قازاقستاندا سوڭعى 5 جىلدا ورتاشا ءومىر ءسۇرۋ جاسى 3 جىلعا ارتتى

استانا. 17 ماۋسىم. مەملەكەتتىك حاتشى گۇلشارا ابدىقالىقوۆا دەنساۋلىق ساقتاۋ جۇيەسى قىزمەتكەرلەرىمەن كەزدەستى. بۇل تۋرالى akorda.kz حابارلادى. كەزدەسۋگە دەنساۋلىق ساقتاۋ جانە الەۋمەتتىك دامۋ ءبىرىنشى ۆيتسە-ءمينيسترى ساليدات قايىربەكوۆا, مەديتسينا سالاسىنداعى جوعارى وقۋ ورىندارى مەن عىلىمي مەكەمەلەر باسشىلارى, اۋىل دارىگەرلەرى, جاڭاشىل مەديكتەر, العاشقى مەديتسينالىق-سانيتارلىق كومەك كورسەتۋ جانە سانيتارلىق اۆياتسيا دارىگەرلەرى, فارماتسيا ماماندارى قاتىستى. كەزدەسۋ بارىسىندا دەنساۋلىق ساقتاۋ سالاسىنا, سونىڭ ىشىندە العاشقى مەديتسينالىق كومەك كورسەتۋگە, وڭىرلىك عىلىمي مامانداندىرىلعان مەديتسينالىق ۇيىمدار مەن اۋىلدىق مەديتسينالىق مەكەمەلەر جۇمىسىنا بايلانىستى جانە وزگە دە وزەكتى ماسەلەلەر تالقىلاندى. گۇلشارا ابدىقالىقوۆا ءوز قۇتتىقتاۋ سوزىندە ۇلت دەنساۋلىعى مەملەكەتتىك ساياساتتىڭ ماڭىزدى باسىمدىعىنىڭ ءبىرى بولىپ تابىلاتىنىن اتاپ ءوتتى. قازاقستاننىڭ الەۋمەتتىك-ەكونوميكالىق تابىستى دامۋى جانە 2050 جىلعا قاراي الەمنىڭ ەڭ دامىعان وزىق 30 ەلى قاتارىنا قوسىلۋى دەنساۋلىق ساقتاۋ سالاسىن جاڭعىرتۋمەن تىكەلەي بايلانىستى. بيىلعى جىلى «سالاماتتى قازاقستان» مەملەكەتتىك باعدارلاماسىن جۇزەگە اسىرۋ اياقتالاتىنى بەلگىلى. وسى جىلدار ىشىندە دەنساۋلىق ساقتاۋدىڭ بىرىڭعاي ۇلتتىق جۇيەسى قۇرىلدى. ول مەديتسينالىق مەكەمەنى تاڭداۋ ەركىندىگى, مەديتسينالىق كومەك كورسەتۋ شارالارىنىڭ اشىقتىعى, مەديتسينالىق قىزمەت كورسەتۋ ىسىندە باسەكەلەستىك ورتا قالىپتاستىرۋ, مەديتسينالىق قىزمەت كورسەتۋدىڭ كولەمى مەن ساپاسىنا قاراي اقىرعى ناتيجەگە سايكەس قارجىلاندىرۋ قاعيداتتارىنا نەگىزدەلگەن. مەملەكەت باسشىسى 2014 جىلى قازاقستان حالقىنا ارناعان «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىندا اتاپ وتكەندەي, تەك «سالاۋاتتى ءومىر سالتىن ورنىقتىرۋ جانە مەديتسينانى دامىتۋ عانا قازاقستاندىقتاردىڭ ءومىر ءسۇرۋ جاسىن ۇزارتۋعا مۇمكىندىك تۋعىزادى». سوڭعى 5 جىلدا قازاقستاندىقتاردىڭ ءومىر جاسىنىڭ ۇزارۋى وتاندىق مەديتسينادا قول جەتكىزىلگەن تابىستىڭ ايعاعى بولىپ وتىر. ءومىر جاسىنىڭ ۇزاقتىعى 3 جىلعا ارتىپ, 2014 جىلى 71,6 جاستى قۇرادى. 2010 جىلمەن سالىستىرعاندا انا ءولىمى 2 ەسە, بالا ءولىمى 1,7 ەسە ازايدى. قازاقستان 2011 جىلى مىڭجىلدىق دامۋدىڭ ءتورتىنشى جانە بەسىنشى ماقساتتارىنا مەرزىمىنەن بۇرىن قول جەتكىزدى. تالقىلاۋ قورىتىندىسى بويىنشا مەملەكەتتىك حاتشى قۇزىرلى مەملەكەتتىك ورگاندارعا بىرقاتار ناقتى تاپسىرما بەردى. كەزدەسۋ سوڭىندا گۇلشارا ابدىقالىقوۆا مەديتسينا قىزمەتكەرلەرىن الداعى كاسىبي مەرەكەلەرىمەن قۇتتىقتاپ, زور دەنساۋلىق جانە ەل يگىلىگى جولىنداعى جۇمىستارىنا تابىس تىلەدى. تالعات رايىمبەك. دەرەك: akorda.kz. سۋرەت: «قازاقپارات».