ساحنادا لۋدومانيا, ناشاقورلىق جانە وتباسىلىق قاتىناستاردىڭ بۇزىلۋى سياقتى ماسەلەلەر كوتەرىلدى. كەيىپكەرلەردىڭ تاعدىرى, ولاردىڭ جازا باسىپ, ورنى تولماس وكىنىشتى جاعدايعا ۇرىنىپ, وپىق جەپ قالۋى كورەرمەنگە ۇلكەن وي سالادى. وتباسى بەرەكەسىنىڭ قاشۋى, اكە مەن ۇلدىڭ, انا مەن قىزدىڭ, اعايىندى باۋىرلاردىڭ اراسىنداعى ءوزارا سىي-قۇرمەتتىڭ جوعالۋى ءتۇرلى ويعا جەتەلەپ, كوڭىلگە قاياۋ تۇسىرەدى. ءبىر تۋعان باۋىرلار اتا-انالارى كەنەتتەن دۇنيە سالعاننان كەيىن عانا بارىپ ەس جيىپ, وتكەن ومىرلەرىن قايتا تارازىلاي باستايدى. الايدا ۋىستان شىعىپ كەتكەن مۇمكىندىكتى, ءوتىپ كەتكەن ۋاقىتتى كەرى قايتارا المايسىڭ.
«قويىلىم جۇرەك تەبىرەنتەدى. ساحنادا دراما مەن تراگەديا قاتار ءوربيدى. اكتەرلەردىڭ ساحنانى ەركىن يگەرۋى, ءوزى سومداعان وبرازدى وتە نانىمدى ويناپ شىققانى قايران قالدىردى. بىلايشا جاي كۇندەرى كۇندە كورىپ جۇرگەن قاراپايىم ادامداردىڭ بويىندا وسىنداي ۇلكەن قابىلەت جاسىرىنىپ جاتاتىنىن بۇرىن بىلمەپپىن. ساحناداعى قىم-قۋىت وقيعالاردىڭ ءبارى كوز الدىمدا ءوتىپ جاتقانداي اسەر قالدىرادى. قويىلىم ءومىردىڭ وتكىنشى, ۋاقىتتىڭ جۇيرىك ەكەنىن ەسكە سالادى. سوندىقتان تىرىسىندە اتا-اناڭنىڭ قادىرىنە جەتىپ, جاقىن باۋىرلارىڭدى قۇرمەتتەي بىلۋگە ۇيرەتەدى», دەيدى كورەرمەندەردىڭ ءبىرى.
قويىلىمدى ساحنالاعان كاسىبي ماماندار ەمەس, قاراپايىم اۋىل ازاماتتارى. ولاردىڭ ىشىندە مۇعالىمدەر, دارىگەرلەر, مەملەكەتتىك قىزمەتشىلەر, وقۋشىلار بار.
«شابىت» تەاترىنىڭ جەتەكشىسى نۇرجامال قۇلتاەۆانىڭ ايتۋىنشا, تەاتر ترۋپپاسى ەندى اۋدانعا قاراستى اۋىلداردى ارالاپ, گاسترولگە شىعۋدى ويلاستىرىپ جاتىر.
«تەاتر قۇرۋ يدەياسى 2015 جىلى, ونەر مەكتەبىندە اكتەرلىك شەبەرلىكتەن ساباق بەرە باستاعان كەزدە تۋدى. سودان 2023 جىلى اۋدان اكىمدىگىنىڭ كومەگىمەن تەاتر قۇرىپ, ونى «شابىت» دەپ اتادىق. وسى قىسقا ۋاقىتتىڭ ىشىندە جەتكەن جەتىستىگىمىز ءوزىمىزدىڭ شىعارماشىلىق ۇجىمنىڭ بىرلەسكەن ەڭبەگىنىڭ جانە جەرگىلىكتى اكىمشىلىكتىڭ ۇلكەن قولداۋىنىڭ ناتيجەسى دەپ بىلەمىن», دەيدى تەاتر جەتەكشىسى.
«ساداعاڭ كەتەيىن» سپەكتاكلىنە اۋدان باسشىلارى, وبلىس كوركەمونەرپازدارىنىڭ حالىق شىعارماشىلىعى ورتالىعىنىڭ وكىلدەرى دە كەلدى. جالپى, حالىقتىڭ كوڭىلىنەن شىققان قويىلىم, شەنەۋنىكتەرگە دە قاتتى ۇناسا كەرەك. اتالعان قويىلىم قاڭتار ايىندا وبلىس ورتالىعىندا ساحنالاناتىن بولدى.
قوستاناي وبلىسى
