قالانىڭ سولتۇستىك شەتىندە ورنالاسقان اۋداندا نەگىزىنەن جاس وتباسىلار تۇرىپ جاتىر. جاڭا بوبەكجاي بۇعان دەيىن جاقىن ماڭايدا بالاباقشا بولماعاندىقتان, تاڭ اتپاي بالالارىن قالانىڭ ورتالىعىنا, ەكىنشى ءبىر شەتىنە تاسىپ ابىگەر بولىپ كەلگەن جۇمىسباستى اتا-انالاردىڭ قولىن ۇزارتىپ وتىر.
«بالاباقشانىڭ اشىلۋىن تاعاتسىزدانا كۇتتىك. ۇيگە جاقىن, بالاعا دا, بىزگە دە وتە ىڭعايلى. ەڭ باستىسى, ەل – امان, جۇرت – تىنىش. مەملەكەتىمىز اتا-انالارعا, بالالارعا بارىنشا قامقورلىق كورسەتىپ جاتىر. ونى كورىپ-ءبىلىپ, سەزىنىپ وتىرمىز. وسىدان ءبىراز جىل بۇرىن ءۇيسىز ەدىك, ءۇي بەردى, ودان كەيىن ءۇيدىڭ جانىنان مەكتەپ سالىپ بەردى. ەندى, مىنە, بۇگىن بالامىزدى بالاباقشاعا الىپ كەلدىك», دەيدى «يۋبيلەينىي» شاعىن اۋدانىنىڭ تۇرعىنى راۋشان يمانقۇلوۆا.
بالاباقشانىڭ قۇرىلىسىنا 1,7 ميلليارد تەڭگە قارجى جۇمسالعان. مۇندا 2 جاستان 5 جاسقا دەيىنگى بالالارعا ارنالعان قازاق, ورىس ءتىلدى 15 توپ جۇمىس ىستەيدى. ءۇش قاباتتى, ەكى قاناتتى زاماناۋي بالاباقشا قازىرگى تالاپقا ساي, قاجەت دۇنيەنىڭ بارىمەن جابدىقتالعان. بالالاردىڭ جان-جاقتى دامۋىنا قاۋىپسىز ءارى جايلى جاعداي جاسالعان. جاتىن بولمەلەرى جايلى, ويىن بولمەلەرى كەڭ. حورەوگرافيا, گيمناستيكا, مۋزىكا, سپورت زالدارى بار. پەداگوگ-پسيحولوگ, لوگوپەد ماماندار جۇمىس ىستەيتىن ارنايى بولمەلەر, قوسىمشا ءبىلىم بەرۋ كابينەتتەرى, دارىگەرلىك ەم-شارا جۇرگىزەتىن جەكە كابينەت قاراستىرىلعان.
بالاباقشانىڭ اشىلۋ راسىمىنە ارنايى كەلگەن وبلىس اكىمى قۇمار اقساقالوۆ شاعىن اۋدان تۇرعىندارىن قۇتتىقتاپ, بالاباقشانى ارالاپ شىقتى.
«وبلىستىڭ الەۋمەتتىك ساياساتىنىڭ باستى مىندەتتەرىنىڭ ءبىرى – مەكتەپكە دەيىنگى ءبىلىم بەرۋدىڭ ساپاسىن ارتتىرۋ. ەرتە جاستان باستاپ مەكتەپ جاسىنا دەيىنگى بالالاردىڭ ءىت-قۇزىرەتتەرىن قالىپتاستىرۋ ءۇشىن مۇندا يننوۆاتسيالىق STEAM-زەرتحاناسى بار «تسيفرلىق بالاباقشا» جۇيەسى ەنگىزىلەتىن بولادى. بالالار روبوتوتەحنيكامەن اينالىسادى, ەكسپەريمەنتتەر مەن تاجىريبەلەر جاساي الادى. انيماتسيا ستۋدياسىندا ءوز قيالىمەن مۋلتفيلم جاسايدى, سونداي-اق كۆادروكوپتەر جۇرگىزە الادى. «يۋبيلەينىي» شاعىن اۋدانىندا اشىلعان جاڭا نىسان وبلىس ورتالىعىنداعى بالاباقشا كەزەگىن 18%-عا تومەندەتۋگە مۇمكىندىك بەرەدى. مۇندا 43 تاربيەشى, تاربيەدەن تىس مىندەتتەردى اتقاراتىن 34 ادام جۇمىس ىستەيدى», دەدى اكىم.
بۇگىندە وڭىردە بالاعا مەكتەپكە دەيىنگى ءبىلىم بەرەتىن 485 مەكەمە بار. وبلىس كولەمىندە بالاباقشاعا باراتىن بالالاردىڭ سانى شامامەن 32 مىڭنان اسادى. ال قوستاناي قالاسىنداعى 74 بالاباقشاعا 11 مىڭنان اسا بالا بارىپ ءجۇر.
بيىلدىڭ وزىندە رۋدنىي, ارقالىق قالالارىندا, قوستاناي, اۋليەكول, جانگەلدين اۋداندارىندا جاڭا بالاباقشالار اشىلدى. بۇل بوبەكجايلار بۇگىندە 760 بالاعا مەكتەپكە دەيىنگى ءبىلىم بەرىپ جاتىر.
قوستاناي وبلىسى
