ءىس-شارا اياسىندا 2027-2030 جىلدارعا ارنالعان قازاقستاننىڭ عىلىمي جانە تەحنولوگيالىق دامۋىنىڭ باسىم باعىتتارىن تالقىلاۋ جانە ۇعا تاراپىنان جۇرگىزىلگەن فورسايت-زەرتتەۋلەردىڭ ناتيجەلەرى جاريالاندى.
فورۋم عىلىم سالاسىن دامىتۋداعى فورسايتتىق زەرتتەۋلەرگە قاتىستى ماسەلەلەردى تالقىلاۋ ماقساتىندا ۇيىمداستىرىلعانىن اتاپ وتكەن ۇعا پرەزيدەنتى اقىلبەك كۇرىشباەۆ:
«قازىرگى تاڭدا عىلىمي-تەحنولوگيالىق فورسايت بولاشاقتاعى عىلىمي جانە تەحنولوگيالىق ۇردىستەردى بولجاۋ مەن تالداۋعا نەگىزدەلىپ وتىر. ول اعىمداعى جەتىستىكتەردى باعالاۋدى, پەرسپەكتيۆالىق باعىتتاردى انىقتاۋدى جانە ولاردى جۇزەگە اسىرۋ ستراتەگيالارىن ازىرلەۋدى قامتيدى. فورسايت ۇكىمەتكە, كومپانيالارعا جانە عىلىمي ۇيىمدارعا دايەكتى شەشىمدەر قابىلداۋعا, عىلىم مەن تەحنولوگياعا ۇزاق مەرزىمدى ينۆەستيتسيا تارتۋدى جوسپارلاۋعا كومەكتەسەدى. فورسايت جۇرگىزۋ ءۇشىن اقپاراتتىق, كوممۋنيكاتسيالىق جانە عارىشتىق تەحنولوگيالار; ءومىر جانە دەنساۋلىق تۋرالى عىلىم; اگروونەركاسىپتىك كەشەندى تۇراقتى دامىتۋ جانە اۋىل شارۋاشىلىعى ونىمدەرىنىڭ قاۋىپسىزدىگى; سۋ رەسۋرستارىن, جانۋارلار مەن وسىمدىكتەر دۇنيەسىن ۇتىمدى پايدالانۋ, ەكولوگيا; گەولوگيا, پايدالى قازبالاردى ءوندىرۋ جانە قايتا وڭدەۋ, جاڭا ماتەريالدار, تەحنولوگيالار; ەنەرگەتيكا جانە ماشينا جاساۋ سالالارى تاڭدالدى. الداعى ۋاقىتتا فورسايتتىق زەرتتەۋلەرمەن باسقا دا باعىتتار قامتىلاتىن بولادى. اكادەميا 30 فورسايت-سەسسيا وتكىزىپ, 1100-دەن استام سۇحبات جۇرگىزدى. بۇل 200-دەن استام پەرسپەكتيۆالىق عىلىمي مىندەتتەردى ايقىنداۋعا مۇمكىندىك بەرىپ وتىر» دەپ اتاپ ءوتتى.
وسىلايشا فورسايتتىق زەرتتەۋلەر جاڭاشا وي قالىپتاستىرۋ مەن بولاشاقتى جوبالاۋدىڭ قۇرالىنا اينالىپ وتىر. ەلىمىزدە بيىل قابىلدانعان «عىلىم جانە تەحنولوگيالىق ساياسات تۋرالى» زاڭنىڭ نەگىزىندە فورسايتتىق زەرتتەۋلەر جۇرگىزۋ فۋنكتسياسى ۇلتتىق عىلىم اكادەمياسىنىڭ قۇزىرىنا بەرىلگەن.
فورۋم قاتىسۋشىلارىنا جولداعان قۇتتىقتاۋ سوزىندە عىلىم جانە جوعارى ءبىلىم ءمينيسترى ساياسات نۇربەك عىلىمدى دامىتۋدىڭ ماڭىزىن, ەلىمىزدىڭ باسەكەگە قابىلەتتى الەۋەتىن ارتتىرۋ ءۇشىن تۇيتكىلدى ماسەلەلەردى تالقىلاۋ, ستارتەگيالاردى انىقتاۋدىڭ ءرولى تۋرالى اتاپ وتسە, اۋىل شارۋاشىلىعى ۆيتسە-ءمينيسترى باعلان بەكباۋوۆ اگرارلىق عىلىمنىڭ ەل دامۋىنداعى رولىنە توقتالىپ, بىرلەسكەن جۇمىستاردىڭ ناتيجەسىنە سەنىم ءبىلدىردى.
دەنساۋلىق ساقتاۋ ۆيتسە-ءمينيسترى تيمۋر مۇراتوۆ مۇرات ۇلى مەديتسينالىق عىلىم ماسەلەسىنە توقتالدى. وسى ورايدا مەديتسينالىق عىلىمدى قارجىلاندىرۋ, عىلىمي ينفراقۇرىلىمدى جەتىلدىرۋ مەن كادر دايارلاۋدىڭ ماڭىزىن اتاپ ءوتتى.
ۇلتتىق عىلىم اكادەمياسى 2023 جىلى پرە-فورسايت بويىنشا دايىندىق جۇمىستارىن جۇرگىزىپ, الدىڭعى زەرتتەۋلەرگە تالداۋ جۇرگىزە وتىرىپ, عىلىمي-يننوۆاتسيالىق ەكوجۇيەگە شولۋ جاسادى. بيىل قازاقستان ءۇشىن باسىم 6 باعىت بويىنشا عىلىمنىڭ فورسايتى باستالىپ, ونىڭ قورىتىندى ناتيجەلەرى جاريالاندى.
زەرتتەۋلەرمەن كەڭىنەن قامتۋ ماقساتىندا ۇلتتىق عىلىم اكادەمياسى كەلەسى جىلى فورسايتينگتىڭ وڭىرلىك جەلىسىن قۇرۋدى جوسپارلاپ وتىر. بيىل س.امانجولوۆ اتىنداعى شىعىس قازاقستان ۋنيۆەرسيتەتىنىڭ بازاسىندا العاشقى فورسايت ورتالىعى اشىلدى. كەلەسى جىلى ءىرى وڭىرلىك ۋنيۆەرسيتەتتەر بازاسىندا تاعى 7 فورسايت ورتالىق اشۋ جوسپارلانىپ وتىر.
كەلەسi جىلدان باستاپ ۇعا وسى باعىتتاعى الەمدiك جەتەكشi ينستيتۋتتاردىڭ بiرi - كورەي عىلىمي-تەحنيكالىق اقپارات ينستيتۋتىمەن (KISTI) فورسايتتىڭ اقپاراتتىق-تالدامالىق جۇيەسiن قۇرۋ جونiندەگi بiرلەسكەن جوبا iسكە اسىرادى. KISTI - وڭتۇستىك كورەياداعى عىلىمي-تەحنيكالىق اقپاراتتى جيناۋمەن, تالداۋمەن جانە تاراتۋمەن اينالىساتىن جەتەكشى عىلىمي-زەرتتەۋ ينستيتۋتى.
فورۋمدا كورەي عىلىمي-تەحنيكالىق اقپارات ينستيتۋتى مەن ۇلتتىق عىلىم اكادەمياسى فورسايتتىڭ اقپاراتتىق-تالدامالىق جۇيەسىن قۇرۋ جونىندەگى مەموراندۋمعا قول قويدى.
فورۋمدا ەلىمىز, سونداي-اق شەتەلدەردەن قاتىسقان عالىمدار ءوز تاجىريبەسىمەن ءبولىسىپ, عىلىمي ىقپالداستىق تۋرالى پىكىرلەرىن ورتاعا سالدى.
