فوتولار: اقوردا
قاسىم-جومارت توقاەۆ رەسەي سىرتقى ساياسات ۆەدومستۆوسىنىڭ باسشىسىنا ءىلتيپات بىلدىرە وتىرىپ, ەكىجاقتى ىنتىماقتاستىقتىڭ دوستىق, تاتۋ كورشىلىك جانە ستراتەگيالىق سەرىكتەستىك رۋحىندا قارقىندى دامىپ كەلە جاتقانىن اتاپ ءوتتى. مەملەكەت باسشىسىنىڭ ايتۋىنشا, بۇعان جوعارى دەڭگەيدەگى تۇراقتى ساياسي ديالوگ, سونداي-اق ەكى ەل ۇكىمەتتەرى مەن پارلامەنتتەرىنىڭ ۇيلەسىمدى جۇمىسى ايتارلىقتاي ىقپال ەتىپ وتىر.
اڭگىمەلەسۋ بارىسىندا رەسەي پرەزيدەنتىنىڭ قازاقستانعا جوسپارلانعان مەملەكەتتىك ساپارىنا دايىندىق ماسەلەسىنە ايرىقشا ءمان بەرىلدى.
ء«بىز الداعى ساپارعا تىڭعىلىقتى دايىندالىپ جاتىرمىز. بۇل مەملەكەتارالىق بايلانىستارداعى ايتۋلى وقيعا بولادى دەپ سانايمىز. ەكى ەلدىڭ ىنتىماقتاستىعى ۇلگى تۇتارلىقتاي جانە قارقىندى دامىپ كەلەدى. بۇل ساپار ستراتەگيالىق سەرىكتەستىك پەن وداقتاستىق قارىم-قاتىناسقا تىڭ سەرپىن بەرەدى», دەدى پرەزيدەنت.
ءوز كەزەگىندە سەرگەي لاۆروۆ رەسەي مەن قازاقستاننىڭ كوپجاقتى ىقپالداستىعى, سونىڭ ىشىندە الداعى ساپاردىڭ كۇن ءتارتىبى ۇكىمەتتەر مەن سىرتقى ساياسات ۆەدومستۆولارى اراسىندا ەگجەي-تەگجەيلى پىسىقتالىپ جاتقانىن جەتكىزدى.
رەسەي سىرتقى ىستەر ءمينيسترى استانادا ماسكەۋ مەملەكەتتىك حالىقارالىق قاتىناستار ينستيتۋتىنىڭ 80 جىلدىعىنا وراي عىلىمي-پراكتيكالىق كونفەرەنتسيا ۇيىمداستىرعانى ءۇشىن قاسىم-جومارت توقاەۆقا العىس ايتتى. اتالعان جيىن ديپلوماتيالىق ورتادا جانە بۇقارالىق اقپارات قۇرالدارىندا كەڭىنەن تالقىلانعان.
بۇدان بولەك, قاسىم-جومارت توقاەۆ پەن سەرگەي لاۆروۆ وڭىرلىك جانە حالىقارالىق كۇن ءتارتىبى, سونداي-اق كوپجاقتى قۇرىلىمدار مەن ينتەگراتسيالىق بىرلەستىكتەر اياسىنداعى ارىپتەستىكتىڭ وزەكتى ماسەلەلەرى جونىندە پىكىر الماستى.
