فوتو: اقوردا
پرەزيدەنتتىڭ ايتۋىنشا قازىر جاھاندىق ازىق-ت ۇلىك نارىعىندا باسەكە كۇشەيىپ كەلەدى. وعان توتەپ بەرۋ ءۇشىن عىلىمدى دامىتۋعا باسا ءمان بەرۋ كەرەك. سونىڭ ىشىندە تۇقىم شارۋاشىلىعىن جانداندىرۋ – ستراتەگيالىق مىندەتتىڭ ءبىرى.
«كارتوپ پەن قانت قىزىلشاسى بويىنشا وتاندىق تۇقىمنىڭ ۇلەسى 10 پايىزعا دا جەتپەيدى. وسىنداي ماسەلەلەردى شۇعىل شەشۋ قاجەت. بيىل ءداندى-داقىلدار سەلەكتسياسى مەن تۇقىم شارۋاشىلىعىن دامىتۋ تۋرالى كەشەندى جوسپار قابىلداندى. ناقتى مىندەتتەر قويىلدى. ۇكىمەتكە ديقانداردى ەلىمىزدە وندىرىلگەن تۇقىممەن قامتاماسىز ەتۋدى تاپسىرامىن. بۇل كورسەتكىشتى 2028 جىلى 80 پايىزعا جەتكىزۋ قاجەت. ال جوعارى ساپالى (ياعني, ەليتالىق) تۇقىمنىڭ ۇلەسى كەمىندە 15 پايىز بولۋى كەرەك. ول ءۇشىن شەتەلدىڭ وزىق تاجىريبەسىن زەرتتەگەن ءجون. مەن جاقىندا فرانتسۋز كاسىپكەرلەرىن وسى سالاداعى ينۆەستيتسيالىق جوبالاردى بىرگە جۇزەگە اسىرۋعا شاقىردىم», دەدى پرەزيدەنت.
قاسىم-جومارت توقاەۆ جۋىردا موڭعولياعا مەملەكەتتىك ساپارمەن بارعان كەزدە اتالعان ەلدىڭ باسشىسىمەن ەكى كوشپەندى حالىقتىڭ ۇرپاعى رەتىندە جىلقى تۋرالى دا ايتقانىن تىلگە تيەك ەتتى.
ء«بىز «تەگىمىز – تۇركى, ت ۇلىگىمىز – جىلقى» دەپ, ارعىماقتى ايرىقشا قادىرلەگەن ەلمىز. تۇتاس تاريحىمىز تۇلپاردىڭ تۇياعىمەن جازىلعان. جالپى, قازاقتىڭ مىنەر كولىگى دە, ىشەر اسى دا جىلقىمەن تىعىز بايلانىستى. ساۋمال مەن قىمىزدىڭ سان ءتۇرلى دەرتكە شيپا ەكەنى بارشاعا ءمالىم», دەدى پرەزيدەنت.
مەملەكەت باسشىسىنىڭ ايتۋىنشا قازىر ەلىمىزدە جىلقى سانى ۇزدىكسىز ءوسىپ كەلەدى. بۇل – جاقسى ءۇردىس.
«دەگەنمەن اسىل تۇقىمدى جىلقىنىڭ ۇلەسى ءبىر پايىزعا دا جەتپەيدى, ياعني 4,2 ميلليون جىلقىنىڭ 40 مىڭى عانا اسىل تۇقىمدى. سوندىقتان مال تۇقىمىن اسىلداندىرۋ جۇمىسىنا باسا ءمان بەرگەن ءجون. قازاقستاندا جىلقىنىڭ بىرنەشە ءتۇرى بار. ونىڭ ىشىندە قازاقپەن بىرگە جاساپ كەلە جاتقان جابىنىڭ ورنى ەرەكشە. كەيىن وعان قوستاناي, كوشىم جانە مۇعالجار تۇقىمدارى قوسىلدى. ارقايسىسىنىڭ ءوز ەرەكشەلىگى بار. مەن بۇعان دەيىن اداي جىلقىسى ماڭعىستاۋدىڭ باعا جەتپەس قازىناسى ەكەنىن ايتتىم. ونى الەمگە تانىتۋ ءۇشىن ناقتى شارالار قابىلداۋدى تاپسىردىم. قازىر اداي جىلقىسى رەسمي تۇردە بولەك تۇقىم رەتىندە تىركەلدى. بۇل ارعىماقتار ۇلى دالا جورىعىندا, باسقا دا الامان بايگەلەردە توپ جارىپ ءجۇر. قوستاناي جىلقىسى دا مىقتى ەكەنى بەلگىلى, الايدا, جوعالىپ كەتۋدىڭ از-اق الدىندا تۇر, نەبارى 280 باس قالدى. سوندىقتان جىلقىنىڭ سانىمەن قاتار, ساپاسىن ارتتىرۋ – ماڭىزدى مىندەت» دەدى پرەزيدەنت.
مەملەكەت باسشىسى بيىل قازاق جىلقىسىنىڭ تۇقىمىن ساقتاۋ جانە كوبەيتۋ ءۇشىن ارنايى زاڭ قابىلدانعانىن اتاپ ءوتتى.
«ەندى بۇل باعىتتا تاعى ءبىر ماڭىزدى قادام جاسايمىز. مەن ۇكىمەتكە جىلقى شارۋاشىلىعى ينستيتۋتىن قۇرۋدى تاپسىرامىن. بىلىكتى ماماندار مۇنى كوپتەن بەرى ايتىپ ءجۇر. قۇزىرلى ورگاندار قىسقا مەرزىم ىشىندە وسى ماسەلەنى پىسىقتاپ, قارجى كوزدەرىن ناقتىلاۋى كەرەك», دەدى پرەزيدەنت.
