ بەرگەندە, ءبىز اتا زاڭىمىزدا اتاپ ايتىلعانداي, «الەۋمەتتىك مەملەكەت» ەكەنىمىزگە كوزىمىز انىق جەتەدى. بۇل رەتتە 2024–2025 جىلى ءبىلىم بەرۋ سالاسىندا ناعىز سەرپىلىس بولعانىن, 460 مىڭ وقۋشىعا ەسەپتەلگەن 217 جاڭا جايلى مەكتەپتىڭ قۇرىلىسى جوسپارلانعانىن اتاپ ءوتۋ كەرەك. وسى اۋقىمدى جوبانى ىسكە اسىرۋ ءۇش اۋىسىمدا وقىتۋ, توزىعى جەتكەن مەكتەپتەر ماسەلەسىن تۇبەگەيلى شەشۋگە, سونداي-اق وقۋشىلار ورنى تاپشىلىعىن جويۋعا مۇمكىندىك بەرەدى. ءبىلىم بەرۋ ينفراقۇرىلىمىن دامىتۋدا قالاعا دا, اۋىلعا دا بىردەي كوڭىل ءبولىنىپ, ساپالى ورتا ءبىلىم الۋعا قولجەتىمدىلىكتى قامتاماسىز ەتەدى. قازىرگى ۋاقىتتا 254 مىڭ ورىنعا ارنالعان 105 جايلى مەكتەپتىڭ قۇرىلىسى اياقتالدى, ونىڭ 36-سى اۋىلدى جەرلەردە ورنالاسقان.
جالپى, مەملەكەت باسشىسىنىڭ جىل باسىندا ءدال وسىلاي تۇيتكىلدى ماسەلەلەردى قامتىپ سۇحبات بەرۋى جاقسى ۇردىسكە اينالىپ, تيىمدىلىگىن دالەلدەپ وتىر. كەڭ كولەمدى اڭگىمە بارىسىندا ىشكى ساياساتتىڭ الداعى جىلعا جوسپارلانعان نەگىزگى جۇمىستارى ايقىندالعان. بيلىكتىڭ ەلىمىزدى ودان ءارى دامىتۋعا قاتىستى ۇستانىپ وتىرعان ناقتى باعىت-باعدارى كورسەتىلگەن. اتقارۋشى مەملەكەتتىك ورگاندار مەن قوعام بىرلەسە جۇمىس ىستەسە, كوزدەلگەن جوسپارلار ءتيىمدى ناتيجە بەرەدى دەپ سانايمىز.
نۇرگۇل تاۋ,
ءماجىلىس دەپۋتاتى
