فوتو: اقوردا
«قازاقتا «ەڭبەگىنە قاراي – ونبەگى» دەگەن ءسوز بار. مۇنى, ەڭ الدىمەن, اۋىل حالقىنىڭ ەرەن ەڭبەگىنىڭ جەمىسى دەۋگە بولادى. مەملەكەت تاراپىنان دا ءتيىستى جۇمىس جۇرگىزىلدى, قاجەتتى كومەك بەرىلدى», دەگەن ەل پرەزيدەنتىنىڭ سوزىنشە قازىرگى ۋاقىتتا ەلىمىزدە جاڭا ەكونوميكالىق باعدار شەڭبەرىندە ناقتى شارالار قولعا الىنىپ جاتىر.
«جۇيەلى جۇمىستاردىڭ ناتيجەسىندە ينفلياتسيا دەڭگەيى تومەندەدى (بيىلعى قازان ايىندا جىلدىق ينفلياتسيا 8,5 پايىزدى قۇرادى), سونداي-اق ۇلتتىق ەكونوميكانىڭ ءوسىمى 2024 جىلدىڭ قاڭتار-قازان ايلارىندا 4 پايىزدان اسىپ, جاقسى قارقىن الدى. مۇنايدان تىس سالالاردى دامىتۋ ارقىلى وڭ ديناميكا بايقالادى. بۇل – ماڭىزدى ۇدەرىس. ىشكى جالپى ءونىم ءوسىمىنىڭ ۇشتەن ەكىسىنەن استامى ساۋدا, وڭدەۋ ونەركاسىبى, قۇرىلىس پەن اۋىل شارۋاشىلىعىنا تيەسىلى. وسى باعىتتاعى بەلسەندى جۇمىستى جالعاستىرۋ كەرەك», دەدى پرەزيدەنت.
مەملەكەت باسشىسىنىڭ ايتۋىنشا قازاقستان شەت ەلدەردەن تىكەلەي ينۆەستيتسيا تارتۋ بويىنشا ورتالىق ازيادا كوش باستاپ تۇر.
«بيىل جەتەكشى حالىقارالىق رەيتينگ اگەنتتىكتەرى قازاقستاننىڭ قازىرگى نەسيە رەيتينگى ينۆەستيتسيالىق سەنىمدىلىك دەڭگەيىندە تۇرعانىن راستادى. قىركۇيەكتە Moody’s اگەنتتىگى قازاقستاننىڭ ۇزاقمەرزىمدى رەيتينگىن «تۇراقتى» دەڭگەيىنە كوتەردى. بۇل – تاۋەلسىز قازاقستان تاريحىنداعى ەڭ ۇزدىك ناتيجە», دەدى قاسىم-جومارت توقاەۆ.
