فوتو: aikyn.kz
سىبايلاس جەمقورلىققا قارسى ءىس-قيمىل اگەنتتىگىنىڭ اتىراۋ وبلىسى بويىنشا دەپارتامەنتىنىڭ باسشىسى ەرۇلان سەرىكقاليەۆتىڭ ايتۋىنشا, دەنە شىنىقتىرۋ, سپورت جانە تۋريزم باسقارماسىندا سىبايلاس جەمقورلىق تاۋەكەلدەرىنە تالداۋ جۇرگىزىلگەن.
«ساراپتاما قورىتىندىسى بويىنشا 900 ميلليون تەڭگەدەن استام قارجى بۇزۋشىلىقتارى انىقتالىپ, ءبىر قىلمىستىق ءىس قوزعالدى. 4 ميلليون تەڭگە بيۋدجەتكە قايتارىلدى. جالعان ديپلوممەن جۇمىسقا ورنالاسقان 30 جاتتىقتىرۋشى قىزمەتىنەن بوساتىلدى. جەكە تۇلعاعا نەگىزسىز بەرىلگەن مۇز سارايىنىڭ عيماراتى كوممۋنالدىق مەنشىككە قايتارىلدى. سونداي-اق سەنىمگەرلىك باسقارۋ شارتتارىنا سايكەس مىندەتتەمەلەرى ورىندالماعان باسقا سپورت نىساندارىن كوممۋنالدىق مەنشىككە قايتارۋ جۇمىستارى جۇرگىزىلىپ جاتىر», دەدى ەرۇلان سەرىكقاليەۆ.
سونىمەن قاتار مەديتسينالىق مەكەمە باسشىلارى مەن باس ەسەپشىلەر جالاقىلارىن جاساندى تۇردە كوتەرگەن.
«دەنساۋلىق ساقتاۋ سالاسىنداعى سىبايلاس جەمقورلىق تاۋەكەلدەرىن تالداۋ بارىسىندا مەديتسينالىق مەكەمە باسشىلارىنىڭ ەڭبەكاقى تولەۋ قاراجاتىن وقۋ اقىسىن تولەۋگە پايدالانۋ جاعدايلارى انىقتالدى. مىسالى,№5 ەمحانا ديرەكتورى «ەسىل» ۋنيۆەرسيتەتىندە وقۋعا 2,1 ميلليون تەڭگە, گەولوگ اۋىلىنداعى ەمحانا ديرەكتورى 2,6 ميلليون تەڭگە, اتىراۋ وبلىستىق پسيحيكالىق دەنساۋلىق ورتالىعىنىڭ ديرەكتورى 3,2 ميلليون تەڭگە, ماقات اۋداندىق اۋرۋحاناسىنىڭ ديرەكتورى – 2,6 ملن تەڭگە, №3 ەمحانا ديرەكتورى – 2 ملن تەڭگە. بۇل قاراجاتتىڭ بارلىعى بيۋدجەتكە قايتارىلدى», دەپ حابارلادى ۆەدومستۆونىڭ ءباسپاسوز قىزمەتى.
