الماتىدا جالعان كۋپيۋرا ساتۋمەن اينالىسقاندار ۇستالدى

ۆەدومستۆونىڭ مالىمەتىنشە, الماتىدا جالعان 100 دوللارلىق كۋپيۋرالاردى ساتۋمەن اينالىسقان تۇلعالار توبى انىقتالعان. قىلمىسقا قاتىسۋشىلاردىڭ ءبىرىنىڭ تۇرعىلىقتى جەرىن ءتىنتۋ بارىسىندا 149 دانا (14 900 اقش دوللارى) جالعان دوللار تابىلعان.

قۇقىق بۇزۋشىلار ۇستالىپ, سوت ولارعا قاماۋدا ۇستاۋ تۇرىندەگى بۇلتارتپاۋ شاراسىن سانكتسيالادى.
 
سونىمەن قاتار باتىس قازاقستان وبلىسىندا قما پوليتسيامەن بىرلەسىپ جالعان ۆاليۋتانى وتكىزۋ فاكتىسىن انىقتادى. ءبىر توپ ادام ورال قالاسىنداعى لوتەرەيا كلۋبتارىنىڭ بىرىندە جالعان 25 000 اقش دوللارى مەن 10 000 ەۆرو وتكىزگەن دەگەن كۇدىككە ىلىنگەن.
 
انىقتالعانداي, كۇدىكتىلەر ءباس تىگۋ ماقساتىندا بۇل قاراجاتپەن شوتتارىن تولىقتىرعان. جالعان اقشانى ساتۋشىعا قاتىستى سوتتىڭ سانكتسياسىمەن «قاماۋدا ۇستاۋ» تۇرىندەگى بۇلتارتپاۋ شاراسى تاڭدالدى. 

«جىل باسىنان بەرى قازاقستان اۋماعىندا اينالىمنان 1 060 جالعان بانكنوت تاركىلەندى, ونىڭ ىشىندە ۇلتتىق ۆاليۋتادا 647 000 تەڭگە سوماسىنا 141 دانا, 90 400 اقش دوللارىنا 905 كۋپيۋرا, 2 000 ەۋروعا 4 كۋپيۋرا, 1 000 يۋان سوماسىنا 10 كۋپيۋرا بار. الىنعان جالعان بانكنوتتاردىڭ جالپى سوماسى 43 ملن تەڭگەدەن اسادى», دەلىنگەن حابارلامادا.