«كەزدەسۋدى قورىتىندىلاي كەلە, قالا دامۋىنىڭ نەگىزگى باعىتتارىنا توقتالايىن. ءبىرىنشىسى - قالانىڭ قاۋىپسىزدىگى. ول ءۇشىن قوعامدىق ءتارتىپتى قامتاماسىز ەتۋدە ورناتىلاتىن كامەرا سانى 585-كە, جول قاۋىپسىزدىگى ءۇشىن «سەرگەك» كامەراسىنىڭ سانى 136-عا جەتكىزىلەدى. ەكىنشىسى - قالا تۇرعىندارىن تۇرعىن ۇيمەن, جىلۋمەن, ەلەكترمەن, سۋمەن, گازبەن, ساپالى جولمەن قامتاماسىز ەتۋ, سونداي-اق اۋرۋحانا, مەكتەپ, مادەنيەت جانە سپورت وبەكتىلەرىن سالۋ, سول ارقىلى قولايلى قالا قۇرۋ. ءۇشىنشىسى - ادەمى ءارى جاسىل قالا. بۇل اۋلا مەن ۆوركاۋت الاڭدارىن, ساياباقتاردى, سكۆەرلەردى اباتتاندىرۋ, كوشەلەردى جارىقتاندىرۋ, كوپ قاباتتى ۇيلەردىڭ قاسبەتتەرى مەن شاتىرلارىن جوندەۋ. ەكونوميكانى جۇيەلى دامىتۋدىڭ وسىنداي شارالارىنىڭ بارلىعى ءبىرىنشى كەزەكتە پرەزيدەنتتىڭ تاپسىرمالارىنا سايكەس حالىقتىڭ ءومىر ءسۇرۋ ساپاسىن جاقسارتۋعا باعىتتالعان», دەپ اتاپ ءوتتى ب. يساباەۆ.
11 ايدىڭ قورىتىندىسى بويىنشا تالدىقورعاننىڭ الەۋمەتتىك-ەكونوميكالىق دامۋ ناتيجەلەرىنە ەگجەي-تەگجەيلى توقتالىپ, وبلىس ورتالىعىن كوركەيتۋدىڭ الداعى جوسپارلارى جايلى ايتقان ءوڭىر باسشىسى تۇرعىنداردى تولعاندىرعان سۇراقتارعا جاۋاپ بەردى.
ءۇش ساعاتتىق كەزدەسۋ بارىسىندا وبلىس اكىمىنە 60-قا جۋىق سۇراق قويىلدى. قالالىقتار نەگىزىنەن تۇرعىن ءۇي-كوممۋنالدىق سالا, الەۋمەتتىك جانە جول ينفراقۇرىلىمىن دامىتۋ, قاۋىپسىزدىكتى قامتاماسىز ەتۋ, ياعني جاڭا 9-شى شاعىن اۋداندا پوليتسيانىڭ تىرەك پۋنكتىن ورناتۋ, سول سياقتى شاعىن جانە ورتا بيزنەسكە, ومارتا شارۋاشىلىعىنا قولداۋ كورسەتۋ, جاڭا شاعىن اۋدانداردا اتى جوق كوشەلەرگە اتاۋ بەرۋ, قالا سىرتىندا كوتەرمە ساۋدا بازارىن قۇرۋ, قوعامدىق كولىكتىڭ جۇمىسى جانە باسقا دا ماسەلەلەردى كوتەردى. قالادا ەرەكشە قاجەتتىلىگى بار بالالاردى وڭالتۋعا جاسالعان جاعدايلار ءۇشىن العىس بىلدىرگەن تۇرعىندار دا بولدى.
كەزدەسۋ قورىتىندىسىندا سۇراقتاردىڭ بارىنە جاۋاپ بەرىلدى, تۇرعىنداردىڭ ءوز سۇراۋلارىن جازباشا تۇردە جولداۋىنا دا مۇمكىندىك جاسالدى. جيىندا بىرقاتار وزەكتى ماسەلەلەر بويىنشا جاۋاپتى تۇلعالارعا تاپسىرما بەرىلدى.
اتاپ وتسەك, وبلىس اكىمىنىڭ قالالىقتارمەن وتكەن جىلعى كەزدەسۋىندە تۇرعىندار كوتەرگەن 36 ماسەلەنىڭ 26-سى قازىرگى ۋاقىتتا شەشىلدى. قالعان 10 سۇراق بويىنشا جۇمىستار اتقارىلىپ جاتىر.
