سولتۇستىك قازاقستاندا الەم چەمپيوناتىنا قاتىساتىندار انىقتالدى

پەتروپاۆل. 17 ماۋسىم. ەلىمىزدىڭ ءار وبلىسىنان جينالعان گىر كوتەرۋشىلەر مەن قول كۇرەسىنىڭ شەبەرلەرى بىرنەشە كۇن بويى كۇش سىناسىپ, ەڭ مىقتىلارى يرلانديا مەن مالايزيادا وتەتىن الەمدىك دوداعا بەرىلەتىن جولدامالاردى ۇتىپ الدى. بۇل تۋرالى وبلىستىق دەنە شىنىقتىرۋ جانە سپورت باسقارماسى حابارلادى. گىر تاسىن كوتەرۋشىلەر اراسىندا بارلىق جۇلدەلى ورىنداردى الاڭ يەلەرى يەلەنىپ, جالپى كوماندالىق ەسەپتە دە ۇزدىك شىقتى. ەكىنشى, ءۇشىنشى ورىندارعا قوستانايلىقتار مەن پاۆلودارلىقتار جايعاستى. ءوز سالماقتارى بويىنشا جەڭىستىڭ ەڭ بيىك تۇعىرىنا كوتەرىلگەن ەلەنا كوستەنكو (58 كگ.), ناتاليا نوحرينا (68 كگ.), ميحايل ۆولوگودسكي (73 كگ.) جانە ۆيتالي ديدەنكو (95كگ-نان جوعارى) ەندى قاراشا ايىندا يرلانديادا قازاقستاننىڭ نامىسىن قورعايتىن بولادى. ارمرەستلينگشىلەر اراسىنان جالپىكوماندالىق ەسەپتە جامبىل وبلىسىنىڭ سپورتشىلارى جەڭىمپاز اتاندى.  الماتىلىقتار مەن وڭتۇستىكقازاقستاندىقتار ەكىنشى, ءۇشىنشى ورىنداردى ءبولىستى. ال قىركۇيەك ايىندا مالايزيادا وتەتىن الەمدىك جارىسقا سولتۇستىك قازاقستان وبلىسى اتىنان ۆيكتوريا فرولوۆا (70 كگ-عا دەيىن), يۋري ۆوبليكوۆ (80 كگ-عا دەيىن) جانە پاۆەل لۋكانين (90 كگ-عا دەيىن) قاتىسادى. ءومىر ەسقالي. دەرەك: سولتۇستىك قازاقستان وبلىستىق دەنە شىنىقتىرۋ جانە سپورت باسقارماسى. سۋرەت: egemen.kz