استانادا ناسىباي ساتقان دۇكەن يەلەرى جاۋاپقا تارتىلدى

رەيد بارىسىندا مونيتورينگتىك توپ نۇرا اۋدانىنىڭ ءىرى تۇرعىن ءۇي كەشەندەرىندە ورنالاسقان كاسىپكەرلىك نىساندارىن تەكسەرگەن. رەيد ناتيجەسىندە ناسىباي مەن سنيۋس ءۇش دۇكەننەن تابىلعان.

پوليتسيا قىزمەتكەرلەرى جالپى سوماسى 25 مىڭ تەڭگەگە شامامەن 40 قوراپ ناسىباي مەن 20 قوراپ سنيۋس تاركىلەگەن. دۇكەن يەلەرى اكىمشىلىك جاۋاپكەرشىلىككە تارتىلىپ, ولارعا قر اقبتك-ءنىڭ 196-بابىنا سايكەس 92 300 تەڭگە (25 اەك) ايىپپۇل سالىنعان.

ء«بىز جامان ادەتتەردىڭ الدىن الۋ قاعيداتتارىن ۇستانا وتىرىپ, جاستاردىڭ وسى ونىمگە قولجەتىمدىلىگىن شەكتەۋگە تىرىسامىز. بۇزۋشىلىقتار ءۇشىن قاتاڭ جاۋاپكەرشىلىك شارالارى, سونىڭ ىشىندە ءىرى ايىپپۇلدار قاراستىرىلعان. كاسىپكەرلەردىڭ ەسىنە سالعىم كەلەدى: ۆەيپ, ناسىباي جانە سنيۋس ساتۋعا تىيىم سالۋدى ساقتاۋ – بۇل زاڭنىڭ تالابى عانا ەمەس, سونىمەن قاتار قوعام الدىنداعى مورالدىق جاۋاپكەرشىلىك. نۇرا اۋدانىندا مۇنداي مونيتورينگتىك ءىس-شارالار ۇنەمى وتكىزىلىپ تۇرادى. جىل باسىنان بەرى 230-عا جۋىق دۇكەن تەكسەرىلدى, ءبىز بۇل جۇمىستى جالعاستىرامىز», دەدى نۇرا اۋدانى اكىمى اپپاراتىنىڭ كاسىپكەرلىك ءبولىمىنىڭ باس مامانى باتىرحان جانپەيىسوۆ.

بۇزۋشىلىقتاردى انىقتاۋ بويىنشا رەيدتەر جاستار اراسىندا جامان ادەتتەردىڭ الدىن الۋعا جانە كاسىپكەرلەردىڭ زاڭنامانى ساقتاعانى ءۇشىن جاۋاپكەرشىلىگىن ارتتىرۋعا باعىتتالعان.