ەلباسى تۇركيا پرەزيدەنتىنە كوڭىل ايتۋ جەدەلحاتىن جولدادى

استانا. 17 ماۋسىم. مەملەكەت باسشىسى تۇركيانىڭ توعىزىنشى پرەزيدەنتى سۇلەيمەن دەميرەلدىڭ قايتىس بولۋىنا بايلانىستى تۇركيا رەسپۋبليكاسىنىڭ پرەزيدەنتى رەجەپ تايىپ ەردوعانعا كوڭىل ايتۋ جەدەلحاتىن جولدادى. بۇل تۋرالى akorda.kz حابارلادى. قازاقستان پرەزيدەنتىنىڭ كوڭىل ايتۋ جەدەلحاتىندا تۇرىك حالقىنىڭ عانا ەمەس, بارشا تۇركى الەمىنىڭ ماقتانىشى بولعان, دۇنيەجۇزىلىك دەڭگەيدە كەڭىنەن تانىمال ساياسي جانە مەملەكەت قايراتكەرىنىڭ ومىردەن وزعانى تۋرالى حاباردى زور كۇيزەلىسپەن قابىلداعانى اتاپ وتىلگەن. «مەن سۇلەيمەن دەميرەلدى ادال ءارى سەنىمدى دوس رەتىندە قۇرمەت تۇتتىم. ءبىز ءجيى كەزدەسىپ, پىكىر الماسىپ وتىردىق, كوپتەگەن يگى باستامالارعا جول اشتىق. قازاقستان حالقى ونى پاراساتتى باسشى, كەمەڭگەر كوسەم, قازاقستان مەن تۇركيا اراسىنداعى باۋىرلاستىق قارىم-قاتىناستارعا زور ەڭبەك سىڭىرگەن تاريحي قايراتكەرلەر قاتارىنداعى كورنەكتى تۇلعا رەتىندە ءاردايىم ەستە ساقتايدى», – دەلىنگەن جەدەلحاتتا. نۇرسۇلتان نازارباەۆ بارشا قازاقستاندىقتاردىڭ, سونداي-اق, جەكە ءوزىنىڭ اتىنان رەجەپ ەردوعانعا جانە بۇكىل تۇركيا حالقىنا شىن نيەتپەن كوڭىل ايتتى. ەلامان قوڭىر. دەرەك, سۋرەت: akorda.kz.