فوتو: ۆەدومستۆو
قورشاعان ورتانى قورعاۋ ماقساتىندا قۇجاتقا العاش رەت شاعىن كولدەردى, وزەندەر مەن توعانداردى, سونداي-اق مۇزدىقتار مەن سۋلى-باتپاقتى ايماقتاردى قورعاۋ جونىندە نورمالار ەنگىزىلدى.
مىسالى, شاعىن وزەندەردىڭ تارتىلۋىنىڭ الدىن الۋ ءۇشىن تاسقىن سۋدى وتكىزۋگە ارنالعان قۇرىلىستارى جوق نىسانداردى, سۋ اعىنىن توقتاتاتىن بوگەتتەردى جوبالاۋعا جانە سالۋعا تىيىم سالىنادى. جاڭا سۋ كودەكسىنىڭ جوباسىنا سايكەس مۇنداي قۇرىلىستار جويىلاتىن بولادى.
شارۋاشىلىق قىزمەتى شاعىن سۋ ايدىندارىنىڭ جاي-كۇيىنە اسەر ەتەتىن جەكە جانە زاڭدى تۇلعالار مينيسترلىكتىڭ باسسەيندىك ينسپەكتسيالارىمەن كەلىسە وتىرىپ, سۋ رەسۋرستارىن قالپىنا كەلتىرۋ جانە ونىڭ تازالىعىن ساقتاۋ جونىندەگى ءىس-شارالاردى جۇرگىزۋگە مىندەتتى.
سۋلى-باتپاقتى جەرلەردى لاستاۋعا, بىتەۋگە, قۇرعاتۋعا نەمەسە وزگە ماقساتتاردا پايدالانۋعا تىيىم سالىنادى. سونداي-اق, سيرەك كەزدەسەتىن جانە جويىلىپ كەتۋ قاۋپى تونگەن تۇرلەردى قوسا العاندا جانۋارلاردى قورعاۋ جونىندەگى ءىس-شارالار دا كوزدەلەدى.
بۇدان بولەك, مۇزدىقتار مەن قارلى ايماقتارعا اعىن سۋ جىبەرۋ, ولاردى قالدىقتارمەن, مۇناي ونىمدەرىمەن, ۋلى حيميكاتتارمەن جانە باسقا دا زياندى زاتتارمەن لاستاۋعا تىيىم سالىنادى. مۇزدىقتاردان مۇز الۋ سۋ نىساندارىنىڭ جاعدايىنا كەرى اسەر ەتپەۋى ءتيىس جانە ولاردىڭ سارقىلۋىنا سەبەپ بولماۋى كەرەك.
«جاڭا سۋ كودەكسى كليماتتىڭ وزگەرۋىنە بەيىمدەلۋگە جانە سۋ ۇنەمدەۋ پرينتسيپتەرىن ەنگىزۋگە باسا نازار اۋدارادى. سۋ ايدىندارىنىڭ ەكوجۇيەسىن قولداۋ جانە ولاردى سارقىلۋ, لاستانۋ سىندى باسقا دا جاعىمسىز سالداردان قورعاۋ ءۇشىن سۋدىڭ ەڭ تومەنگى رۇقسات ەتىلگەن دەڭگەيى ايقىندالعان – «ەكولوگيالىق اعىن» ۇعىمى ەنگىزىلەدى. قۇجاتتىڭ ماقساتى – ەكونوميكانىڭ تۇراقتى دامۋىن قامتاماسىز ەتە وتىرىپ, ازاماتتاردىڭ ءومىر ءسۇرۋ ساپاسىن جاقسارتۋعا جانە قورشاعان ورتانى ساقتاۋعا مۇمكىندىك بەرەتىن سۋ پايدالانۋدىڭ قاۋىپسىز دەڭگەيىنە قول جەتكىزۋ جانە ونى قولداۋ بولىپ تابىلادى», دەدى سۋ رەسۋرستارى جانە يرريگاتسيا ءبىرىنشى ۆيتسە-ءمينيسترى بولات بەكنياز.
