ول ۇكىمەت جانىنان كوميسسيا قۇرىلعانىن, تەحنيكالىق جانە كاسىپتىك ءبىلىم بەرۋدى ترانسفورماتسيالاۋدىڭ جول كارتاسى قابىلدانعانىن, بارلىق 20 وڭىردە جۇمىسشى كاسىپتەرىنىڭ بەدەلىن جانە كادرلار دايارلاۋ ساپاسىن ارتتىرۋعا, جۇمىس بەرۋشىلەرمەن ءوزارا ءىس-قيمىلدى كۇشەيتۋگە باعىتتالعان جوسپارلار بەكىتىلگەنىن اتاپ ءوتتى. مينيستر سونىمەن قاتار وسى جۇمىس اياسىندا كاسىبي باعدار بەرۋدىڭ جاڭا تۇجىرىمداماسى ىسكە قوسىلاتىنىن ايتتى.
ول وسى باعىتتاعى جۇمىستى جۇيەلى دامىتۋ ءۇشىن وڭىرلەردىڭ كادرلارعا دەگەن قاجەتتىلىگىن ەسكەرە وتىرىپ, بارلىق وبلىستا «جاڭا ماماندىقتار اتلاسى» ازىرلەنەتىنىنە توقتالدى.
«كاسىپتىك باعدار بەرۋدىڭ جاڭا تاسىلدەرى وقۋشىلارعا ەڭبەك نارىعىنداعى جاڭا تالاپتار تۋرالى بىلۋگە, ەكونوميكانىڭ ناقتى سەكتورلارىنداعى مانساپ پەرسپەكتيۆالارىن باعالاۋعا جانە ماماندىقتاردى دۇرىس تاڭداۋعا مۇمكىندىك بەرەدى. بۇل ءۇشىن مەكتەپتەردەگى كاسىبي باعدارلاۋ قىزمەتى كۇشەيتىلەدى, وسى ارقىلى وقۋشىلاردى تولىعىمەن كاسىبي دياگنوستيكامەن قامتىلادى», دەپ اتاپ ءوتتى عاني بەيسەمباەۆ.
كاسىپورىندار مەن كوللەدجدەردىڭ ىنتىماقتاستىعى ارقىلى 1 مىڭ مەكتەپتە بەيىندىك سىنىپتار اشىلاتىنى اتاپ ءوتىلدى. جوعارى سىنىپ وقۋشىلارىن پراكتيكالىق داعدىلارعا جانە كوللەدجدەر بازاسىندا العاشقى جۇمىس كاسىبىنە وقىتۋ تاجىريبەسى ەنگىزىلەدى.
