سۋرەتتى تۇسىرگەن – ەرلان ومار, «EQ»
وسىنى ەلەپ-ەسكەرگەن جەرگىلىكتى اكىمدىك اقمولانىڭ اۋداندارىندا تۇراقتى ءتۋريزمدى دامىتۋعا كوپ كوڭىل ءبولىپ كەلەدى. حالىقارالىق تۋريستىك ۇيىمدار, ساراپشىلار دا ءتۋريزمنىڭ ءدال وسى باعىتىن دامىتىپ تابىسقا كەنەلۋگە بولاتىنىن ايتادى. وعان ارينە, كورىكتى, تاريحي ورىندارعا توتە اپاراتىن ينفراقۇرىلىم, جايلى جاتىن ورىن, قاۋىپسىز ورتا, سودان سوڭ جارناما قاجەت. وسىنىڭ بارلىعىن ۇيلەستىرەر كەزدە, تۇراقتى ءتۋريزمنىڭ تالابىنا ساي, ساياحاتتىڭ قورشاعان ورتاعا, مادەنيەت ورىندارىنا, دەستيناتسيالارعا زالالى تيمەيتىنىنە كوز جەتكىزگەن دۇرىس.
ءتۋريزمنىڭ بايىپتى ءبىر باعىتى – جەرگىلىكتى حالىق كيە تۇتقان ەلدى مەكەندەردى ارالاۋ. دارقان دالامىزدا كونەدەن قالعان اۋليەلى جەرلەر, جادىگەرلەر كوپ. سول مەكەندەرگە بايلانىستى اڭىز-اڭگىمە, جىر-داستان دا جەتەرلىك. كوپشىلىك بىلە بەرمەۋى مۇمكىن, ءبىر كوكشەتاۋدىڭ ءوزى تاريحي مۇرالارعا سونشالىقتى باي. بىراق ارحەولوگيالىق نۇكتەلەرى ازىرگە بارشاعا ەسىگىن ايقارا اشقان جوق. ءساتى تۇسكەندە ولار دا كوپتىڭ يگىلىگىنە ۇسىنىلادى. اقمولا وبلىسىنىڭ تۋريزم سالاسىنداعى ارتىقشىلىعى, باسىم باعىتتارى تۋرالى وبلىس اكىمىنىڭ ورىنباسارى ەرنار جاركەشوۆ:
– اقمولا – كولەمى جاعىنان ەلدەگى ءىرى وبلىستاردىڭ ءبىرى. ايماقتا تارتىمدى تۋريستىك باعىتتار بارشىلىق. مىسالى, «قورعالجىن قورىعى» مەملەكەتتىك ۇلتتىق تابيعي پاركى. قورىققا كۇلگىن فلامينگونى تاماشالاۋعا باراتىندار سانى وتە كوپ. قورعالجىن اۋدانى جاعىنان ەلدەگى ءىرى قورىقتاردىڭ قاتارىندا. قازىر پارك جان-جاقتى دامىپ, كوركەيىپ كەلەدى. مەملەكەتتىك ماڭىزى بار جوبالار ىسكە اسىپ جاتىر. تاعى ءبىر ايتا كەتەر جايت, ءبىز وڭىردەگى قاي ولكەنى دامىتساق تا, ونداعى تابيعات بايلىعىن, سالت-ءداستۇرىن, تاريحي مۇراسىن ساقتاپ قالۋدى قاپەردە ۇستايمىز. سول ورايدا پاركتەردە ەلەكتروموبيلدەردى قولدانۋ ماسەلەسىن ويلاستىرىپ جاتىرمىز. بۋرابايدا 5, 4 جۇلدىزدى قوناقۇيلەر بار. ۇزىن سانى 3000 جاتىن ورنى قاراستىرىلعان. ۇلتتىق پارك اۋماعىندا 30 ەكسكۋرسيالىق مارشرۋت بەلگىلەنگەن. ونىڭ ىشىندە تاۋعا شىعۋ, اتپەن سەرۋەندەۋ, جاياۋ سەرۋەندەۋ بولىپ جالعاسا بەرەدى, – دەيدى.
كوكشەتاۋدان بولەك, وبلىستاعى زەرەندى, ساندىقتاۋ, قورعالجىن, ەرەيمەنتاۋ, اقكول اۋداندارىنىڭ تاڭعاجايىپ تابيعاتىن جۇرتشىلىق تالماي تاماشالاپ كەلەدى. دەگەنمەن بۇگىندە تۋريستەردى تەك تابيعاتى كوركەم ولكەلەرمەن عانا قىزىقتىرۋ قيىن. سوندىقتان وڭىرمەن تىكەلەي بايلانىستى تاريحي ورىنداردى, قۇندى دەرەكتەردى دۇرىس ناسيحاتتاپ, ۇسىنا ءبىلۋ قاجەت. قازىر پرەزيدەنت قاسىم-جومارت توقاەۆتىڭ تاپسىرماسىمەن نەگىزگى تۋريزم ايماقتارىن دامىتۋعا كوپ كوڭىل ءبولىنىپ جاتىر. ارنايى جوبا ازىرلەنگەن. بيۋدجەتتەن قارجى قارالادى. مۇنىڭ بارلىعى تۋريزم سالاسىن, سوعان قاتىستى ينفراقۇرىلىمدى, لوگيستيكانى جان-جاقتى دامىتۋعا مۇمكىندىك بەرەدى.
جالپى, اقمولا وبلىسىن تۇتاس الار بولساق, ءتۋريزمنىڭ باسقا دا باعىتتارىن جانداندىرۋعا مۇمكىندىك بار. كۇندەلىكتى كۇيبەڭ تىرشىلىكتەن شارشاعاندا, قالا ماڭىنداعى كەيبىر اۋىلدارعا بىرنەشە كۇنگە بارىپ, دەمالۋعا بولادى. وتباسىلىق دەمالىسقا قولايلى ورىندار جەتكىلىكتى. قىسقاسى, تۋريستەرگە كوركىمەن دە, تاريحىمەن دە تارتىمدى جەرلەر از ەمەس.
