سۋرەت: diapazon.kz
كوميتەتتىڭ مالىمدەۋىنشە, كاسىپكەرلىك قىزمەتكە قاتىسى بار كريتەريگە سايكەس كەلەتىن جەكە تۇلعالاردىڭ شوتىنداعى وپەراتسيالاردى ەكىنشى دەڭگەيلى بانكتەر باقىلاۋعا الۋعا ءتيىس. سونداي كريتەريدىڭ ءبىرى – ءۇش اي ىشىندە 100 جانە ودان دا كوپ, ءارتۇرلى تۇلعادان بيزنەسكە ارنالماعان جەكە شوتقا سوماسى 3 تومەنگى جالاقىدان اساتىن اۋدارىمداردىڭ كەلىپ ءتۇسۋى. بۇل – شامامەن 255 مىڭ تەڭگە.
«جاڭا ەرەجەگە سايكەس ەكىنشى دەڭگەيلى بانكتەر كىرىستەر ورگاندارىنا ءموبيلدى اۋدارىمدار تۋرالى اقپاراتتى كەزەڭ-كەزەڭىمەن ۇسىنىپ وتىرۋعا ءتيىس. 2025 جىلى جەكە كاسىپكەرلەر, زاڭدى تۇلعالار مەن ولاردىڭ جۇبايلارى باقىلاۋعا الىنادى. 2026 جىلى باسقا ازاماتتار دا تەكسەرىلە باستايدى», دەلىنەدى حابارلامادا.
ەلىمىزدە زاڭسىز كاسىپكەرلىك قىزمەتكە 15 ايلىق ەسەپتىك كورسەتكىش (اەك) كولەمىندە ايىپپۇل سالۋ قاراستىرىلعان. زاڭ بۇزۋشىلىق ەكىنشى رەت قايتالانسا, ايىپپۇل 30 اەك-كە دەيىن ۇلعايادى. بۇل – 117 960 تەڭگە. سالىق سالۋ وبەكتىلەرىن جاسىرىپ قالۋ تولەنبەگەن سالىقتاردىڭ 200%-ى مولشەرىندە ايىپپۇل سالۋعا اكەپ سوعادى. مەملەكەتتىك كىرىستەر كوميتەتى وكىلدەرىنىڭ ايتۋىنشا, بۇل شارالار سالىق تولەۋدەن جالتارۋ ارەكەتتەرىن ازايتىپ, ەلدە بيزنەستى جۇرگىزۋگە ءادىل مۇمكىندىك قالىپتاستىرادى.
ايتا كەتەيىك, تاۋارلار مەن قىزمەتتەردى ۇسىنعانى ءۇشىن اقىسىن ءموبيلدى اۋدارىم رەتىندە جەكە شوتقا اۋدارتۋ كولەڭكەلى كاسىپ سانالادى. ونداي تولەمدەر ءۇشىن سالىق ۇستالمايدى, سالدارىنان قازىنا تۇسۋگە ءتيىس ميللياردتاعان قاراجاتتان قاعىلادى. سول ءۇشىن ەلدە تاۋارلار مەن قىزمەتتەر اقىسىن ارنايى كاسسالىق اپپارات, QR-كود نەمەسە POS-تەرمينال ارقىلى تولەۋ مىندەتتەلىپ وتىر.
مەملەكەتتىك كىرىستەر كوميتەتىنىڭ حابارلاۋىنشا, باستاپقىدا كاسىپكەرلەر دە, تۇتىنۋشىلار دا مۇنداي قاتاڭ تارتىپكە ۇيرەنىسە العان جوق. دەگەنمەن كەيىنگى ۋاقىتتا بۇعان بىرتىندەپ بەيىمدەلىپ كەلە جاتقاندارى بايقالادى. بۇل ءوز كەزەگىندە كىشى, شاعىن جانە ورتا بيزنەستەن تۇسەتىن سالىق ءتۇسىمىن مولايتۋعا سەپتەسەدى. الايدا كوميتەت اتالعان سۋبەكتىلەردەن تۇسكەن سالىق ءتۇسىمى سوماسىن جاريا ەتپەدى.
