سۋرەتتى تۇسىرگەن – جانگەلدى ابدىعالىم
جاڭا ورتالىق وبلىستىق كوپسالالى بالالار اۋرۋحاناسىندا ورنالاسقان. ورتالىق جەرگىلىكتى اتقارۋشى ورگانداردىڭ, «قازاقستان حالقىنا» قورىنىڭ سەرىكتەستەرى مەن مەتسەناتتاردىڭ بىرلەسكەن كۇش-جىگەرىنىڭ ارقاسىندا اشىلىپ وتىر.
وڭالتۋ ورتالىعىنىڭ سالتاناتتى اشىلۋ راسىمىنە وبلىس اكىمىنىڭ ورىنباسارى وراز تاۋىربەكوۆ, «قازاقستان حالقىنا» قوعامدىق قورىنىڭ دونورلارىمەن ستراتەگيالىق جوسپارلاۋ جانە ءوزارا ءىس-قيمىل ءبولىمىنىڭ باسشىسى شىڭعىس شاراپيەۆ, «ERG كومەك» قوعامدىق قورىنىڭ اتقارۋشى ديرەكتورى ءمادي يسمايلوۆ, «قامقورشىلىق قورى» قوعامدىق قورىنىڭ ديرەكتورى ارايلىم ەركىنوۆا قاتىسىپ, جاڭا مەديتسينالىق مەكەمەنىڭ جۇمىسىنا ساتتىلىك تىلەدى.
بۇل يگىلىكتى جوبانى ىسكە اسىرۋعا قارجىلىق دەمەۋشىلىك كورسەتكەن – «Eurasian Resources Group» كومپانياسى. «قامقورلىق قورى» قوعامدىق قورى ورتالىقتى زاماناۋي جابدىقتارمەن جابدىقتاۋعا, مۇنداعى مامانداردىڭ كاسىبي وقۋىن تەرەڭدەتۋگە كومەگىن تيگىزدى.
– بىزگە وسى وبلىستا وڭالتۋ ورتالىعىنىڭ اشىلۋى – اسا ماڭىزدى. ويتكەنى قاراعاندى وبلىسى كومپانيامىزدىڭ تۋعان ءوڭىرى سانالادى. بيىل «ERG» كومپانياسىنىڭ 30 جىلدىعى كەڭ كولەمدە اتاپ ءوتىلىپ جاتىر. بۇل ورتالىق – ەلىمىزدىڭ دەنساۋلىق ساقتاۋ سالاسىن دامىتۋعا, ينكليۋزيۆتى قوعامدى قولداۋعا قوسقان ۇلەسىمىز. ەرەكشە قاجەتتىلىگى بار بالالارعا تولىققاندى ءومىر سۇرۋگە, الەۋمەتتىك بەيىمدەلۋگە مۇمكىندىك بەرە الاتىنىمىزدى ماقتان تۇتامىز, – دەدى قازاقستانداعى «Eurasian Resources Group» كومپانياسىنىڭ باس ديرەكتورى سەرىك شاحاجانوۆ.
بىلتىردان بەرى اۋرۋحانادا «قامقورلىق» ەرتە ارالاسۋ بولىمشەسى جۇمىس ىستەيدى. وندا وسى ۋاقىتقا دەيىن دامۋ كەمىستىگى بار جۇزدەگەن بالا مامانداردىڭ كومەگىنە جۇگىندى. مۇندا بالالار 3 ايىنان باستاپ 3 جاسقا دەيىنگى ارالىقتا قابىلدانسا, ەندى جاڭا ورتالىقتا 18 جاسقا دەيىنگى بالالارعا ەم-دوم كورسەتىلەدى. بالانىڭ تۋعاننان باستاپ, ەرەسەك جاسقا دەيىنگى دەنساۋلىعى, جاعدايى ۇزدىكسىز قاداعالاۋدا بولادى. ورتالىقتا نەۆرولوگ-دارىگەرلەردى, رەابيليتولوگتەردى, لوگوپەدتەردى, دەفەكتولوگتەردى, ەمدىك-دەنەشىنىقتىرۋ نۇسقاۋشىلارى مەن پسيحولوگتەردى قوسا العاندا, كاسىبي كوپسالالى كوماندا قۇرىلىپ, ءوز جۇمىستارىنا كىرىستى.
– بىزدە بارلىق قاجەتتى جابدىق بار. بالانىڭ جاسىنا جانە بويىنا بايلانىستى ءتۇرلى ۆەرتيكاليزاتورلار قولدانىلادى. بارلىق مامان دايارلىقتان تولىق ءوتتى. ولار اۋرۋحانانىڭ بازاسىندا وقىپ, تاجىريبەسىن جەتىلدىردى. استانا, قوستانايعا دا باردى. وڭالتۋ جۇمىسىنىڭ ساپاسى جوعارى بولۋى ماقساتىندا دارىگەرلەردىڭ بىلىكتىلىگىن ۇنەمى ارتتىرىپ وتىرامىز, – دەيدى وبلىستىق بالالار اۋرۋحاناسى ديرەكتورىنىڭ ورىنباسارى نينا دەركاچ.
«قازاقستان حالقىنا» قورى الەمدىك برەندتەردەن ساراپتامالىق سىنىپتى مەديتسينالىق وڭالتۋ جابدىقتارىمەن جاراقتاندىرۋعا 6 ملرد تەڭگەدەن اسا قاراجات ءبولدى. وعان بوس-تەراپيا كابينەتتەرى, ينتەراكتيۆتى, سەنسورلىق بولمەلەر, يممەرسيالىق ۆاننا سەكىلدى بىرەگەي تەحنولوگيالار جابدىقتالدى. بۇلاردىڭ ءبارى – ەرەكشە قاجەتتىلىكتەرى بار بالالارعا ۇلكەن كومەك.
يگى جوبانى قوعامدىق قور «Qن وڭالتۋ ورتالىقتارى», «Qن اۋداندىق وڭالتۋ ورتالىقتارى» قايىرىمدىلىق باعدارلامالارىن ىسكە اسىرۋ شەڭبەرىندە جۇزەگە اسىرىپ وتىر. الداعى ۋاقىتتا قور بارلىق وڭىردە ەرەكشە قاجەتتىلىكتەرى بار بالالارعا ارنالعان ءدال وسىنداي 25 وڭالتۋ ورتالىعىن اشپاق. جاقىندا ۇلىتاۋ وبلىسىندا اشىلدى. ەندى تاياۋ كۇندەرى وسىنداي مەكەمەنىڭ اشىلۋى پاۆلودار وبلىسى مەن شىمكەنت قالاسىندا جوسپارلانىپ وتىر, دەيدى قور باسشىلىعى.
قاراعاندى وبلىسى
