ءىس-شارانى QyzPU رەكتورى, پرەزيدەنت جانىنداعى ايەلدەر ىستەرى مەن وتباسىلىق-دەموگرافيالىق ساياسات جونىندەگى ۇلتتىق كوميسسيا مۇشەسى گۇلميرا قاناي اشتى. كونفەرەنتسيا تاقىرىبىنىڭ وزەكتىلىگىن ايتا وتىرىپ, رەكتور بيىل 50 جىل تولىپ وتىرعان پسيحولوگيا كافەدراسىنىڭ ماڭىزىنا توقتالىپ ءوتتى.
جيىن بارىسىندا ۇعا اكادەميگى زارەما شاۋكەنوۆا:
«بۇگىنگى كۇنى «پسيحولوگيا» قوعام ءۇشىن اسا ماڭىزدى جانە وزەكتى ماماندىققا اينالىپ وتىر. اسىرەسە, بىلىكتى مامانداردى دايارلاۋ ەرەكشە نازار اۋدارۋدى قاجەت ەتەدى. وتكەن جىلى «امانات» پارتياسى حالىققا پسيحولوگيالىق كومەك كورسەتۋدىڭ ءتيىمدى ينستيتۋتىن قۇرۋ ماسەلەسىنە ەرەكشە نازار اۋداردى. جىل بويى قازاق ۇلتتىق قىزدار پەداگوگيكالىق ۋنيۆەرسيتەتىنىڭ پسيحولوگيا كافەدراسىنىڭ قولداۋىمەن وسى باعىتتا بەلسەندى جۇمىستار ىستەلىپ كەلەدى. كونفەرەنتسياعا ەلىمىزدەن, سونداي-اق ەستونيا, قىرعىزستان جانە تۇركيا ەلدەرىنەن قاتىسقان ماماندار بالا تاربيەسى مەن اتا-انالارمەن جۇمىس ىستەۋ سالاسىنداعى تاجىريبەسىمەن ء بولىسۋى, سالادا تۋىنداپ وتىرعان بىرقاتار ماسەلەلەردىڭ الدىن الۋعا, شەشىمىن تابۋعا ىقپال ەتەدى. ءىس-شارا ستۋدەنتتەر ءۇشىن دە پايدالى اقپاراتقا تولى ءارى بولاشاق مامان يەلەرى ءۇشىن مازمۇندى تاجىريبە الاڭى بولىپ وتىر» دەپ اتاپ ءوتتى.
قازاق ۇلتتىق قىزدار پەداگوگيكالىق ۋنيۆەرسيتەتىنىڭ پروفەسسورى, پسيحولوگيا عىلىمدارىنىڭ دوكتورى حورلان شەريازدانوۆا ۋنيۆەرسيتەتتىڭ پسيحولوگيا كافەدراسىنىڭ وتباسى پسيحولوگياسىن دامىتۋعا قوسقان ۇلەسى مەن تاريحىنا توقتالدى.
«مەن پسيحولوگيا كافەدراسىندا قىزمەت ەتىپ كەلە جاتقانىما 45 جىل بولدى. پسيحولوگيا ماماندىعى ۋنيۆەرسيتەتتىڭ ءبىلىم بەرۋ جۇيەسىنە 1997 جىلى قوسىلدى. سول ۋاقىتتان بەرى جوعارى بىلىكتى پسيحولوگ ماماندارىن دايارلاپ كەلەدى. پسيحولوگيا ماماندارىنىڭ ءوز كاسىبىنە دەگەن سۇيىسپەنشىلىگىن ارتتىرۋعا, سونداي-اق ەلىمىز ءۇشىن جوعارى دارەجەلى مامانداردى دايارلاۋعا ءوز ۇلەسىمىزدى قوستىق. پسيحولوگيا كافەدراسى 50 جىل ىشىندە ماڭىزدى جۇمىستار اتقاردى. كوپتەگەن مەملەكەتتىك جوبالارعا قاتىسىپ, ولاردى ءبىلىم بەرۋ جۇيەسىنە ەنگىزدىك. بۇل جەتىستىكتەر كافەدرانىڭ كاسىبي شەبەرلىگى مەن ۇجىمدىق ەڭبەگىنىڭ ناتيجەسى» دەيدى حورلان شەريازدانوۆا.
حالىقارالىق عىلىمي-تاجىريبەلىك كونفەرەنتسيادا ەلىمىزگە بەلگىلى عالىمدار جانە شەتەلدىك ساراپشىلار, مەملەكەتتىك ورگاندار مەن ازاماتتىق قوعام وكىلدەرى قاتىسىپ, وتباسىلىق زورلىق-زومبىلىقتىڭ وزەكتى ماسەلەلەرىن, سەبەپتەرى مەن سالدارىن, الدىن الۋ ادىستەرىن تالقىلادى.
بۇل شارا وتباسىلىق زورلىق-زومبىلىق ماسەلەسىن تەوريالىق تۇرعىدان تالقىلاپ, ونى شەشۋدىڭ زاماناۋي ادىستەرىن تاجىريبەلىك دەڭگەيدە قاراستىرۋعا باعىتتالدى. كونفەرەنتسيا حالىقارالىق تاجىريبە الماسۋ مەن قاۋىپسىز ورتا قۇرۋعا, داعدارىستىق جاعدايلاردىڭ الدىن الۋعا جانە ساپالى پسيحولوگيالىق كومەك جۇيەسىن دامىتۋدى ماقسات ەتەدى.
الماتى
