سۋرەت: zh-shugylasy.kz
قور 2025 جىلعا ارنالعان مەديتسينالىق قىزمەتتەر كولەمىن ورنالاستىرۋ ءراسىمىن باستادى. مەديتسينالىق قىزمەت كولەمىن بولۋگە مەملەكەتتىك, جەكە مەديتسينالىق ۇيىمدار قاتىسا الادى. مەديتسينالىق ۇيىمدار تەگىن مەديتسينالىق كومەكتىڭ كەپىلدىك بەرىلگەن كولەمى, مىندەتتى الەۋمەتتىك مەديتسينالىق ساقتاندىرۋ جۇيەسى شەڭبەرىندە دەنساۋلىق ساقتاۋ نىساندارىنىڭ دەرەكقورىنا ەنگەن بولۋعا ءتيىس. سونداي-اق ولار تمككك, ءمامس اياسىندا مەديتسينالىق كومەك كورسەتۋ ءۇشىن دەنساۋلىق ساقتاۋ سۋبەكتىلەرىنەن قىزمەتتەردى ساتىپ الۋ ەرەجەلەرىنىڭ 37-1-بابى 1-تارماقشاسىندا كورسەتىلگەن تالاپتارعا سايكەس بولۋى قاجەت. الەۋمەتتىك مەديتسينالىق ساقتاندىرۋ قورى باسقارما توراعاسىنىڭ ورىنباسارى سۆەتلانا پونومارەۆا وتىنىمدەردىڭ قانداي تارتىپپەن قارالاتىنىن بايانداپ بەردى.
«وتىنىمدەردى قابىلداۋ كەزەڭىنەن كەيىن كوميسسيا مۇشەلەرى ون كۇن ىشىندە ۇسىنىلعان قۇجاتتاردىڭ مەديتسينالىق كومەك كولەمدەرىن ورنالاستىرۋعا جىبەرۋ تالاپتارىنا سايكەستىگىن تەكسەرەدى. ناتيجەسىندە, دەنساۋلىق ساقتاۋ نىسانىنىڭ تالاپتارعا سايكەستىگى نەمەسە سايكەس ەمەستىگى تۋرالى حاتتاما جاسالادى. ەگەر قانداي دا ءبىر ەسكەرتۋلەر تابىلسا, كلينيكالارعا ولاردى تۇزەتۋگە ءۇش جۇمىس كۇنى بەرىلەدى, سودان كەيىن وتىنىمدەر قايتا قارالىپ, كولەمدەردى كوميسسيالىق ءبولۋ ىسكە اسادى», – دەدى س.پونومارەۆا.
2025 جىلعا ارنالعان مەديتسينالىق قىزمەتتەردى ساتىپ الۋ جوسپارىنا سايكەس, مەديتسينالىق كومەك كورسەتۋگە 2,9 ترلن تەڭگەدەن اسا قاراجات قارالعان. ونىڭ 1,3 ترلن تەڭگەدەن استامى – مىندەتتى الەۋمەتتىك مەديتسينالىق ساقتاندىرۋ جۇيەسى شەڭبەرىندە كورسەتىلەتىن قىزمەتتەر.
