باتىس قازاقستان جولدارىنىڭ 27,8 پايىزى عانا قاۋىپسىز

ورال. 17 ماۋسىم. باتىس قازاقستان وبلىسىندا جول-كولىك وقيعاسى كوبەيىپ بارادى. مۇنىڭ باستى سەبەبىنىڭ ءبىرى – وي-شۇڭقىرى كوپ جولدار بولىپ وتىر. بۇل تۋرالى وبلىستىق ىشكى ىستەر دەپارتامەنتىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. اتالعان دەپارتامەنتتىڭ اكىمشىلىك پوليتسيا باسقارماسى باستىعىنىڭ ورىنباسارى ساكەن ءحايرۋلليننىڭ ايتۋىنشا, كولىك اپاتىنىڭ كوبەيۋىنە تاعى ءبىر سەبەپ – وڭىردەگى اۆتوموبيلدەر سانىنىڭ ءوسۋى. ونىڭ سانى 2010 جىلدان بەرى 47,1 پايىزعا كوتەرىلگەن. ال 2015 جىلدىڭ بەس ايىندا 8,9 مىڭ اۆتوموبيل ەسەپكە قويىلعان. سونداي-اق, ورال ارقىلى وتەتىن ترانزيتتىك كولىك تاسقىنى دا ۇلعايعان. الداعى ۋاقىتتا 1 ملن. 100 مىڭ اۆتوكولىك ورال جولدارى ۇستىمەن وتەدى دەپ كۇتىلۋدە. باقىلاۋ مەن تەكسەرۋ ناتيجەلەرى بويىنشا, وبلىستىق ماڭىزى بار جولداردىڭ 27,8 پايىزى عانا بەلگىلەنگەن قاۋىپسىزدىك نورمالارىنا سايكەس ەكەندىگى انىقتالدى. كوپ جەرلەردە قوسىمشا جول بەلگىلەرى, ارنايى جولاقتار جانە باعدارشامدار قويىلماعان. سوعان بايلانىستى جول-كولىك ەرەجەلەرىن بۇزۋشىلاردىڭ سانى دا ارتۋدا. ودان بولەك, الكوگولدىك ىشىمدىك ءىشىپ كولىك جۇرگىزەتىندەردىڭ سانى 3,6 پايىزعا كوبىرەك ۇستالعان. بۇل رەتتە جول-كولىك وقيعاسى سالدارىنان قازا تاپقاندار سانىنىڭ 8 پايىزعا قىسقارعانى عانا كوڭىلگە مەدەۋ. تەمىر قۇسايىن. دەرەك: egemen.kz. سۋرەت: aif.ru.