فوتو: اشىق دەرەككوز
ايتا كەتەيىك, ۇكىمەت 2021 جىلى باستالعان اۋرۋحانا كەشەنىنىڭ قۇرىلىسىن اياقتاۋ ءۇشىن قاراجات ءبولۋ تۋرالى شەشىم قابىلداعان ەدى.
جوبانىڭ جالپى قۇنى – 34,8 ملرد تەڭگە, قازىرگى ۋاقىتتا 6,6 ملرد تەڭگە يگەرىلگەن, ونىڭ ىشىندە 2 ملرد تەڭگە رەسپۋبليكالىق بيۋدجەتتەن, 4,6 ملرد تەڭگە جەرگىلىكتى بيۋدجەتتەن بولىنگەن. قالعان قاراجات ارناۋلى مەملەكەتتىك قوردان بولىنەدى.
بۇعان دەيىن شىعىس قازاقستان وبلىسىنا جۇمىس ساپارى بارىسىندا پرەمەر-مينيستر ولجاس بەكتەنوۆكە قۇرىلىس الاڭىن قاراۋ كەزىندە جۇمىستى اياقتاۋ ءۇشىن جوبانى قارجىلاندىرۋ قاجەتتىلىگى تۋرالى باياندالعان. قابىلدانعان شارالار الەۋمەتتىك ماڭىزى بار وبەكتىنىڭ «ساقالدى قۇرىلىس» تىزىمىنە ەنۋىنە جول بەرمەۋگە جانە تۇرعىنداردى ساپالى جانە قولجەتىمدى مەديتسينالىق قىزمەتتەرمەن قامتاماسىز ەتۋگە مۇمكىندىك بەرەدى.
«اۋرۋحانا كەشەنىنىڭ اشىلۋى دەموگرافيالىق جۇكتەمەسى جوعارى مونوقالا ءۇشىن وتە ماڭىزدى. ريددەردىڭ حالقى 55 مىڭ ادامدى قۇرايدى, ونىڭ 22,7%-ى 60 جاستان اسقان. قالانىڭ ءار تۇكپىرىندەگى 12 عيماراتتا ورنالاسقان جالعىز اۋرۋحانا كەشەنىنىڭ عيماراتتارى 80 جىلدان استام ۋاقىت بۇرىن سالىنعان. نىساندار ەسكىرگەن جانە قازىرگى زامانعى تالاپتارعا سايكەس كەلمەيدى. سونىمەن قاتار حالىققا شۇعىل مەديتسينالىق كومەك كورسەتۋ ءۇشىن قوسىمشا كارديولوگيالىق, ينسۋلتتىك, تراۆماتولوگيالىق جانە كۇيىك توسەكتەرىن اشۋ قاجەت. جاڭا كوپسالالى كەشەننىڭ جالپى اۋدانى – 40 مىڭ م2. اۋرۋحانا ساراپتامالىق كلاستاعى مەديتسينالىق جابدىقتارمەن جابدىقتالادى. مۇندا 500-دەن استام قىزمەتكەر جۇمىس ىستەيتىن بولادى», دەلىنگەن حابارلامادا.
بۇعان دەيىن قاراجات اقتوبە قالاسىندا ەرەكشە قاجەتتىلىكتەرى بار بالالارعا ارنالعان ارنايى بالاباقشا, اقمولا وبلىسى زەرەندى اۋىلىندا سپورت كەشەنى, تۇركىستان وبلىسى تەمىرلان اۋىلىندا مۋزىكا مەكتەبى, ارقالىق قالاسىندا دارىندى سپورتشى بالالارعا ارنالعان سپورت كەشەنى, استانادا تىرەك-قيمىل اپپاراتى بۇزىلعان بالالارعا ارنالعان وڭالتۋ ورتالىعى, الماتىدا ەرەكشە قاجەتتىلىكتەرى بار ادامدارعا ارنالعان جاتتىعۋ ورتالىعى قۇرىلىسىنا باعىتتالعان ەدى.
