سۋرەتتە: «اينالايىنعا» اق جول.
ەلىمىزدە تۇڭعىش رەت جارىق كورگەن مۇنداي كىتاپتار ينكليۋزيۆتىك قوعام قۇرۋدا پرەزيدەنت قاسىم-جومارت توقاەۆتىڭ باستاماسىنا ءۇن قوسۋدىڭ جارقىن كورىنىسى. كورۋ مۇمكىندىگى شەكتەۋلى بالالارعا ارنالعان قازاق تىلىندەگى بۇل كىتاپتى ۇلكەن تيراجبەن جانە جۇيەلى تۇردە باسۋ جوباسى كوپشىلىك تاراپىنان قولداۋعا يە بولىپ, وقىرماندارىنىڭ ىستىق ىقىلاسىنا بولەندى. جيناققا 22 اۆتوردىڭ اڭگىمەلەرى مەن ولەڭدەرى ەندى. 1000 دانامەن شىققان جيناق ەلىمىزدىڭ بارلىق وڭىرىندەگى زاعيپ بالالار وقيتىن مەكتەپ-ينتەرناتتارعا تۇگەلدەي تاراتىلاتىن بولادى.
كىتاپتىڭ تانىستىرىلىمىندا سەنات دەپۋتاتى امانگەلدى تولاميسوۆ قازاقستان رەسپۋبليكاسى سەناتىنىڭ توراعاسى ماۋلەن اشىمباەۆتىڭ ىستىق ىقىلاسىن جەتكىزدى.
«ادامدى ادام ەتكەن – كىتاپ, ادامزات ەتكەن – كىتاپحانا», دەپ جازۋشى ءابىش كەكىلباەۆ ايتىپ كەتكەندەي, كىتاپ – جانسارايدى بايىتار جالعىز قازىنا. سوندىقتان بۇل كوپ كىتاپتىڭ ءبىرى ەمەس, زاعيپ جانداردىڭ رۋحاني دۇنيەسىن بايىتۋعا, وي-ءورىسىن كەڭەيتۋگە ارنالعان جارىق ساۋلە, ءبىلىم مەن شىعارماشالىقتىڭ قاقپاسىن اشاتىن كىلت», دەدى الماتى وبلىستىق ءماسليحاتىنىڭ حاتشىسى قۋات بايعودجاەۆ.
سالتاناتتى شارادا ءماجىلىس دەپۋتاتى ماكسيم روجين برايل قارپىندەگى تۇڭعىش قازاق تىلىندەگى كىتاپتىڭ جارىققا شىعۋىمەن قۇتتىقتاي كەلە, بۇل جۇمىستىڭ جالعاسىن تابارىنا سەنىم ءبىلدىردى. ال جازۋشىلار وداعىنىڭ مۇشەسى, اقىن الماس احمەتبەك ۇلى بۇل كىتاپتى قالامگەرلەر قۋانا قۇپتاپ, قازاقستان جازۋشىلارىنىڭ كىتاپ شىعارۋدىڭ تاعى ءبىر سالاسىنا جاساعان العاشقى قادامى ەكەنىن اتادى. سونداي-اق زاعيپ جاندارعا ارنالعان رەسپۋبليكالىق كىتاپحانا ديرەكتورى اسحات قۇسايىن ۇلى, جازۋشى ءدىلدار مامىرباەۆا زاعيپ بالالارعا ارنالعان قازاق تىلىندەگى تۇڭعىش ادەبي كىتاپتىڭ قۇندىلىعىن جوعارى باعالادى.
«وقىرمانعا جول تارتقان «اينالايىن» كىتابى كوز جانارىنان ەرتە ايىرىلعان بالالارعا ارنالىپ وتىر. ولاردىڭ دا كۇنى ەرتەڭ جۇلدىزى جارقىراپ ەل ازاماتى بولارى ءسوزسىز. كىتاپ ءار بالانىڭ ماڭدايىنان يىسكەپ, جۇرەگىنە تەرەڭ بويلايتىن سىرلاس دوسى بولاتىنىنا سەنەمىز. جوبامىزعا قولداۋ كورسەتكەن الماتى وبلىسىنىڭ اكىمدىگىنە ەرەكشە ءىلتيپاتىمىزدى بىلدىرەمىز. بۇل ءبىزدىڭ جۇمىسىمىزدىڭ باسى عانا. ىزگىلىكتى ءىس جالعاسادى. زاعيپ كورەتىن ءتىل – مەيىرىم. الەمدەگى بارلىق بالا باقىتتى بولۋعا جارالعان. ال, باقىت ءسىز بەن ءبىزدىڭ بىرگە قول ۇستاسىپ, ۇلكەن الەمگە قادام باسۋىمىز», دەدى «Bilte Qory» قوعامدىق قورىنىڭ پرەزيدەنتى, اقىن ماقپال مىسا.
ەرەكشە بالالاردى كوركەم سويلەۋگە ماشىقتاندىرىپ, ادامي-تۇلعالىق قاسيەتتەرىن قالىپتاستىرۋعا سەپتەسەتىن جيناقتىڭ تۇساۋكەسەرىنىڭ سوڭىندا ەسترادا جۇلدىزدارى مەن وبلىستىق ءسۇيىنباي اتىنداعى فيلارمونيانىڭ ارتىستەرى ونەر كورسەتتى.
الماتى وبلىسى.
