تاۋداعى قاۋىپسىزدىك قازاقستانداعى بەلسەندى تۋريزم كەڭ ەتەك الىپ جاتقان شاقتا ايرىقشا ماڭىزعا يە. مۇندا جىل سايىن مىڭداعان ادام جورىققا شىعادى, قۇزعا ورمەلەيدى جانە باسقا دا دەمالىس تۇرلەرىن تاڭدايدى. الايدا, تاۋدا ءجۇرۋ توتەنشە جاعدايلاردىڭ وقىس وقيعالارى كورسەتكەندەي, بايىپتى دايىندىق پەن ءتارتىپتى قاجەت ەتەتىن, كەز كەلگەن ساتتە باسىڭا قاتەر ءتونۋى مۇمكىن مەكەن سانالادى. تاۋدا, قىسقى ماۋسىم كەزەڭىندە قاۋىپ-قاتەر كوپ, ولاردى بەلسەندى دەمالىستىڭ اۋەسقويلارى ءجيى ەلەۋسىز قالدىرىپ جاتادى. بۇل ۋاقىتتا تاۋ, اسىرەسە الماتىنىڭ جەرگىلىكتى تۇرعىندارى مەن تۋريستتەرى شاڭعى, سنوۋبورد تەۋىپ نەمەسە ءجاي سوقپاقتا سەرۋەندەپ ۋاقىت وتكىزۋدى قالايتىن اۋماق قانشالىقتى كوركەم بولسا, سونشالىقتى قاۋىپتى. تومەن تەمپەراتۋرا, قار كوشكىنى قاۋپى بار بەتكەيلەر مەن توسىن اۋا-رايى ەرەكشە ءبىلىم مەن دايىندىقتى تالاپ ەتەدى. جىل سايىن تاۋداعى جازاتايىم وقيعالار كوبەيىپ وتىر.
تابيعات اياسىنا سەرۋەنگە شىققان ادامداردىڭ قاۋىپسىزدىگى اياسىنداعى الەۋمەتتىك-ءبىلىم بەرۋ جوبالارىن جۇزەگە اسىراتىن Shymbulak Outdoor ءبولىمىنىڭ قۇرىلعانىنا 2 جىلدان استى. ەكى جىلدا تاۋداعى ءجۇرىس-تۇرىس, ادامداردىڭ جابايى تابيعاتتا سەيىلدەۋ مادەنيەتىن ارتتىرۋ بويىنشا قوعامدى حاباردار ەتىپ, بىرنەشە جوبانى ىسكە اسىردى. ءبولىمنىڭ رەزيدەنتتەرى مەن تاۋ سپورتىنىڭ وكىلدەرى بىرىگىپ الماتى قالاسى مەكتەپتەرىندە, ۋنيۆەرسيتەتتەرىندە جانە ۇيىمدارىندا اعارتۋشىلىق كەزدەسۋلەر وتكىزدى.
وسىعان وراي قىسقى سىرعاناۋ ماۋسىمى قارساڭىندا الماتى تاۋلارىنداعى قاۋىپسىزدىك تاقىرىبىندا العاش رەت ارنايى ءىس-شارا وتەدى. تابيعي قاتەرلەر بويىنشا ماماندار, قۇتقارۋشىلار, الپينيزم نۇسقاۋشىلارى, تاۋ شاڭعىسى نۇسقاۋشىلارى, تاجىريبەلى تاۋ گيدتەرى ينتەراكتيۆتى فورماتتا كەڭەستەرىن ورتاعا سالادى. تاۋ بەتكەيلەرىندەگى قاۋىپسىزدىك ەرەجەلەرى تۋرالى «شىمبۇلاق» تاۋ شاڭعىسى جانە سنوۋبورد مەكتەبىنىڭ نۇسقاۋشىلارى تۇسىندىرمەك.
ءىس-شارا 20 قاراشا كۇنى الماتى قالاسىنداعى Novotel قوناق ۇيىندە تاڭعى 09:30-دا باستالادى.
