پرەزيدەنت ءسوزىنىڭ ايقىن ءبىر دالەلى رەتىندە رۋدنىي قالاسىندا 8-11 سىنىپ وقۋشىلارى اراسىندا وتكەن «بەيىمبەت وقۋلارىن» ايتۋعا بولادى. كورنەكتى قالامگەردىڭ 130 جىلدىعىنا ورايلاستىرىلعان ءبىلىم جارىسىنا قارجى ءبولىپ, ۇيىمداستىرعان استانا قالاسىنداعى «Qazaqstan Construction Holding» سەرىكتەستىگى ەكەنىن دە ايتا كەتۋ كەرەك. بايقاۋدىڭ اشىلۋ راسىمىندە بۇعان ايرىقشا توقتالىپ وتكەن قالالىق ءبىلىم ءبولىمىنىڭ باسشىسى تەمىرحان جايلىباەۆ: «بۇگىندە رۋدنىيدا ءۇش قازاق مەكتەبى, قالادان 60 شاقىرىم جەردەگى قاشار كەنتىندە تاعى ءبىر قازاق مەكتەبى بار. قالعان جەتەۋى – ارالاس مەكتەپ. كەيبىر ارالاس مەكتەپتەردە قازاق سىنىپتارى باسىم. بۇل – كەلەشەكتە رۋدنىيدا قازاق مەكتەپتەرىنىڭ كوبەيە تۇسەتىنىن كورسەتىپ وتىر. وبلىس كولەمىندە جاسوسپىرىمدەردى كوركەم كىتاپ وقۋعا ىنتالاندىراتىن جاقسى جوبالار ءجۇرىپ جاتىر. الايدا «بەيىمبەت وقۋلارىنىڭ» ءجونى بولەك. ءبىز ءىرى كاسىپورىنداردى شاقىرىپ كەلتىرە الماي جۇرگەندە, «QC Holding» كومپانياسى مەكتەپكە ءوزى كەلىپ بۇگىنگى ونەگەلى ءىس-شاراعا مۇرىندىق بولىپ وتىر. كىتاپقا قۇرمەت كورسەتىپ وتىرعان كومپانيا باسشىلارىنا بۇكىل قالا وقۋشىلارىنىڭ اتىنان شىنايى العىس بىلدىرەمىز», دەدى.
اتالعان سەرىكتەستىك قازىر رۋدنىي قالاسىندا 4 ءۇي سالىپ جاتىر. كومپانيا باسشىلىعى ەسكى كەڭەس داۋىرىنەن قالعان كوشە اتاۋلارىن وزگەرتۋگە ق ۇلىقسىز قالاداعى جاڭا تۇرعىن ءۇي كەشەندەرىنە ء«اليحان», «احمەت», «ايات», «توبىل» دەگەن اتاۋ بەرۋدى ۇيعارىپ وتىرعانى دا قۋانتارلىق جايت.
بالالاردىڭ كىتاپقا سۇيىسپەنشىلىگىن ارتتىرۋدى كوزدەپ وتىرعان قۇرىلىس كومپانياسىنىڭ «QC Read» جوباسىن اقىن ابىلاي ماۋدانوۆ ۇيلەستىرىپ, باستان-اياق ۇيىمداستىرىپ ءجۇردى. ايتۋىنشا, «بەيىمبەت وقۋلارى» رۋدنىيدان بۇرىن ماڭعىستاۋ وبلىسىنىڭ مۇنايلى اۋدانىندا وتكەن. وعان 163 بالا قاتىسىپ, «شۇعانىڭ بەلگىسى», «تۇيەباي», «داۋدىڭ باسى دايرابايدىڭ كوك سيىرى», «تالاق», «اجە», «قارا شەلەك», «ايت كۇندەرى», «كۇلپاش» سىندى 8 شىعارما بويىنشا تەست تاپسىرىپ, جوعارى ۇپاي العان وقۋشىلار جەرەبە ارقىلى ەسسە جازعان.
«مەنى تاڭعالدىرعانى ءارى قۋانتقانى, وقۋشىلاردىڭ بەيىمبەت مۇراسىنا ازات, جاڭاشا كوزبەن قاراپ, تالداپ, باعا بەرە العانى. مۇنايلى اۋدانىندا «شۇعانىڭ بەلگىسى» تاقىرىبىنا 47 وقۋشى ەسسە جازدى. «ادام كۇرەسۋ ءۇشىن تۋعان. شۇعانىڭ قاتەلىگى – ماحابباتى ءۇشىن كۇرەسپەگەنى. بۇل سىن ابدىراحمانعا دا لايىق. ەكەۋى سوڭىنا دەيىن باقىت ءۇشىن كۇرەسكەندە, ماقساتقا جەتەر ەدى. بەيىمبەت مايلين بىزگە وسى ويدى جەتكىزدى» دەپ تاپسىرلەدى كەيبىر قاتىسۋشىلار. «بار كىنا ەسىمبەكتە. ول ءوز بايلىعى جەكتىلىكتى بولا تۇرا, ودان ءارى باي ءتۇسۋدى كوزدەدى. ونداي تويىمسىزدار بۇگىنگى قوعامدا دا بار. بايلىقتىڭ تۇبىنە جەتكەن ەشكىم جوق. اۋەلى, ادام تاعدىرى, بالانىڭ باقىتى ءبىرىنشى ورىندا تۇرۋى ءتيىس. ول بولماعان جەردە ءبارى قۇردىمعا كەتەدى. بيلىك, بايلىقتى كوكسەگەن ەسىمبەك اقىرى قۇداسىز قالدى, قىزىنان دا ايرىلدى. بۇل اششى مىسالدان ادامدار ساباق الۋ كەرەك» دەگەن وقۋشىلار دا بولدى», دەيدى ابىلاي ماۋدانوۆ.
بەيىمبەت مايلين اتىنداعى جەتىنشى مەكتەپ-گيمنازيا 2010 جىلى «100 مەكتەپ» باعدارلاماسى اياسىندا اشىلعان. قازىر 1 127 بالا مەملەكەتتىك تىلدە ءبىلىم الىپ جاتىر. 2019 جىلى ءبىلىم ورداسىنا بەيىمبەت مايلين ەسىمى بەرىلدى. مەكتەپتە بەيىمبەتتانۋ كابينەتى جۇمىس ىستەيدى. مەكتەپ ديرەكتورى قىمبات ءبىرمانوۆانىڭ ايتۋىنشا, مۇندا 1-سىنىپتان 11-سىنىپقا دەيىنگى بالالارعا فاكۋلتاتيۆ ساباقتارى وتەدى. بي-اعا مەكتەبى – قازاقستان يۋنەسكو كلۋبتارى فەدەراتسياسىنىڭ مۇشەسى. قازىر وسى كلۋب اياسىندا ءوتىپ جاتقان بۋك ترەيلەر بويىنشا وقۋشىلار بەيىمبەت شىعارمالارىن وقىپ جاتىر. ونىڭ ناتيجەسى الداعى ۋاقىتتا بەلگىلى بولادى.
«بۇگىنگى ءىس-شاراعا ءبىزدىڭ مەكتەپتەن 107 بالا قاتىسىپ جاتىر. بي-اعا شىعارمالارىنىڭ ءتىلى جەڭىل, بالاعا ۇعىنىقتى. سول زامانداعى ەلدىڭ تۇرمىس-تىرشىلىگى, ادامدار ساناسىنداعى وزگەرىستەر, اۋىل تۇرمىسى شىنايى بەرىلگەن عوي. بالالارمەن اڭگىمەلەسكەنىمىزدە «شۇعانىڭ بەلگىسىنەن» باسقا شىعارمالارىنىڭ ءبارى بىزگە وتە جەڭىل دەيدى. بىرىنشىدەن, جەكە كومپانيانىڭ باستاماسىمەن ۇيىمداستىرىلعان مۇنداي ءىس-شارا ءبىزدىڭ وڭىردە ءبىرىنشى رەت ءوتىپ جاتىر. كومپانيا باسشىلىعىنىڭ مەكتەپكە, ءبىلىم سالاسىنا, بولاشاق ۇرپاق تاربيەسىنە كوڭىل ءبولۋى قۋانتادى», دەيدى مەكتەپ باسشىسى.
«QC Holding» كومپانياسى پيار ءبولىمىنىڭ جەتەكشىسى ايزا ابلاكيمنىڭ سوزىنشە, كومپانيا باسشىسى نۇرالحان ءامىرحان ۇلى اسا كىتاپقۇمار كىسى ەكەن. بۇل ۇجىمدا مىناداي ءبىر قىزىق ءداستۇر قالىپتاسقان. ماسەلەن, كومپانيا باسشىسى ءوزى وقىپ شىققان كىتاپتاردىڭ ىشىنەن تاڭداپ الىپ جۇمىسشىلارعا مىنالاردى وقيىق دەپ بەس كىتاپ بەرەدى. جۇمىسشىلار ونى وقىپ شىعىپ, ارتىنان تەست تاپسىرادى. ەڭ جوعارى ۇپاي جيناعان ادامعا 500 مىڭ, كەيدە 1 ملن تەڭگە سىياقى بەرىلەدى.
«قازىر ءبىز كەزەكتى بەس كىتاپتى وقىپ جاتىرمىز. ەرتەڭ كادر بولىمىنە وسى بالالار سياقتى وتىرىپ تەست تاپسىرامىز. ءبىر كۇنى باسشىمىز مەنەن ء«بىز بالالار مەن جاسوسپىرىمدەردىڭ كىتاپقا دەگەن سۇيىسپەنشىلىگىن ارتتىرىپ, كوركەم شىعارما وقۋعا بەت بۇرۋى ءۇشىن نە ىستەي الامىز, قانداي ۇلەس قوسا الامىز؟» دەپ سۇرادى. مەن: «بالالار كىتاپ وقىمايدى ەمەس, وقيدى, بىراق ولاردى ىنتالاندىرا ءتۇسۋ كەرەك. مىسالى, «Apple iPad», «Apple iPhone» سياقتى قىمبات تەحنولوگيانى بالالار دا العىسى كەلەدى. مۇمكىن بىرەۋدىڭ جاعدايى بولماي جاتقان شىعار, مۇمكىن بىرەۋدىڭ اكە-شەشەسى ساعان ءالى ەرتە دەپ ايتاتىن شىعار, بىراق بالا قىزىعادى عوي» دەدىم. وسىلايشا, بيىل قىركۇيەك ايىندا ءابىش كەكىلباي ۇلىنىڭ 85 جىلدىعى اياسىندا «QC Read» جوباسىن وتكىزدىك. مۇنداعى «QC» – ءبىزدىڭ كومپانيانىڭ قىسقارتىلعان اتاۋى, «Read» – وقۋ دەگەن ءسوز. ء«ابىش وقۋلارىنان» وزىپ شىققان 3 بالا باعالى سىيلىقتارعا يە بولدى. ءدال وسى بەيىمبەت اتامىزدىڭ اتىنداعى №7 مەكتەپكە قاراما-قارسى, بۇيىرسا, ەكى تۇرعىن ءۇي كوتەرىلەدى. بىرەۋى «احمەت», ەكىنشىسى ء«اليحان» دەپ اتالاتىن بولادى. لەنينا 215-تەگى تۇرعىن ءۇي كەشەنى وسى مەكتەپتىڭ الدىنان كورىنىپ تۇر. توعىز قاباتتى بۇل ءۇيدى جەرگىلىكتى تۇرعىنداردىڭ ءبارى «لەنينا 215» دەپ اتاپ كەتكەن. باسقا اتاۋى جوق. بۇل ءۇيدى كۇردەلى جوندەۋدەن وتكىزىپ, «مايلين ءۇيى» دەپ اتادىق جانە وسى ۇيگە بەيىمبەت اتامىزدىڭ مۇرالىن سالعىزدىق. ەڭ قىزىعى, مۇرال بەيىمبەت مەكتەبىنىڭ الدىنان انىق كورىنەدى», دەيدى ايزا ابلاكيم.
رۋدنىيدا وتكەن «بەيىمبەت وقۋلارىنا» قاتىسقان 172 بالانىڭ ىشىنەن وزىپ شىققان بەس ورەنگە كومپانيا وكىلدەرى «Iphone 15 PRO», «Apple iPad 2022» جانە ءۇش بىردەي «Apple iPad 2021» تابىس ەتتى.
قوستاناي وبلىسى
