سۆەتلانانىڭ اتا-اناسى دا كەزىندە رۋدنىيداعى كەن-بايىتۋ كومبيناتىندا بولات قۇيۋشى بولىپ جۇمىس ىستەگەن. «مەنىڭ مەتاللۋرگ ماماندىعىن تاڭداۋىما سول كىسىلەر ىقپال ەتتى», دەيدى تسەح باستىعى.
1987 جىلى ماگنيتوگورسك تاۋ-كەن مەتاللۋرگيا ينستيتۋتىن ويداعىداي ءتامامداپ, رۋدنىيعا ورالعان بويجەتكەن بىردەن مەتالل قۇيۋ وندىرىسىنە ارالاسادى. اۋەلى بەس جىلداي جەرگىلىكتى تاۋ-كەن بايىتۋ وندىرىستىك بىرلەستىگىندە ينجەنەر بولىپ جۇمىس ىستەيدى. ال 1992 جىلى قوستانايداعى بۇرىنعى ديزەل زاۋىتى, قازىرگى «اگروماشحولدينگ KZ» زاۋىتىنا اۋىسادى.
«قارا جۇمىستان ەشقاشان قورىققان ەمەسپىن. ينستيتۋتتا ساپالى ءبىلىم الىپ, جان-جاقتى تاجىريبەدەن وتتىك. ۇستازدارىمىز الدىمىزدا كۇتىپ تۇرعان قيىندىقتاردى جەڭە بىلۋگە, تاباندى بولۋعا ۇيرەتتى. اكەم دە, انام دا وندىرىسكە كەلگەن ادام ءتوزىمدى, قايراتتى, اقىلدى بولۋى كەرەك, مۇندا ەشتەڭە وڭايلىقپەن جاسالمايدى دەگەندى ۇنەمى قايتالاپ, قۇلاعىما ءسىڭىرىپ وتىراتىن. وتىز جىلدان استى, ەر-ازاماتتارمەن ۇزەڭگىلەسە ەڭبەك ەتىپ كەلەمىن. ءبىز كوبىنە ىستىق تەمپەراتۋرادا جۇمىس ىستەيمىز, اۋىر نارسەنى كوپ كوتەرەمىز. سوندىقتان, ەڭ باستىسى, مۇندا دەنساۋلىعىڭ مىقتى بولۋى كەرەك. وسىنىڭ بارىنە ءوز باسىم توسەلىپ الدىم», دەيدى سۆەتلانا اناتولەۆنا.
بۇگىندە سۆەتلانا باسقاراتىن مەتاللۋرگيا تسەحىندا 8 ادام جۇمىس ىستەيدى, وزىنەن باسقا جۇمىسشىلاردىڭ ءبارى – ەر ادامدار.
«ولاردىڭ ءبارى – وسى تسەحتا كوپ جىلدان بەرى جۇمىس ىستەپ كەلە جاتقان وتە تاجىريبەلى ماماندار. ءوز مىندەتتەرىن ايتقىزباي اتقارادى. جۇمىس بارىسىندا مەنى ۇنەمى قولداپ وتىرادى, كومەكتەرىن ايامايدى. نەگىزى جاستاردان گورى, وسىنداي تاجىريبەسى مول ەرەسەك ادامدارمەن بىرگە جۇمىس ىستەگەن جاقسى. جالپى, ءبىزدىڭ ۇجىمدا وتە ءتارتىپتى, ايتقانىڭدى ەكى ەتپەي ورىندايتىن, جاۋاپكەرشىلىگى جوعارى بىلىكتى ماماندار جۇمىس ىستەيدى», دەيدى تسەح باسشىسى.
سۆەتلانا اناتولەۆنا ءسوز اراسىندا وندىرىستە بىلىكتى كادرلاردىڭ جەتىسپەي جاتقانىن دا اڭعارتىپ قالدى. ايتۋىنشا, بۇگىندە تاجىريبەلى جۇمىسشىنىڭ ورنىن باساتىن جاس مامان تابۋ وڭاي ەمەس. ەسەسىنە, وندىرىسكە جان قالاۋىمەن كەلىپ, وسى زاۋىتقا ءبىرجولا ورنىعىپ قالىپ جاتقان جاستار دا بارشىلىق.
كۇندەلىكتى جۇمىس بارىسىندا تاڭنان كەشكە دەيىن بولات بالقىتىپ, ودان تراكتور, كومباينعا ورناتاتىن ءتۇرلى تەحنيكا بولشەكتەرىن قۇيىپ شىعاراتىن قۇرىش مىنەز, قايسار جاننىڭ بويىنان قاشاندا ايەل ادامعا ءتان نازىكتىك پەن اناعا ءتان مەيىرىم شۋاعى ەسىپ تۇرادى.
سۆەتلانا چەرەپانوۆانىڭ ءوندىرىس سالاسىنداعى كوپ جىلعى ەڭبەگى مەملەكەت تاراپىنان دا جوعارى باعالانىپ, تاياۋدا تسەح باسشىسى استانا تورىندە پرەزيدەنت قاسىم-جومارت توقاەۆتىڭ ءوز قولىنان «ەڭبەك داڭقى» وردەنىن الدى.
«مەملەكەت باسشىسى وسىدان شامامەن ەكى اي بۇرىن قوستاناي وبلىسىنا جۇمىس ساپارىمەن كەلگەندە ءبىزدىڭ زاۋىتقا دا ات باسىن بۇرعان. سول كەزدە ءبىرىنشى رەت جۇزبە-ءجۇز كەزدەستىم. ال ۇلتتىق مەرەكە – رەسپۋبليكا كۇنى قارساڭىندا پرەزيدەنتتىڭ ءوز قولىنان وردەن الدىم. بۇل – بىرىنشىدەن, ەكىنىڭ بىرىنە بۇيىرا بەرمەيتىن ۇلكەن باقىت. ەكىنشىدەن, ەلىمىزدە ءوز ىسىنە بەرىك, جۇمىسىنا ادال ادامنىڭ ەڭبەگى ەشقاشان ەلەۋسىز قالمايدى, وسىعان كوزىم جەتتى. ءوزىم مەتاللۋرگتەر اۋلەتىندە تۋىپ-ءوستىم. ءبىزدىڭ اۋلەتتىڭ مەتاللۋرگيا سالاسىنداعى جالپى ءوتىلىن ەسەپتەپ كورسەم, 126 جىل بولادى ەكەن. اتا-انام ءومىر بويى وسى سالادا ەڭبەك ەتتى. قازىر ۇلكەن ۇلىم وزىممەن بىرگە جۇمىس ىستەپ ءجۇر. ءومىرىمنىڭ 42 جىلى وندىرىستە ءوتتى. ءبىر قاراعاندا, مەتاللۋرگ بولۋ ەر ادامداردىڭ عانا ەنشىسىنە جازىلعان سياقتى, بىراق ءبىزدىڭ زاۋىتتا بۇل ماڭىزدى ەمەس, ايەل ادام دا, ەر ادام دا ءبىر جۇمىستى اتقارادى. مىسالى, ءبىز تسەحتا تسەلسي باعاناسى بويىنشا 1340 گرادۋس ىستىقپەن جۇمىس ىستەيمىز. تراكتورلار مەن كومبايندارعا, ءدان سەپكىشتەر مەن دەستەلەگىشتەرگە ارنالعان ءتۇرلى مەتالل بولشەكتەردى قۇيامىز. اتاپ ايتقاندا, ءارتۇرلى اۋىل شارۋاشىلىعى تەحنيكالارى دوڭعالاقتارىنا ارنالعان كۇپشەكتەر, جەتەكشى تەگەرشىك – شكيۆتەر, كورپۋستار, كرونشتەيندەر قۇيىپ شىعارامىز. ول بولشەكتەر كەيىن تاعى بىرنەشە مەحانيكالىق وڭدەۋدەن وتەدى», دەيدى تسەح باسشىسى.
قوستاناي وبلىسى
