«رۋدنىي سوكولوۆ قۇرىلىس» كومپانياسى سالعان التى قابات ءۇيدى تاياۋدا قوستاناي قالاسىنىڭ اكىمدىگى ساتىپ العان.
«بۇل جولى اكىمدىك حالىقتىڭ ءالجۋاز توپتارى ءۇشىن شامامەن 5 ملرد تەڭگەگە 230 پاتەر ساتىپ الدى. سىزدەرگە تۇسىنىكتى بولۋ ءۇشىن مىناداي مىسال كەلتىرەيىن, ءبىز تۇرعىندارعا 2021–2023 جىلدار ارالىعىندا 267 جالدامالى پاتەر بەرىپپىز. ال 2024 جىلى, ياعني سوڭعى ءبىر جىلدىڭ وزىندە عانا 378 وتباسىن باسپانامەن قامتاماسىز ەتۋدىڭ ءساتى ءتۇسىپ وتىر. بۇل – وتە جاقسى كورسەتكىش. بىلتىردان باستاپ تۇرعىن ءۇيدى تىكەلەي قۇرىلىس كومپانياسىنىڭ وزىنەن ساتىپ الا باستادىق. ناتيجەسىندە باسپانا كەزەگى دە تەزىرەك جىلجي ءتۇستى», دەدى تۇرعىنداردى قۋانىشىمەن قۇتتىقتاي كەلگەن قالا باسشىسى مارات جۇندىباەۆ.
باسپانالى بولىپ, قۋانىشقا كەنەلىپ جاتقانداردىڭ ىشىندە كوپبالالى انالار دا بارشىلىق. مىسالى, ءۇش بولمەلى پاتەرگە قونىستانعان تىنىبەكوۆتەر وتباسى بۇعان دەيىن قالانىڭ ماڭىنداعى اۋىلدا پاتەر جالداپ تۇرىپتى.
ء«تورت جىلدان بەرى كەزەكتە تۇرىپ, وسى كۇندى تاعاتسىزدانا كۇتتىك. ءتورت بالا تاربيەلەپ وتىرمىز. جاڭا ءۇي بەرەتىن بولىپتى دەگەندى ەستىگەن بالالارىمىز بارىپ كەلەيىكشى دەپ مازا بەرمەگەن سوڭ, وتكەن اپتادا كەلىپ سىرتىنان كورىپ كەتتىك. بۇگىن, مىنە, كىلتىمىز قولىمىزدا. قالا باسشىلىعىنا, ءبىز سياقتى كوپبالالى وتباسىلارعا قامقورلىق تانىتىپ وتىرعان مەملەكەتىمىزگە العىسىمىز شەكسىز. ەلىمىز امان, ىرگەمىز تىنىش بولىپ, كوبەيە بەرەيىك», دەيدى ءتورت بالانىڭ اناسى ايمان تىنىبەكوۆا.
قازىر «بەرەكە» شاعىن اۋدانىنىڭ كوشەلەرى كەڭەيتىلىپ, اينالاسى اباتتاندىرىلىپ جاتىر. الداعى ۋاقىتتا بۇل شاعىن اۋداندى قوستانايدىڭ ورتالىعىمەن بايلانىستىراتىن توتە جول سالۋ جوسپاردا بار.
قوستاناي وبلىسى
