استانا. 17 ماۋسىم. قىزىلوردا وبلىسى قازالى اۋدانىنىڭ تۋماسى, ۇلى وتان سوعىسىنىڭ ارداگەرى شاريف ابدۋللين 95 جاسقا تولدى. مايدانگەردىڭ ۇيىنە مەرەيتويىمەن قۇتتىقتاۋ ءۇشىن قازالى اۋدانىنىڭ اكىمى باحىت جاحانوۆ ارنايى باردى. بۇل تۋرالى egemen.kz حابارلادى.
شاريف ابدۋللين بۇگىندە بايقوڭىر قالاسىنداعى بالاسىنىڭ قولىندا تۇرادى. اتالعان قالاعا جەڭىستىڭ 70 جىلدىعىمەن جانە مەرەيتويىمەن قۇتتىقتاپ بارعان باحىت جاحانوۆ ارداگەرگە وبلىس اكىمى قىرىمبەك كوشەرباەۆتىڭ قۇتتىقتاۋ حاتىن تابىس ەتتى. وندا: «ەل مۇددەسى جولىنداعى ەسەلى ەڭبەگىڭىزدىڭ زەينەتىن كورىپ, ءاردايىم ارامىزدا اقىلشى اعا, ارداقتى ازامات, ابىرويلى اقساقال بولىپ امان-ەسەن جۇرە بەرىڭىز», – دەلىنگەن.
سونىمەن قاتار, اۋدان باسشىسى جىل بويى وڭىردە اتقارىلعان جۇمىستاردى ايتىپ, الداعى ۋاقىتتا اتقارىلار جوسپارلارىمەن ءبولىستى.
جەڭىس كۇنىن جاقىنداتۋعا ۇلەس قوسقان مەرەيتوي يەسى عاسىرعا جۋىق عۇمىرىندا تالاي اسۋدان مۇقالماي ءوتىپ, ەڭبەك مايدانىندا قىزمەت ەتكەن. ارداگەر اۋداندا اتقارىلىپ جاتقان جۇمىستاردى قولدايتىنىن ايتىپ, اق باتاسىن بەردى.
تالعات رايىمبەك.
دەرەك, سۋرەت: egemen.kz.
