كورمەگە قالامگەردىڭ عىلىمي-تانىمدىق, ەتنوگرافيالىق ەڭبەكتەرى, ولەڭ جيناقتارى, ساتيرالىق مۇراسى, فوتوسۋرەتتەرى, كوزى تىرىسىندە پايدالانعان تۇرمىستىق بۇيىمدارى قويىلعان.
كورمەنىڭ اشىلۋ راسىمىنە مادەنيەت سالاسىنىڭ قىزمەتكەرلەرى, ءوڭىر زيالىلارى, ستۋدەنتتەر مەن وقۋشىلار, جازۋشىنىڭ تۋىستارى قاتىستى. ءىس-شارا بارىسىندا اقىن سەرىكباي وسپانوۆ, جازۋشىلار وداعىنىڭ وبلىستىق وكىلى جانۇزاق ايازبەك ۇلى سىندى سەيىت كەنجەاحمەت ۇلىنىڭ كوزىن كورگەن كىسىلەر قالامگەردىڭ ءومىرى مەن شىعارماشىلىعى تۋرالى تاعىلىمدى اڭگىمە ايتتى. ستۋدەنتتەر جازۋشىنىڭ ساتيرالىق شىعارمالارىن وقىدى.
«بۇل ءىس-شارا ىبىراي ءالتىنساريننىڭ مەموريالدىق مۋزەيىندە ءوتىپ جاتقانى كەزدەيسوق ەمەس. ويتكەنى ۇلى اعارتۋشى مەن سەيىت كەنجەاحمەت ۇلىنىڭ اراسىندا رۋحاني ساباقتاستىق بار. سەيىت اعامىز قازاق ادەبيەتى مەن مادەنيەتىنە ولشەۋسىز ەڭبەك ءسىڭىردى. قالامگەر ىبىراي جايىندا زەرتتەۋ ماقالالار, كوپتەگەن ەڭبەك جازدى. وكىنىشكە قاراي, ىبىراي التىنسارين ەنتسيكلوپەدياسىن اياقتاي الماي كەتتى. ول كىسى قازاق حالقىنىڭ رۋحاني بايلىعىن, سالت-ءداستۇرىن, ادەت-عۇرپىن, مادەنيەتى مەن ونەرىن, تۇرمىسى مەن تىرشىلىگىن تەرەڭ تالداپ, جەرىنە جەتكىزە زەرتتەپ جازىپ شىقتى. «قازاق حالقىنىڭ سالت-ءداستۇرى», «جەتى قازىنا», «ۇلتتىق ادەت-عۇرىپتىڭ بىزگە بەيمالىم 220 ءتۇرى» دەپ اتالاتىن عىلىمي-تانىمدىق, ەتنوگرافيالىق ەڭبەكتەرى جۇرتتىڭ قولىنا تۇسپەيتىن قىمبات قازىناعا اينالدى, مەكتەپ وقۋشىلارىنىڭ ۇلتتىق-تانىمدىق وقۋلىقتارىنىڭ قاتارىنا قوسىلدى. قازاق, ورىس, اعىلشىن تىلدەرىندە جارىق كورگەن «قازاق حالقىنىڭ سالت-داستۇرلەرى», «قازاقتىڭ دارقان داستارقانى», «قازاقستان حالقىنىڭ تۇرمىسى مەن مادەنيەتى» اتتى كولەمدى ەڭبەكتەرى الەمنىڭ 37 ەلىنە تارادى. سەيىت كەنجەاحمەت ۇلىنىڭ ۇلتتىق سالت-سانا, ءداستۇرىمىزدى دارىپتەپ, ەل جادىن جاڭعىرتىپ, جانداندىرۋعا قوسقان ەسەلى ەڭبەگىن حالقىمىز ەشقاشان ۇمىتپاق ەمەس», دەيدى وبلىستىق مادەنيەت باسقارماسى باسشىسىنىڭ ورىنباسارى مەلس بەيبىت ۇلى.
قوستاناي وبلىسى
