باتىس قازاقستانداعى ەكى اۋىل كوشىرىلەتىن بولدى

ورال. 17 ماۋسىم. باتىسقازاقستانداعى «قاراشىعاناق» كەن ورنىنىڭ سانيتارلىق قورعاۋ ايماعىن ۇلعايتۋ جونىندەگى شارالار بەلگىلەندى. قازاقستاننىڭ باس مەملەكەتتىك سانيتارلىق دارىگەرى جانداربەك بەكشين وسىنداي مازمۇنداعى قۇجاتقا قول قويدى. ونىڭ ناقتى ءىس-قيمىل جاساۋ ۋاقىتى 2018 جىلدىڭ 1 قاڭتارىنا سايكەس كەلەدى. بۇل تۋرالى egemen.kz ءتىلشىسى حابارلادى. سانيتارلىق قورعاۋ ايماعىنىڭ ءوسۋى №2 گازدى كەشەندى تۇردە وندەۋ ورتالىعىنىڭ قۋاتىن جاڭعىرتۋ قاجەتتىلىگىنەن تۋىندادى. بۇل جونىندەگى ۇكىمەت قاۋلىسى ءسال كەيىن قابىلدانادى دەپ كۇتىلۋدە. جاڭا ايماق ىسكە قوسىلعان كەزگە دەيىن وسى ماڭايداعى بەستاۋ جانە بەرەزوۆكا اۋىلدارىن كوشىرۋ كوزدەلگەن. ونىڭ ۋاقىتى الداعى 2017 جىلدىڭ جەلتوقسان ايىنا جوسپارلانعان. بۇل جونىندە ءبورلى اۋدانى اكىمىنىڭ ورىنباسارى قايرات وتەگەنوۆ: «اتالعان اۋىل تۇرعىندارىمەن ەرتەرەك كەزدەسىپ, ءبىر ۇيعارىمعا كەلۋدى ويلاستىرىپ وتىرمىز. ويتكەنى, ءبىز ءۇشىن ولاردىڭ ۇسىنىستارىن ءبىلۋ وتە ماڭىزدى. الداعى كوشى-قون جايىنىڭ بارلىق ماسەلەلەرى وسى كەزدەسۋدە ورتاعا سالىنادى», – دەدى. وسى ارادا 2015 جىلدىڭ 8 مامىرى كۇنى پرەمەر-ءمينيستردىڭ ورىنباسارى بەردىبەك ساپارباەۆ باتىس قازاقستان وبلىسىنىڭ بەرەزوۆكا اۋىلىندا قالىپتاسقان كۇردەلى جاعدايعا قاتىستى ءماجىلىس وتكىزگەنىن ايتا كەتكەن ءجون. وندا ۆيتسە-پرەمەر «قاراشىعاناق» كەن ورنىنىڭ سانيتارلىق قورعاۋ ايماعىن ۇلعايتۋ قاجەتتىگىن, سوعان ساي اۋىل تۇرعىندارى كوشىرىلۋى كەرەكتىگىن اتاپ كورسەتتى. تەمىر قۇسايىن. دەرەك: egemen.kz. سۋرەت: khabar.kz.