فوتو: adyrna.kz
دەپۋتات مۇرات ابەنوۆ ەلىمىزدە بەلەڭ الىپ جاتىرعان قىز الىپ قاشۋ ماسەلەسىنە مادەنيەت جانە اقپارات مينيسترلىگى نازار اۋدارماي وتىرعانىن ايتتى.
«استاناداعى ۋنيۆەرسيتەتتىڭ ستۋدەنتتەرى ماعان الىپ قاشقان قىزدى ماجبۇرلەپ قولحات جازدىرىپ جاتىرعان بەينەروليكتى كورسەتتى. ال مادەنيەت سالاسى وسىنداي قۇقىقبۇزۋشىلىقتى ناسيحاتتاپ وتىر. مىسالى انشىلەر «الىپ قاشام مەيلى ولاي قالاما, كەلىن قىلام سەنى قالاي دا اناما», «كورەسىڭ مەنىڭ ۇيىمە باراسىڭ, باسىڭا اپپاق ورامال تاعاسىڭ! كوندىرەم, كونەسىڭ, قىز بولىپ كەلەسىڭ — كەلىن بولىپ قالاسىڭ», دەپ ءان شىرقاپ ءجۇر. مەنىڭشە, مۇنداي دارىپتەۋلەرگە زاڭمەن تىيىم سالۋ كەرەك. مەن قىز الىپ قاشۋعا بولەك نورمالار ەنگىزۋدى ۇسىنامىن», دەدى مۇرات ابەنوۆ.
دەپۋتاتتار سونىمەن قاتار مەملەكەت باسشىسىنىڭ ۇلتتىق قۇرىلتايدا ەلىمىزدەگى قىز الىپ قاشۋدى ۇلتتىق ءداستۇر ساناپ, ەل ىشىندە دارىپتەگىسى كەلەتىندەردىڭ ارەكەتىنە ءبىرجولا توسقاۋىل كەرەكتىگىن ايتقانىن, الايدا بۇل تاپسىرمانىڭ ءالى كۇنگە دەيىن ورىندالماعانىن العا تارتتى.
ءماجىلىس دەپۋتاتى ەدىل جاڭبىرشين قىزدىڭ تاۋار نەمەسە جەكە زات ەمەس ەكەندىگىن, ماسەلەنىڭ وزەگىن تەرەڭنەن, تاربيە بەرۋدەن باستاۋ قاجەت ەكەنىن ايتتى.
ء«بارىمىز دە قىز ءوسىرىپ وتىرمىز. قاراكوز قىزدارىن قورعاي الماعان مەملەكەتتىڭ دە بولاشاعى بولمايدى. سوندىقتان ۇلدارعا كىشكەنە كۇنىنەن ءبىلىم وردالارىندا, بالاباقشالاردا, وتباسىندا قىزدى قۇرمەتتەۋدى ۇيرەتۋىمىز كەرەك», دەدى ول.
ەكى دەپۋتات تا ماسەلەنى كۇن تارتىبىنە ەنگىزىپ, زاڭنامالىق تۇرعىدا قاراستىرۋدى ۇسىندى. ءماجىلىس توراعاسى ەرلان قوشانوۆ بۇل ماسەلە الداعى وتىرىستاردا بولەك تاقىرىپ رەتىندە قاراستىرىلاتىنىن مالىمدەدى.
