باقىت قۇسى بەرەكە-بىرلىكتە ەكەنىن “سامۇرىق” ۇلت تەاترى ءوز قويىلىمىنا وزەك ەتكەن

ءسىزدىڭ دە, مەنىڭ دە, جالپى ءبارىمىزدىڭ دە كورشىلەرىمىز بار. وسىناۋ اياق-تاباعى ارالاسىپ, قىسىلساڭ قاسىڭنان تابىلار, قۋانساڭ بىرگە تويلار كور­شى­لەرىمىزدىڭ اراسىندا قاي ەتنوستىڭ دا وكىلدەرى كەزدەسەدى. بۇل –كادىمگى قازاقستاندىق قالىپ. ال وسىنى ساحنادان تامشالاعان قانداي. “سامۇرىق” ۇلت تەاترى كو­رەرمەنمەن قاۋىشتىرعان جازۋ­شى-دراماتۋرگ دۋلات يسا­بەك­وۆ­تىڭ “باقىت قۇسى” اتتى لي­ريكالىق دراماسىنىڭ نەگىزگى وزەگى – وسى كورشىلەر. ءبىر مەم­لەكەتتىڭ ازاماتتارىنىڭ ورتاق تاعدىرى مەن بىرلىگى جاراسقان تىرلىگى. قاراپ وتىرىپ ءوزىڭنىڭ كور­شىلەرىڭدى, تانىستارىڭدى تاباسىڭ. ويىما ماسكەۋدەگى قۇربىم الەنانىڭ: “جولىڭ ءتۇسىپ  جاتسا, قازى مەن شۇجىق الا كەلۋدى ۇمىتپاشى”, دەگەنى جانە ونىڭ اناسى نەلليا گريگو­رە­ۆ­نا­نىڭ جىل سايىن قازاقستانعا ءبىر كەلىپ قايتۋعا اسىعاتىنى, ءتىپتى بىردە كەتەرىندە ارنايى ۇن الىپ, بارعان سوڭ بالالارعا ەلدىڭ ۇنىنان نان ءپىسىرىپ بەرەمىن, ءبىزدىڭ ۇننىڭ ءدامى ەرەكشە عوي, ءشىر­كىن, دەگەن سوزدەرى ويىما ورال­دى. وسىدان الدەنەشە جىل بۇرىن ءبىر كورشىمىز جازدا اناسىن الىپ, رەسەيدە تۇراتىن تۋىس­تا­رىنا كەتكەن. قىدىرىپ اۋناپ-قۋناپ اسىقپاي جاتامىز دەگەن كور­شىلەرىمىز اراعا 15 كۇن سالىپ قايتا ورالدى. سويتسە, العاشىندا تۋىستارىن كورىپ, كوڭىلى وسكەن كەيۋانانىڭ از كۇننەن كەيىن مازاسى كەتە باستايدى. تابەتى جوق, اس باتپايدى. سودان بۇل كىسىنىڭ ءسۇت  قاتقان ءشاي ىشكىسى كەلگەن شىعار دەپ ونى باپتاپ بەرسە دە بولماپتى. امال جوق ءبىراز بولامىز دەگەن تۋىستار جينالا باستايدى. امان-ەسەن ۇيلەرىنە جەتىپ, اس بولمەگە كىرگەندە قابىرعادا ءىلۋلى تۇرعان راديوقابىلداعىشتان دومبى­را­مەن ءان ايتىلىپ جاتىر ەكەن. كوز جانارى جاسقا تولعان كەيۋانا: “وسى عوي ماعان جەتپەگەنى”,– دەپ وتىرا كەتىپتى. جەر جانناتى جەتىسۋدىڭ ال­تىن القاسى – ارۋ الماتى قالا­سى­نىڭ تۇرعىندارى. قارا­پايىم كورشىلەر. پالەنباي جىل ءباتي­مامەن (عازيزا ابدىنابيەۆا, م.اۋەزوۆ اتىنداعى تەاتردىڭ اكتريساسى) كورشى تۇرعان ۆاسيلي ماكارىچ (سەرگەي پوپوۆ, م. لەرمونتوۆ اتىنداعى ورىس دراما تەاترىنىڭ ءارتىسى) رە­سەيگە كوشە­مىن دەيدى. ماكا­رىچتىڭ ءوزى دە, نەمەرەسى سۋساننا دا (ۆيكتوريا كۋ­درياۆتسەۆا, ت. جۇرگەنوۆ اتىن­داعى ونەر اكادەمياسىنان) ەلدى قيمايدى. سۋساننا ءباتيما اپاسىنا كەلىپ, مەن كەتپەيمىن, ءسىزدىڭ ۇيدە قالايىنشى, دەگەن. ماكارىچتىڭ بالاسى گريگوري ەمە­ليانوۆتىڭ (ەۆگەني جۋ­ما­نوۆ, ن.ساتس اتىنداعى جاستار تەاترىنىڭ ءارتىسى) رەسەيدە بيزنەسى بار. وقيعا ءورىسى وسىنىڭ نەگىزىندە جۇرەدى. ەلدەن ءبىر كەتىپ, قايتا ورالعان نەمىس كورشىلەر, ءباتيما مەن ماكارىچ وتباسى­لارى اياق تاباعى ارالاسىپ كەتكەن كور­شىلەر. ەندەشە, بىرەۋىنىڭ ىرگە ايىرامىز دەگەنىنە ەكىنشىسىنىڭ جانى اۋىرادى, قيماستىق سەزىم بويلارىن كەرنەيدى. ءباتيما اۋزىمەن ايتىلعان “باقىت قۇسى” تۋرالى اڭىز ادام­دار­دى تۇسىنىستىك پەن ۇعى­نىس­تىققا, كەلىسىم مەن ىمىراعا, باۋىرمالدىق پەن ادامگەرشىلىككە شاقىرادى. باقىت قۇسى كەيدە جەكە ادامنىڭ, كەيدە تۇتاس حا­لىق­تىڭ باسىنا قونادى ەكەن. تەك ونى ۇركىتىپ, ۇشىرىپ جىبەرۋدىڭ قاۋىپتى ەكەنىن ايتادى. ال جاس بۋىن وكىلدەرى سۋساننا مەن بەكتۇر (جانداربەك سادىرباەۆ, م. اۋەزوۆ اتىنداعى اكادە­ميا­لىق تەاتردىڭ ءارتىسى)  باقىت قۇسىن ەلىمىزگە قوندىرامىز, ونى ۇشىرىپ المايمىز دەگەن سەنىمدە. اتا-انانىڭ اق باتاسىن جا­راتۋشى يەنىڭ دە قولدايتىنىن وسى قويىلىمنان كورەسىز  (قويۋ­شى رەجيسسەر نۇرقانات جاقىپ­باەۆ). ءباتيمانىڭ كومەگىمەن كىشكەنتاي قازاق قىزىن باۋى­رىنا باسقان كورەي وتباسىنىڭ يننا دەپ ات بەرگەن قىزدارىن قازاق ەتىپ تاربيەلەگەنى, بالا­لاردىڭ كىش­كەن­تاي كەزىندە بەكتۇر مەن ين­نانى قوسامىز دەگەن باتا­لا­رى­نىڭ جۇزەگە  اسقانىن دا كورەسىز. ەلدى قاسيەتتەۋدى, جەردى قاسيەت­تەۋدى سپەكتاكلدىڭ ءون بويىنان تاباسىز. دومبىرا – قازاقتىڭ جانى. قانشا اكەسىنىڭ قيماس دوسى بولسا دا, وزگە ەلگە  كوشىپ بارا جاتقان كورشىسىنە كوز جۇمعان اكەسىنىڭ دومبىراسىن بەكتۇر تارتۋ ەتكەندە, اپىراي قالاي بولدى دەپ قينالعان تۇس بولعانىن نەسىن جاسىرايىق. بىراق, دومبىرا ەلدە. كورشى كوشپەيمىن دەدى. ويتكەنى, ونىڭ وتانى وسىندا! ارتىستەردىڭ قۇرامىنان باي­قالىپ وتىرعانداي, سپەكتاكلگە ەلىمىزدىڭ بىرنەشە ۇلتتىق تەاتر­لا­رىنىڭ ارتىستەرى قاتىسادى. ساحنانىڭ ءوزى كۇندەلىكتى ءتىر­شى­لىگىمىزدىڭ وزىنە اينالىپ كەت­كەندەي. قاي-قايسىسى دا وزدەرىنىڭ سالتىن ۇستاپ, اندەرىن ايتادى, بىراق ولاردىڭ ءبارىن بىرىكتىرەتىن ءبىر كۇش بار. ول –وتان. دومبىراعا قوسىلىپ ءان سالادى, قازاق ەلىنىڭ ءانۇرانىن كەۋدەلەرىنە قولدارىن قويىپ تۇرىپ شىرقايدى. مىنە, بۇل – وتان قۇدىرەتى. وسىلايشا تۇساۋىن “باقىت قۇسىمەن” اشقان جاڭا تەاترعا شىعارماشىلىق تابىس تىلەيىك. انار تولەۋحانقىزى.