ايتا كەتەيىك, وتەگەن باتىر اۋىلىنداعى 400 ورىندىق مادەنيەت ءۇيىنىڭ قۇرىلىسى بىرنەشە جىلعا سوزىلىپ كەلەدى. 2022 جىلى باستالعان جوبا 2023 جىلدىڭ ماۋسىم ايىندا پايدالانۋعا بەرىلۋگە ءتيىس ەدى. الايدا بۇگىنگى تاڭدا جۇمىس تەك جارتىلاي عانا اياقتالعان. قۇرىلىستى اياقتاۋعا 800 ملن تەڭگەدەن استام قارجى جەتپەي وتىر. جوباعا جاۋاپتى تاراپتاردىڭ ارەكەتى مەن قارجىنىڭ دۇرىس يگەرىلمەۋى ءماجىلىس دەپۋتاتتارىنىڭ نازارىن اۋداردى.
ماكسيم ءروجيننىڭ ايتۋىنشا, جوبا باستاپقىدا دۇرىس جاسالماعان. كىرەبەرىس بولىگى قاتە جوسپارلانىپ, جەر ماسەلەسى بويىنشا دا داۋ تۋىنداعان. قۇرىلىسقا قاجەتتى قاراجات ۋاقىتىندا بولىنبەي, مەردىگەر ءوز قاراجاتىمەن جۇمىستى جالعاستىرعان. ناتيجەسىندە, قۇرىلىس ماتەريالدارى قىمباتتاپ كەتكەن.
«بۇل – ءوڭىردىڭ الەۋمەتتىك دامۋى ءۇشىن وتە ماڭىزدى جوبا. نىساننىڭ قۇنى 2,2 ملرد تەڭگە دەپ بەكىتىلگەن. قارجى كەزەڭ-كەزەڭىمەن ءبولىنىپ كەلەدى. دەگەنمەن, جۇمىس ءتيىستى دەڭگەيدە ورىندالماعان. 2023 جىلى پايدالانۋعا بەرىلۋى كەرەك ەدى, بىراق تەك جارتىسى عانا دايىن. قۇرىلىس توقتاپ تۇر. بۇل جەردە باقىلاۋدىڭ جەتكىلىكسىزدىگى انىق بايقالادى. حالىققا ۋادە بەرىلگەن بولسا, ونى ورىنداۋ – ءبىزدىڭ ورتاق مىندەتىمىز. ءبىز بۇل ماسەلەنى قاتاڭ باقىلاۋعا الامىز جانە بارلىق جاۋاپتى تاراپتاردان ناقتى ارەكەت تالاپ ەتەمىز», دەيدى دەپۋتات.
ىلە اۋداندىق قۇرىلىس ءبولىمىنىڭ باسشىسى ايدوس كۇنەسبايدىڭ مالىمەتىنشە, 2022 جىلى 150 ملن تەڭگە, 2023 جىلى 857 ملن تەڭگە بولىنگەن.
«بيىل 225 ملن تەڭگە ءبولىندى. قوسىمشا شىعىندارعا بايلانىستى 2023 جىلدىڭ ماۋسىم ايىندا تاعى 404 ملن تەڭگە بولىنگەن بولاتىن. سوعان قاراماستان, قۇرىلىس بەلگىلەنگەن مەرزىمدە اياقتالمادى. وتكەن جىلدىڭ ساۋىرىندە مەرزىمدى تاعى ۇزارتۋ تۋرالى كەلىسىم جاسالىپ, جوبانىڭ اياقتالۋ ۋاقىتى 2025 جىلدىڭ شىلدەسىنە شەگەرىلدى. قازىرگى تاڭدا قۇرىلىستى تولىق اياقتاۋ ءۇشىن قوسىمشا 805 ملن تەڭگە قاجەت», دەيدى ايدوس كۇنەسباي.
قازىرگى ۋاقىتتا قۇرىلىسقا قاجەتتى قارجىنى ءبولۋ ماسەلەسى الماتى وبلىسىنىڭ بيۋدجەت كوميسسياسىنا جولدانباقشى.
ايتا كەتۋ كەرەك, «AMANAT» پارتياسىنىڭ «حالىقپەن بىرگە!» سايلاۋالدى باعدارلاماسى اياسىندا 2027 جىلعا دەيىن وبلىستا 25 مادەنيەت ءۇيىنىڭ قۇرىلىسى مەن 27 مادەني نىساننىڭ ساپالى كۇردەلى جوندەۋ جۇمىستارى جوسپارلانعان. بيىل 9 مادەنيەت ءۇيىنىڭ قۇرىلىسى مەن 6 مادەنيەت ۇيىنە كۇردەلى جوندەۋ جۇمىستارى جۇرگىزىلگەن.
