بۇعان دەيىن تراكتوردى رەسەيدەن بۇتىندەي بولشەك تۇرىندە اكەلىپ, ونى تەك قۇراستىرۋمەن عانا شەكتەلىپ كەلگەن كاسىپورىن كەيىنگى ءبىر-ەكى جىل ىشىندە «كيروۆەتسكە» قاجەت پلاستيك بولشەكتەردى تۇگەلدەي قوستانايدا وندىرە باستادى. زاۋىت قۋاتتى تراكتورعا قاجەت 90 مىڭنان اسا بولشەكتى ءوزى شىعارادى.
«سانكت-پەتەربۋرگ تراكتور زاۋىتىمەن بىرلەسكەن كاسىپورىن 2019 جىلى ىسكە قوسىلدى. بۇگىندە ءبىزدىڭ كاسىپورىن وتاندىق نارىقتا اسا تانىمال, ەڭ باستىسى, ءىرى بولشەكتى قۇراستىرۋدان ۇساق توراپتى قۇراستىرۋ وندىرىسىنە كوشە باستادىق. وندىرىسكە بۇرىن-سوڭدى بولماعان وزىق تەحنولوگيالار مەن قۇزىرەتتەردى ەنگىزدىك, ءالى دە ەنگىزىپ جاتىرمىز. پلاستيكتەن جاسالاتىن كومپونەنتتەر ءوندىرىسىن ىسكە قوسۋ وڭاي بولعان جوق. زاۋىت ماماندارى سانكت-پەتەربۋرگتە وقىپ كەلدى. ناتيجەسىندە, قازىر تراكتوردىڭ الدىڭعى جانە ارتقى دوڭعالاقتارىنىڭ جابىن قاناتتارىن, اككۋممۋلياتور باتارەياسىنىڭ قاپتاماسىن, كابينانىڭ توبەسىن جانە كاپوتتى ءوزىمىز جاسايمىز. اسىرەسە, كاپوت جاساۋ اسا قيىن. ول ءۇشىن ءپىشىنى ءارتۇرلى 19 قوسىمشا دەتال جاساپ شىعارۋ كەرەك. ماسەلەن, ءبىر عانا كاپوتتى جاساپ شىعارۋ ءۇشىن ءپىشىنى, كولەمى ءارتۇرلى قوسىمشا 19 بولشەك شىعارامىز. جالپى, ءبىر تراكتوردى شىعارۋ ءۇشىن وعان قاجەت شامامەن 90 جيىنتىق شىعارامىز. ونىڭ جالپى سالماعى 1000 كگ-دان اسىپ كەتەدى. ءبىر اۋىسىمدا وسىنداي 360, ال ءبىر ماۋسىمدا 27 مىڭ جيىنتىق جاسايمىز. سونداي-اق تراكتوردىڭ تەپە-تەڭدىگىن ساقتاپ تۇراتىن قوسالقى بولشەكتى دە اۋىر مەتالدان ءوزىمىز ۇيلەستىرەمىز. ءوندىرىس بارىسىندا ءبىز وزىمىزدەن تەحنيكا ساتىپ الىپ جاتقان شارۋالاردىڭ دا تىلەگىن ەسكەرەمىز. وسى ماۋسىمدا شىققان تراكتورلارعا «Weichai» قوزعالتقىشتارى ورناتىلعانىن دا ايتا كەتۋ كەرەك», دەيدى زاۋىت باسشىسى دينارا شۇكىجانوۆا.
كاسىپورىن باسشىسىنىڭ ايتۋىنشا, قوستاناي تراكتور زاۋىتى بۇگىنگە دەيىن ءوندىرىستى دامىتۋعا سەرپىن بەرەتىن ءبىراز شارۋا تىندىرعان. بۇگىندە ءوندىرىستى ورىستەتۋگە قاجەت زاماناۋي قۇرىلعىلار, سەنىمدى سەرىكتەستەر بار. قازىر كاسىپورىن قۋاتى 300 جانە 420 ات كۇشىنە تەڭ «كيروۆەتس» تراكتورلارىن شىعارىپ جاتىر. تراكتورلاردى ءالى دە جاڭارتا ءتۇسۋ جوسپارلانىپ وتىر. ماسەلەن, الداعى ۋاقىتتا ك-7م تراكتورلارىنداعى جاڭا گيدروجۇيەنى بىرىزدەندىرۋ جوسپارلانىپ وتىر. ناتيجەسىندە, قۋاتتى تەحنيكا قاشىقتان باسقارۋ جۇيەسىمەن جابدىقتالادى. بۇل تەحنيكانىڭ تۇرعان جەرىن, ونىڭ جىلدامدىعىن, وتىن شىعىنىن, قوزعالتقىشتىڭ جاي-كۇيىن ونلاين رەجىمدە باقىلاۋعا مۇمكىندىك بەرەدى.
قوستاناي تراكتور زاۋىتىنىڭ ديلەرلەرى بۇگىندە استانا قالاسى مەن ەلىمىزدىڭ 14 وڭىرىنە قىزمەت كورسەتەدى. كەيىنگى جىلدارى وتاندىق نارىقتا ەڭ كوپ ساتىلىپ جاتقان اۋىلشارۋاشىلىق تەحنيكاسىنىڭ ءبىرى دە وسى «كيروۆەتس» تراكتورى. قوستاناي زاۋىتى ىسكە قوسىلعان سوڭ, اۋىل شارۋاشىلىعىنا تاپتىرمايتىن قۋاتتى تەحنيكانىڭ ساتىلىمى ەكى جارىم ەسە وسكەن.
«ەلىمىزدە جەر يگەرىپ, ءدان ەگىپ وتىرعان ءىرى شارۋاشىلىقتار وتە كوپ. سوندىقتان قوستاناي تراكتور زاۋىتى سەكىلدى اۋىلشارۋاشىلىق جۇمىستارىنا پايدالانىلاتىن قۋاتى جوعارى تەحنيكا شىعاراتىن كاسىپورىنداردىڭ بولۋى اسا ماڭىزدى. ءبىز وسىدان كوپ جىل بۇرىن شارۋاشىلىقتا سىناپ كورەيىك دەگەن ماقساتپەن ءبىر «كيروۆەتس» تراكتورىن ساتىپ العانبىز. ءۇمىتىمىز اقتالدى. قازىر القاپتاعى نەگىزگى جۇمىستىڭ ءبارىن وسى تراكتور اتقارادى. بۇگىندە ءبىزدىڭ شارۋاشىلىقتا 71 «كيروۆەتس» تراكتورى بار», دەيدى قاراسۋ اۋدانىنداعى «ماكس» جاۋاپكەرشىلىگى شەكتەۋلى سەرىكتەستىگىنىڭ باسشىسى ماكسيم ارتەمۋك.
قازىر قوستاناي تراكتور زاۋىتى قۋاتى 350-دەن 460 ات كۇشىنە تەڭ «كيروۆەتس» تراكتورلارىنىڭ ك-735, ك-739, ك-742, ك-743, ك-746 ءتارىزدى ۇلگىلەرىن شىعارادى.
بۇگىندە ساۋدا-ەكونوميكا سالاسىندا جۇزدەن استام ەلمەن ىسكەرلىك ىنتىماقتاستىق ورناتقان قوستاناي وبلىسىنىڭ ەڭ ءىرى ارىپتەستەرىنىڭ ءبىرى – رەسەي فەدەراتسياسى. باتىس-ءسىبىر جازىعىن جارىپ وتەتىن توبىل وزەنىنىڭ قوس اڭعارىندا جاتقان كورشىلەس ايماقتاردىڭ اراسىنداعى تاۋار اينالىمىنىڭ جىلدىق كولەمى 2 ملرد دوللاردى قۇرايدى.
قوستاناي وبلىسى
