فوتو: gov.kz
سپورت كەشەنىنىڭ اشىلۋىنا باتىس قازاقستان وبلىسىنىڭ اكىمى ناريمان تورەعاليەۆ, قر سپورت جانە تۋريزم ءمينيسترى ەربول مىرزابوسىنوۆ, «قازمۇنايگاز» ۇك اق باسقارما توراعاسى اسحات حاسەنوۆ, «BI Group» حولدينگىنىڭ باس ديرەكتورى اسحات وماروۆ, سپورت ارداگەرلەرى مەن سپورتشىلار, قالا تۇرعىندارى قاتىستى.
باتىس قازاقستان وبلىسىنىڭ اكىمى ناريمان تورەعاليەۆ سپورت كەشەنى مەملەكەت باسشىسىنىڭ تاپسىرماسى اياسىندا سالىنىپ, وڭىردەگى بۇقارالىق سپورتتى دامىتۋعا سەپتىگىن تيگىزەتىنىن اتاپ ءوتتى.
«پرەزيدەنتىمىز ۇلت دەنساۋلىعىن نىعايتۋ جولىندا بۇقارالىق سپورتتى دامىتۋدى جانە تۇرعىندارىمىزدىڭ سپورتپەن ەركىن شۇعىلدانۋىنا بارىنشا جاعداي جاساۋ قاجەتتىگىن اتاپ وتكەن. وسى رەتتە, اشىلىپ وتىرعان زاماناۋي سپورت كەشەنى - الداعى ۋاقىتتا ءوڭىر تۇرعىندارىنىڭ, اسىرەسە جاستاردىڭ سپورتپەن شۇعىلدانۋىنا تاپتىرماس ورىن بولادى», دەدى وبلىس اكىمى.
«ورالداعى جاڭا سپورتتىق-ساۋىقتىرۋ كەشەنى بولاشاق چەمپيونداردى تاربيەلەيتىن ورتالىق عانا ەمەس, سونداي-اق تۇرعىندار سپورتپەن شۇعىلدانا الاتىن ورىنعا اينالماق. «قازمۇنايگاز» الەۋمەتتىك جاۋاپتى كومپانيا رەتىندە ءوز قىزمەتىن جۇرگىزەتىن وڭىرلەرىندە الەۋمەتتىك جوبالار, سونىڭ ىشىندە مەكتەپتەر, بالاباقشالار, مەديتسينالىق مەكەمەلەر مەن سپورتتىق-مادەني نىساندار سالۋ بويىنشا جۇمىستى بەلسەندى جۇزەگە اسىرىپ كەلەدى. بۇل باعىتتاعى جۇمىس ازاماتتاردىڭ ءومىر ءسۇرۋ ساپاسىن ارتتىرۋ ماقساتىندا جالعاسىن تابادى», دەدى قمگ باسشىسى اسحات حاسەنوۆ.
جاڭا سپورت عيماراتىندا ۆولەيبول, باسكەتبول, فۋتزال, قول دوبى, بوكس, گرەك-ريم جانە ەركىن كۇرەس, دزيۋدو, ساداق اتۋ, ۇستەل تەننيسى, ءجۇزۋ, شىڭعا ورمەلەۋ سىندى سپورت تۇرلەرىمەن شۇعىلدانۋ ءۇشىن بارلىق جاعداي جاسالعان.
ء«بىز وتە قۋانىشتىمىز. وسىنداي زاماناۋي سپورت كەشەنى اشىلدى. ەندى جاتتىعۋلارىمىزدى تەك وسىندا وتكىزەمىز. كەڭ ءارى ىڭعايلى عيمارات. جاستارعا قولداۋ ءبىلدىرىپ وتىرعان پرەزيدەنتىمىزگە شىنايى العىسىمىزدى بىلدىرەمىز», دەدى جاس سپورتشى ابزال ماراتوۆ.
بقو اكىمدىگى 2025 جىلى تاعى 10 نىساندى سالۋ جوسپارلانىپ وتىرعانىن ءمالىم ەتتى.
