استاناعا گرۋزيانىڭ ۆيتسە - پرەمەرى كاحا كالادزە كەلە جاتىر

استانا. كەزىندە فۋتبولدان گرۋزيا ۇلتتىق قۇراما كومانداسى مەن كيەۆتىڭ «دينامو» جانە يتاليانىڭ «ميلان» كلۋبتارىندا ونەر كورسەتكەن گرۋزيا پرەمەر-ءمينيسترىنىڭ ورىنباسارى جانە ەنەرگەتيكا ءمينيسترى كاحابەر كالادزە استانا قالاسىندا 29 قىركۇيەك پەن 1 قازان ارالىعىندا وتەتىن X KAZENERGY ەۋرازيالىق فورۋمىنا قاتىسادى.  بۇل تۋرالى egemen.kz ءتىلشىسى حابارلادى. كاحا كالادزە «ميلان» كومانداسىنىڭ قۇرامىندا ۋەفا چەمپيوندار ليگاسىن ەكى رەت جەڭىپ العان. گرۋزيانىڭ بەس مارتە چەمپيونى.  ونىڭ پرەمەر-ءمينيسترىنىڭ ورىنباسارى جانە ەنەرگەتيكا ءمينيسترى بولعانىنا كوپ ۋاقىت وتكەن جوق. مەملەكەتتىك قىزمەتكەر رەتىندە كالادزە ەلىنىڭ ەنەرگەتيكا سالاسىن دامىتۋعا زور ۇلەس قوسىپ كەلەدى. «ەنەرگەتيكانىڭ جاڭا كوكجيەگى: ارىپتەستىك پەن ينۆەستيتسيالاردىڭ تىڭ مۇمكىندىكتەرى» X KAZENERGY ەۋرازيالىق فورۋمى 10 جىل ىشىندە بارلىق ەنەرگەتيكالىق ونەركاسىپتەر مەن مۇناي-گاز سالاسىنىڭ كاسىپورىندارىن بىرىكتىرەتىن بەدەلدى ءارى ىقپالدى ديالوگ الاڭى بولىپ قالىپتاستى.   KAZENERGY ەۋرازيالىق فورۋمى قازاقستاننىڭ اسا ءىرى سالالىق حالىقارالىق شاراسى بولىپ سانالادى. فورۋم باعدارلاماسىندا حالىقارالىق ەنەرگەتيكالىق اگەنتتىك (IEA), حالىقارالىق جاڭارمالى ەنەرگيا اگەنتتىگى (IRENA), ەنەرگەتيكالىق حارتيا حاتشىلىعى, دۇنيەجۇزىلىك مۇناي كەڭەسى (WPC), ينجەنەر-مۇنايشىلار قوعامى (SPE) جانە باسقا دا ۇيىمداردىڭ ساراپشىلارىمەن بىرلەسكەن شارالار وتكىزۋ جوسپارلانىپ وتىر. داستان كەنجالين. دەرەك, سۋرەت: egemen.kz