اسلان جەكسەنبين
ساربازدار ءۇشىن اسا ماڭىزدى ءىس-شاراعا ولاردىڭ تۋىستارى مەن دوستارى, اسكەري ءبولىم كومانديرلەرى قاتىستى. وسىلايشا, ولار جاس ۇلاندارعا قولداۋ كورسەتتى.
كەزەكتى شاقىرىلىم ساربازدارى ەل شەكاراسىنىڭ كۇزەتىن قامتاماسىز ەتەتىن قورداي شەكارا باسقارماسىنىڭ قاتارىنا قوسىلدى. قازاقستاننىڭ وڭتۇستىك بولىگىندە ورنالاسقان بۇل ايماق شەكارا قاۋىپسىزدىگىن قامتاماسىز ەتۋدە ەرەكشە ماڭىزعا يە. شەكارا قىزمەتى ءاربىر جاس ساربازعا زور مىندەت جۇكتەپ, وعان ۇلكەن جاۋاپكەرشىلىك ارتادى. انت بەرۋ ءراسىمى وسى مىندەتتىڭ سيمۆولدىق باستاۋى ىسپەتتى. بۇل كۇنى ساربازدار وتان الدىنداعى جاۋاپكەرشىلىگىن تەرەڭ سەزىنىپ, تاۋەلسىزدىك پەن بەيبىتشىلىكتى ساقتاۋ جولىنداعى قىزمەتكە شىن جۇرەكتەن دايىن ەكەندىكتەرىن جەتكىزدى.
جاس جاۋىنگەرلەر انت قابىلداعاننان كەيىن بىردەن اسكەري دايىندىق باعدارلاماسىنا قوسىلدى. اسكەري بولىمدە ولار تاكتيكالىق جانە فيزيكالىق دايارلىقتان ءوتىپ, شەكارا كۇزەتۋ ءىسىنىڭ قىر-سىرىن مەڭگەرۋگە كىرىسەدى. اسكەري ءومىردىڭ ءاربىر ءساتى شىدامدىلىق پەن شىڭدالۋدى تالاپ ەتەدى. ساربازدار شەكارانى قورعاۋ ىسىنە قاجەتتى داعدىلاردى مەڭگەرىپ, ءاردايىم قىراعىلىقتى ساقتاۋدى ۇيرەنەدى. ولاردىڭ ارقايسىسى – ەلىمىزدىڭ تىنىشتىعى مەن تاۋەلسىزدىگىن قورعاۋعا ارنالعان ماڭىزدى تەتىكتىڭ ءبىر بولشەگى.
جامبىل وبلىسىنىڭ قورداي اۋدانىندا وتكەن انت قابىلداۋ راسىمىندە جالپى سانى 321 سارباز اسكەري انت بەردى. كۇزگى شاقىرىلىم اياسىندا قازاقستاننىڭ ۇلتتىق قاۋىپسىزدىگىن قامتاماسىز ەتۋ جولىندا وزدەرىنىڭ العاشقى قادامدارىن جاساعان ولاردىڭ جۇزىنەن شاتتىقتىڭ تابى ەسىپ تۇردى.
انت قابىلداۋ راسىمىنە قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ شەكارا قىزمەتى جامبىل وبلىسى بويىنشا دەپارتامەنتىنىڭ باستىعى, پولكوۆنيك عاني بەكمىرزاەۆ ارنايى قاتىسىپ, جاس ساربازدارعا ساتتىلىك تىلەدى. ول ءوز سوزىندە اسكەر قاتارىنا قوسىلعان جاۋىنگەرلەردىڭ ەلىمىزدىڭ شەكارالىق قاۋىپسىزدىگىن قامتاماسىز ەتۋدەگى ماڭىزدى ءرولىن اتاپ ءوتىپ, ولاردىڭ وتان الدىنداعى قاسيەتتى بورىشىن ابىرويمەن وتەۋلەرىنە سەنىم ءبىلدىردى.
جامبىل وبلىسى
