فوتو: freepik.com
بۇل تۋرالى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا قر وكم گەولوگيا كوميتەتىنىڭ توراعاسى ەرلان اقباروۆ مالىمدەدى.
«گەولوگيا سالاسىن اۆتوماتتاندىرۋ ماقساتىندا جەر قويناۋىن پايدالانۋدىڭ بىرىڭعاي پلاتفورماسىن قۇرۋ بويىنشا جۇمىستار جۇرگىزىلىپ جاتىر. سونىمەن قاتار, فينليانديا گەوپورتالىنىڭ مودەلى نەگىزگە الىندى. ينتەراكتيۆتى كارتا ازىرلەندى, 66 مىڭنان استام گەولوگيالىق ەسەپتەر ورنالاستىرىلدى جانە جەر قويناۋىن پايدالانۋشىلاردىڭ ەسەپتىلىگىن ەلەكتروندى تۇردە بەرۋ فۋنكتسياسى اۆتوماتتاندىرىلدى», دەدى كوميتەت توراعاسى.
ەرلان اقباروۆ ءمالىم ەتكەندەي, قازاقستاننىڭ گەولوگيالىق سالاسىن دامىتۋ تۇجىرىمداماسى اياسىندا جەر قويناۋىن مەملەكەتتىك گەولوگيالىق زەرتتەۋدىڭ تيىمدىلىگىن ارتتىرۋ, ونىڭ ىشىندە جەر قويناۋىن زەرتتەۋ تاسىلدەرىن قايتا قاراۋ شارالارى جۇزەگە اسىرىلىپ جاتىر. ءاربىر اۋدان ءۇشىن الدىمەن انوماليالاردى انىقتاۋ ءۇشىن سپەكترلىك تالداۋ ادىستەرىن قولدانا وتىرىپ, جەردى قاشىقتىقتان زوندتاۋدى جۇرگىزۋ ۇسىنىلادى. كەلەسى كەزەڭدە انىقتالعان پەرسپەكتيۆالاردى ساپالى راستاۋ ءۇشىن سىنامالاردى ىرىكتەۋ جانە زەرتحانالىق تالداۋ ارقىلى جەرۇستى بارلاۋ جۇمىستارىن جۇرگىزۋ ۇسىنىلادى. بۇل رەتتە جەر قويناۋىن زەردەلەۋدىڭ ءاربىر كەزەڭىنىڭ ناتيجەلەرى بويىنشا مەملەكەت شىعىندارىن ەسكەرە وتىرىپ, قول قويۋ بونۋسىنىڭ باستاپقى مولشەرىن بەلگىلەي وتىرىپ, اۋكتسيون وتكىزۋ ۇسىنىلادى.
سپيكەر 2018 جىلدان 2024 جىلعا دەيىنگى كەزەڭدە جەر قويناۋىن پايدالانۋشىلارعا گەولوگيالىق ءتۇسىرۋ جانە گەوفيزيكالىق جۇمىستاردى جۇرگىزۋ ماقساتىندا جەر قويناۋىن گەولوگيالىق زەرتتەۋگە 302 ليتسەنزيا بەرىلگەنىن اتاپ ءوتتى. زەرتتەۋگە جۇمسالعان شىعىنداردىڭ جالپى قۇنى 32 ملرد تەڭگەدەن استى. قازىرگى ۋاقىتتا جەر قويناۋىن گەولوگيالىق زەرتتەۋگە ليتسەنزيا بەرۋ پروتسەسى ەلەكتروندىق فورماتتا جۇزەگە اسىرىلىپ جاتىر.
سونداي-اق ەرلان اقباروۆ گەولوگيالىق دەرەكتەردى تسيفرلاندىرۋ اياسىندا جاساندى ينتەللەكت پەن اقپاراتتى وڭدەۋدىڭ يننوۆاتسيالىق ادىستەرىن قولدانۋ جوسپارلانىپ وتىرعانىن اتاپ ءوتتى.
