Frankfurter Buchmesse الەمدەگى ەڭ ءىرى كىتاپ كورمەسى سانالادى. وعان قاتىسۋشى ەلدەردىڭ قاتارى جىل سايىن ارتىپ كەلەدى. وسىعان وراي Frankfurter Buchmesse اتقارۋشى ديرەكتورى جانە پرەزيدەنتى يۋرگەن بووس كىتاپ ءىسى سالاسىناعى ىنتىماقتاستىقتى دامىتا وتىرىپ, الماتى قالاسىنداعى كىتاپحانالار, باسپالار, كىتاپ شىعارۋ ىسىنە قىزىعۋشىلىق ءبىلدىردى.
كەزدەسۋدە شاھار باسشىسى ەربولات دوساەۆ فرانكفۋرتتەن كەلگەن قوناقتارعا وڭتۇستىك مەگاپوليس تۋرالى اقپارات بەرىپ, قالانىڭ مادەني ومىرىمەن تانىستىردى. قازىرگى كەزدە قالا اكىمشىلىگى تاراپىنان كىتاپحانالاردى جەتىلدىرۋ مەن جاڭارتۋ بارىسىنا كوڭىل ءبولىنىپ, يننوۆاتسيالىق, كرەاتيۆتى شەشىمدەر ەنگىزىلۋدە. مۇنىمەن قوسا قالا باسشىسى قۇرمەتتى مەيماندارعا قالا ينفراقۇرىلىمى, اسىرەسە, زاماناۋي قوعامدىق كولىكتەردى دامىتۋعا قاتىستى از-كەم اقپارات بەرىپ ءوتتى.
ەربولات دوساەۆ اتاپ وتكەندەي, قالا جىلدان-جىلعا قارقىندى دامىپ كەلەدى. وسى رەتتە مەگاپوليستىڭ مادەني ومىرىنە دە باسا نازار اۋدارۋ ماڭىزدى. قازىرگى كەزدە كىتاپحانالارعا كەلۋشىلەردىڭ سانىنا قاراپ, قالا تۇرعىندارىنىڭ كىتاپ وقۋعا دەگەن قىزىعۋشىلىعىن جوعارى ەكەنىن كورۋگە بولادى.
«سوڭعى جىلداردا ەلەكتروندى كىتاپتارعا دەگەن سۇرانىستىڭ ارتقانىنا قاراماستان, قاعازعا باسىلعان كىتاپتىڭ ومىرشەڭ ەكەندىگى كۇمان تۋعىزبايدى. قازىرگى كەزدە قالاداعى كىتاپحانالاردىڭ 95 پايىزى جاڭارتىلدى. قالانىڭ بارلىق اۋداندارىندا جاڭا, زامانۋي كىتاپحانالار اشىپ, ساۋدا ويىن-ساۋىق, كوميۋنيتي ورتالىقتارىندا اۆتونومدى كىتاپحانالار ورناتىلىپ جاتىر. سونىمەن قاتار جازۋشىلار مەن قازىرگى زامان اۆتورلارى اكىمدىك تاراپىنان ۇلكەن قولداۋعا يە» دەپ اتاپ ءوتتى قالا باسشىسى.
ءوز كەزەگىندە يۋرگەن بوسس فرانكفۋرت دەلەگاتسياسىنىڭ الماتىعا ارنايى كەلگەنىن ءارى جازۋشىلار مەن جەرگىلىكتى اۆتورلار ءۇشىن سەمينارلار وتكىزىپ, اۋقىمدى كىتاپ جارمەڭكەلەرىن وتكىزۋگە بايلانىستى كەڭەس بەرۋگە دايىن ەكەنىن اتاپ ءوتتى. ونىڭ ايتۋىنشا, Frankfurter Buchmesse جارمەڭكەلەر وتكىزۋمەن عانا ەمەس, باسپا ىسىمەن دە اينالىسادى. باسپا سالاسى ۇزاق ۋاقىتتى الاتىن ءۇردىس بولعاندىقتان, ونىڭ بارىسىندا تاجىريبە الماسۋ ماڭىزدى. بۇعان دەيىن مەكسيكا, وڭتۇستىك افريكا ەلدەرى, بىرىككەن اراب امىرلىكتەرىندە بولىپ كىتاپ جارمەڭكەسىن ۇيىمداستىرۋشىلارمەن كەزدەسىپ, سەمينارلار وتكىزگەنىن اتاپ وتكەن مارتەبەلى مەيمان قازاقستان تاراپىن كەلەر جىلى فرانكفۋرت كورمەسىنە قۇرمەتتى قوناق بولۋعا شاقىردى. بۇگىندە الەم ادەبيەتىنىڭ كورنەكتى وكىلدەرىنىڭ جارناماسىن جەر-جاھانعا جاريا ەتىپ وتىرعان فرانكفۋرت كىتاپ كورمەسىنە قازاقستان اۆتورلارىنىڭ, قازاق قالامگەرلەرىنىڭ قاتىسۋى الەمدىك كەڭىستىككە جول اشىپ قانا قويماي, ادەبي-مادەني ىقپالداستىقتىڭ قارقىن الۋىنا ىقپال ەتەدى.
تاراپتار كەزدەسۋ سوڭىندا كەلەر جىلعا قاراي بىرلەسكەن جوبالاردى ىسكە اسىرۋعا, ىسكەرلىك بايلانىستى نىعايتۋعا ۋادەلەستى.
